第三章

Previous
Next

「聽講你都係住嗰區架喎,點解你之前唔同我講嘅?」KATHY問我。
 
佢矮我半個頭多少少,我175,佢161,14CM嘅身高差,令我岩岩好聞到佢嘅髮香味。
 
點解佢咁迷人,呢個問題自從第一日識佢之後,就係我心頭揮之不去。
 
「呃,我見你第一日就坐老細車走嘛……」
 
「哦,你話阿KIT?無呀,佢歡迎我者。」
 
無巧不成書,我同老細個名都有個傑字。不過係公司,大家都叫佢老細,或者大佬。
 
KATHY咁樣叫一叫佢阿KIT,我個心就抽左一下。
 
「哦……哦……」
 
「你,都係今年畢業架?」佢問我。
 
「唔係呀,點解咁問嘅?」
 
「因為你睇落都幾後生,所以咪估你今年畢業囉~」
 
「哦…哦……」
 
「你平時返屋企都係搭地鐵架?不如之後都一齊走丫~」
 
「哦……好呀……」
 
「不過我地唔係成日都可以準時收工,今日都係因為我阿婆生日,預先申報左先可以準時走咋……」KATHY一定係個交際能手,面對我咁HEA嘅回應,佢都可以KEEP到唔DEAD AIR。
 
我又何嘗唔係,只不過,我怕行多一步者……
 
「咁,以後有機會再一齊走囉……」
 
「好呀好呀。」
 
點解你要咁興奮?點解你要懶係俾啲希望我咁?
 
你不如配返副眼鏡望真下我,我係周杰倫同東尼大木嘅混合體黎架咋……
 
如果,KATHY係一個冷若冰霜嘅女人,我或者對佢會無咁著迷。
 
或者。
 
 
地鐵車廂