阿樂可以話係我人生嘅啟蒙老師。 佢同我講，無謂作賤自己，快撚啲辭工，唔洗對住KATHY，就一了百了。 但我話唔得。 佢又話，咁不如徹底咁作賤自己。 我同意咗佢呢個講法。 唔知道自虐傾向係唔係潛藏係每一個人嘅基因，聽到阿樂嘅提案，我竟然搵唔到抗拒嘅餘地。 佢叫我要同KATHY有咁熟得咁熟，但唔可以係佢面前表露到我有半點鍾意佢，要當佢係自己老母咁對待。 平時點樣錫老母，就用同樣嘅方法對佢好。 明知佢有男朋友，都要咁樣做。 明知你就算咁樣做，佢都唔會揀你，你都要繼續做。 一邊對佢好，一邊諗起佢其實係有男朋友嘅女仔，咁撚樣個心應該會好似穿咗個窿咁，但都唔可以停。 阿樂話只要KEEP住做返三五七年，只有兩個可能性出現。 一係就條女俾你感動到，一係就你頂唔撚順條女咁都唔俾你感動到。 前者就皆大歡喜，後者就無痛離場。 不過中間過程，就要承受阿鼻地獄般嘅痛楚。 我相信阿樂，揀咗呢條路嚟行。 因為我覺得，喺放低同放唔低之間，剩係得呢個選擇可以俾一個答案我。 多謝你阿樂。…
正所謂，穿針一刻值千金。 打籃球同篤波一樣，喺射嗰吓，都係要心無旁騖。 或者，打飛機都一樣。 三者都愛，難分高低。 最後同阿樂喺球場消耗咗半日，有少少重拾返當初激情嘅感覺。 之不過，一諗起聽日返工要對住KATHY，心入面又失落咗一吓。 我唔知道用咩表情望佢，唔知道用咩語氣應對佢。 講到呢到，我諗好多人都好好奇，到底阿樂條仆街係做咩工，點解可以陪我廢一日。 條仆街，係做FREELANCE，因為佢有家底，所以可以無後顧之憂咁做FREELANCE，都係全靠阿樂，老早已經幫我嘅人生上咗一堂，先令到我第一日返工嗰陣能夠比較處之泰然地面對老細。 阿樂提早令我知道呢個世界有幾咁唔撚公平。 不過，你唔會妒忌佢，因為佢嘅性格，佢嘅品行，佢嘅態度，令你唔會產生妒忌佢嘅情緒，頂多，只係羨慕。 妒忌同羨慕之間，有好大分野。 前者有敵意，後者無。 況且，阿樂係個好豁達嘅人，富貴榮華佢都唔太放在眼內。 亦都有時候好豪咁請我去旅行，我真係無辦法討厭一個咁好嘅朋友。 唔知睇緊呢個故事嘅人會唔會有一個疑問，就係按照我鋪排阿樂出場嘅套路同埋對佢嘅描寫，佢一撚定就係KATHY嘅男朋友，而且仲係要瞞住我晚晚中出我女神嘅嗰種人渣。 不過現實生活並無咁戲劇性嘅展開，阿樂真係只係我一個好好嘅有錢朋友。 KATHY男朋友，另有其人。…
最後，我無理到佢。 但唔代表我無諗過呢個問題。 的確，我唔覺得夢想一定要遠大到俾人笑先叫得上夢想。 大至拯救世界，少至環遊台灣，或者組成一個家庭，安穩過生活，喺我眼中，都係一樣無異。 當然我無打五百字出黎SEND俾佢，唔係我嘅睇法唔夠五百字，而係，我唔想。 我唔想太過涉及佢嘅生活。 我唔想被佢嘅想法影響。 我唔想同佢太接近。 但或者，我嘅呢啲唔想，都已經太遲。 星期一返工，老細叫我去見客。 或者老細終於都察覺到我個JOB係幾咁無野做，所以終於俾多左個任務我。 平時啲客多數都係自動送上門，因為我嚟呢間公司做個陣，佢地已經上晒軌道，甚至喺行內打出一定名堂，所以佢地一直都忙到死，而我只係入吓DATA，催吓佢地趕DEADLINE咁上下。 不過今次有個客，話想了解多啲先搵我地幫手。啲咁撚麻煩嘅晒客，好心就咪做啦，雖則根據老細所講，係個大客嚟，所以要派出一個得力助手，之係我，去商談。 最後，公司出動咗兩個人，一個係我，一個係KATHY。 老細話，等KATHY學吓嘢同埋幫我手喎。 老細俾咗啲資料我，我同KATHY用一個上午嘅時間消化晒，然後下午三點就要上個客公司。 唔知係唔係因為投入工作嘅關係，KATHY今日有啲靜。唔係，應該話佢直頭無講過除左工作上嘅必要溝通之外嘅嘢。 就連餐午飯，都係靜靜地咁食完。 之後，我負責開公司車，車我地去目的地。 車入面瀰漫住尷尬嘅氣氛…… 我扭開收音機，不時偷望鄰座嘅KATHY，安全帶勒係佢胸前，顯得份外玲瓏浮凸……我係幾咁想變成個條安全帶…… 望還望，我都係要繼續小心渣車。 大家依舊沉默無語，度過咗二十分鐘嘅車程。 「我地將為 貴公司度身訂造一個宣傳PLAN，會以故事形式串連 貴公司嘅PRODUCT……」我講。 「故事？咩故事？你知道我地想要咩？」對方問。 「呢個只係我地嘅建議，因為我地知道 貴公司想打入年青人市場，所以想用一啲有別於傳統嘅宣傳手法，唔HARD…
夢想呢個話題無繼續到落去，返屋企之前，我地去左食牛涮鍋。 成件事發生得好自然，自然到我有半刻以為我地係情侶。 我諗好多人都會覺得，一男一女，單獨食晚餐，緊係有啲野。 但係，當呢啲事去到KATHY手中處理嘅時候，所有野都順理成章。 「食飯咯！我睇你都係無約人架啦～」 就係咁簡單嘅一句說話，又幫我個心泵左一大抽血。 上帝真係好撚唔公平，KATHY已經咁撚靚女，有啲波路同身材均勻，但其實佢食好撚多野。 如果以佢嘅食量，我諗佢應該係肥苟全盛時嘅身型。 但上帝就係咁撚唔公平。 「咁點解你揀左做呢行嘅，同音樂完全無關架喎。」我問KATHY。 「無呀，呢行其實自己都有興趣嘅，不過最主要原因係，我怕我接觸關於音樂嘅行業，會有眷戀……」佢答。 我覺得好可惜…… 可惜在於，一個夢想係搖籃之中就殞落左。 可惜在於，KATHY覺得可惜。 「唔講呢樣啦，不如講下你～你返呢份工之前係做咩架？」KATHY問我。 我真係唔好意思話自己係廢青…… 「做哲學家。」我答。 「哲學家？你大學讀哲學架？寫文出版個啲？」KATHY有啲雀躍，令我更加唔好意思，但我決定鳩UP到完場。 「唔係，我係比較高層次一啲。低層次嘅哲學家需要抒發自己對世界嘅領悟，亦都需要出版刊物黎搏取世間認同，但我走得更前。」 「之係點呀？」KATHY用帶點疑惑嘅眼神望住我，我用0.74秒回避開，埋首係食物當中。 「之係我唔需要人去認同，而我嘅思考亦都唔需要化作文字，只係長存係我嘅思想空間，偶爾同過去自己嘅思想博奕，從而悟出人生嘅大道理。」 「咁你悟出左咩大道理？」 「就係腳踏實地好好咁搵份工嚟返……」 「哈哈……哈哈哈」KATHY放聲大笑。 我希望我嘅鳩UP，可以令佢短暫咁忘記自己係音樂路上嘅遺憾。 「今日多謝你黎聽我拉小提琴。」道別之時，佢多謝我嘅出席。 「係我多謝你請我去聽就真。」雖然看似係客套說話，但其實我真心。 「咁星期一見啦～拜拜～」 「拜。」 唔知係咩原因，我已經慣左行開少少，然後目送佢嘅背影消失。 或者我有少少期待過，佢會擰返轉頭偷望我。 不過呢個諗法係絕對多餘。 現實唔會上演童話入面嘅情節，無公主會嫁俾史力加。 我插入耳機戴上，揀左大開眼戒黎聽。 「若你喜歡怪人，其實我很美。」 耳邊響起陳奕迅嘅聲線……溫柔，又帶點無奈，又散發出哀傷。 明顯地，係我將個人情感投放左落隻歌度…… 返到屋企，我收到KATHY嘅WHATSAPP。 「我覺得，有夢想嘅人好耀眼。」 我唔知佢係想鼓勵我追夢，定係暗串我黯淡……定還是暗示佢鍾意左我地老細…… 咩都好，總之呢種女仔，真係好叻玩弄人。 到底女仔要點樣先可以令一個男仔死心塌地呢？ 好簡單，永遠唔好俾佢摸透。 男性天生係有征服慾，雖然我以自己為標準概括晒所有男性唔係咁好，但我依然覺得，男性基因入面，有征服女人嘅慾望。 越難征服嘅女人，男人嘅興趣就越大。 不過好可惜，現實係，大部份男人都係自卑，唔夠膽去行第一步。 因為萬一唔成功，俾人拒絕，男人嘅自尊心會瞬間蕩然無存。 而自尊心，係好多男人賴以為存嘅一樣虛無飄渺嘅野。 不幸地，我就係自尊心高又容易自卑嘅人。 導致我無可能踏出第一步征服KATHY。 就算愛，咁又點？ 呢個世界，有無辦法跨越嘅距離。 人類無辦法行路去月球，同樣地，我都無辦法行入佢個心。 呢個就係我卑微嘅結論。 所以，我拒絕理解同消化KATHY個句說話嘅含意，而選擇大覺訓。…
演奏會，向來都係同我九唔搭八嘅事。 但係，我就一手俾KATHY拉左入呢個音樂嘅世界。 面對住「你要唔要聽我拉小提琴？」呢個問題，唔知點解我無從拒絕。 其實，我係好怕小提琴聲，因為聽親都覺得係劏雞聲。 或者我呢啲低下階層，永遠唔識欣賞呢啲高尚品味。 不過我依然，被個股不可抗力拉左入去演奏廳。 冷氣嘅氣味籠罩住成個空間，連大聲少少嘅呼吸聲都聽得到，打左蠟嘅木地板並無咿咿呀呀咁叫，而係每踩一下，都發出清脆嘅回響。 伴隨著回響聲，KATHY慢慢行去舞台中心。 佢係個獨奏者。 音樂慢慢響起，鑽入每一個角落。 KATHY全心全意咁拉，擺動住身體，晃動住佢一身黑色、帶點飄逸嘅長裙。 係呢一刻，我感受到同平時唔一樣嘅KATHY。 淡粉嘅眼影，微紅嘅唇膏，紮左一個髮髻但又有束長長瀏海飄出黎嘅髮型。 我感受到嘅，係生命力。 佢嘅演奏，帶有生命力，就好似【四月是你的謊言】入面嘅宮園薰咁。 原來一個人全心全意咁去演奏，係咁耀眼…… 旋律之中彷彿透露出佢嘅想法，同埋佢想表達嘅野…… 我感覺到…… 我眼角係不經意之間，流出左半滴眼淚。 到底係音樂感動左我，定係佢感動左我，我唔知道…… 我剩係知道一樣野，就係呢一世，我都唔會忘記呢個人。 時間係初夏，黃昏。 今日嘅天氣並無其他人口中所講熱過赤道嘅濕熱咁熱，空氣反而帶點乾爽，偶爾仲有一兩陣清風。 著住短袖衫嘅我，並無出汗。 呢一點好重要，因為我唔想我嘅汗味俾KATHY聞到。 唔知由幾時開始，我注意多左自己嘅儀容，雖然每一次照鏡，世界都係殘酷咁話俾我知自己只係周杰倫同東尼大木嘅混合體。 但我都，花多左少少心機去GEL頭，去襯衫。 雖然我知道，無論點著，都係襯KATHY唔起，但至少，我想盡力做個陪襯。 我企係會場嘅門口，望住個天。 自從識左KATHY之後，我好鍾意望天，因為我唔想望到其他途人，影響左佢係我腦入面殘留嘅神態。 同埋只有廣闊嘅天，先包容得落我對佢嘅思念。 空氣中每分每秒每時每刻都瀰漫住佢嘅香味，係由我嘅想念散發出黎。 等左無耐，KATHY係會場行出黎。 「喂！你估下我係邊個！」佢從後掩住我雙眼，用假音扮一扮米奇老鼠聲…… 我都唔知今晚洗唔洗面好…… 呢次係我第一次同KATHY有肌膚上嘅接觸。 不過佢對手無我想像中咁滑，可能係因為拉小提琴嘅關係。 果然，每個人成功嘅背後，都有不為人知嘅努力。 「你拉得好好聽。」 「嘖，唔好玩嘅。」佢鬆開手，我望過去，佢嘟嘟嘴。 此情此景，將會喺我腦海中歷久不衰，歷久不褪。 「你拉得好好聽。」我重覆。 「嗯，多謝～」佢咧嘴而笑。酒窩，一隻虎牙，彎月，一次過呈現係眼前。 被夕陽染得赤紅嘅天都頓時黯然失息，成為KATHY嘅配角。 「我有諗過，要踏上國際嘅舞台，係我曾經嘅夢想。」…
「聽講你都係住嗰區架喎，點解你之前唔同我講嘅？」KATHY問我。 佢矮我半個頭多少少，我175，佢161，14CM嘅身高差，令我岩岩好聞到佢嘅髮香味。 點解佢咁迷人，呢個問題自從第一日識佢之後，就係我心頭揮之不去。 「呃，我見你第一日就坐老細車走嘛……」 「哦，你話阿KIT？無呀，佢歡迎我者。」 無巧不成書，我同老細個名都有個傑字。不過係公司，大家都叫佢老細，或者大佬。 KATHY咁樣叫一叫佢阿KIT，我個心就抽左一下。 「哦……哦……」 「你，都係今年畢業架？」佢問我。 「唔係呀，點解咁問嘅？」 「因為你睇落都幾後生，所以咪估你今年畢業囉～」 「哦…哦……」 「你平時返屋企都係搭地鐵架？不如之後都一齊走丫～」 「哦……好呀……」 「不過我地唔係成日都可以準時收工，今日都係因為我阿婆生日，預先申報左先可以準時走咋……」KATHY一定係個交際能手，面對我咁HEA嘅回應，佢都可以KEEP到唔DEAD…
老實講，我份工，真係HEA撚到仆街。 平時返工嘅娛樂，就係襯佢地度橋個陣偷望房入面嘅VIVI，NIKI同FIONA。雖然有時唔小心目光停留左係ESTHER到令自己異常心悸，不過都無防止到我繼續偷睇個三位靚女。 自從KATHY黎左之後，我嘅目光，就只係停留係佢身上。 即使係ESTHER呢啲龐然大物係房入面移動，都DISTRACT唔到我。我因為KATHY而掌握左一樣新技能，就係專注力提升。 或者有人會好奇，點解我會咁明目張膽咁望，原因好簡單，個塊係單面玻璃。出面睇到入面，但係入面就睇唔到出面。所以，瘋狂望靚女，就成為左我返工嘅一部份。 Kathy真係好靚，靚到令人不能自拔。 不過，我同佢就係兩個世界嘅人，佢生出黎，就係屈我地呢啲凡人機。 第一日，我除左同佢講過句你好同簡單地自我介紹之後，就再無交集。 因為kathy，我比平時遲左收工。 上面都提及過，佢地負責創作嘅，基本上都係有返工無放工，不過自從kathy黎左之後，我多左一份期待，就係期待佢地收工。 因為，kathy同我住係同一區。 我期待過，同佢一齊收工。 不過呢個期待，好快就落空。 係我見到kathy坐住老細車走之後。 其實，都唔係話好出奇，雖然老細住貝沙灣但KATHY住銅鑼灣，不過作為一個體貼嘅老細，順路車女同事返工企，都無咩大不了。 屌，我連自己都厄唔到。 第二日，我問RECEPTION個位MM地K嘅女同事AMY…… 「你覺得，我有咩比老細優勝？」 AMY嘖左聲，講：「面皮囉。」 係個一刻，我再將KATHY係我心入面嘅位置再收埋一啲。 我諗，鍾意靚女，係人之常情，呢份常情，應該唔會持久。 我諗，呢份感覺，會隨住時間流逝而慢慢變淡。 我諗…… 事與願遺呢4隻字，係我廿幾年人生最常出現嘅詞語。 有時我都唔知道，到底我係因為佢靚而鍾意佢，定還是我真係鍾意佢，而唔係因為佢靚。 咁樣講好似好難明，係，連我自己都唔明。 或者舉個列子，有時有一個人，佢明明唔係生得靚，但係就會無啦啦吸引到你……可能係因為一個小動作，或者係一陣髮香，一個笑容…… 果個人對你黎講，就好似係個天做出黎專登俾你鐘意咁。 其實我都唔識分，只不過覺得，如果係後者嘅話，會更刻骨銘心。…
我叫阿傑，喺一間公司仔到做文員。 阿傑係我嘅化名，因為嚟緊我打算同大家剖白，唔方便比人知道現實中嘅真實身份。 我將呢個故事貼係故台，大家可以當係故咁睇，不過，其實只係關於我內心掙扎嘅兩三事。 相信有唔少巴打，都睇過殘忍的偷戀呢個故事。好撕心裂肺哩……我都覺，睇個陣已經覺，雖然個陣我嘅人生無咁嘅經歷，但都好深深體會到個種痛…… 不過，當件事發生係自己身上嘅時候，我先知道咩叫切膚之痛。 你可以唔信係真人真事，撳負皮上一頁出返去，又或者可以當係故仔咁睇，睇下一個都市人嘅掙扎……真亦假時假亦真，做人，都係喺虛幻同現實之間徘徊，有時想分都分唔清…… 有樣野可以肯定咁講，個種透骨透心嘅體會，100%係真。 故事一至五更新，因為每一個工作天都會上演剖心劇情。 平凡嘅我，唯一可以做主角嘅時候，就係喺自己嘅故事。 故事，要由大學畢業講起。 我諗，大學畢業嘅時候，大部份嘅大學生，都係徬徨無助。唔知自己想做咩，唔知自己做咩好，唔知自己有咩出路，唔知自己點先買到樓，唔知自己可以做到啲咩。 當然，我都一樣。我係個啲GPA唔過3但又低唔過2嘅人，之係佔大多數嘅平凡人。我係由幾時開始知道自己平凡？由小學考呈分試開始。 死讀爛讀，都只係夠入BAND2中學。然之後再死讀爛讀，會考14分升中六，再死讀爛讀，讀到嘔，讀到想自殺，都係入唔到八大，走去讀啲下三流大學HEA張DEGREE返黎。 我好平凡，每日照鏡個陣已經知道，無所謂嘅中上樣，俾到盡可能都係得中下，你問我有咩中下嘅例子？周杰倫同東尼大木混合體咁上下……雖然佢地一樣樣，唔知溝黎做乜…… 唔知大家有無睇過齊木楠雄的災難，我諗我平凡嘅程度已經係去到齊木楠雄勁撚羨慕嘅階段。家境平凡，身高平凡，樣貌平凡，成績平凡，運動平凡，心態平凡。 呢個就係我。 大學畢業之後我用左一年零時間黎思考人生，係我確定自己一定唔會得出結論之後，我開始瘋狂SEND…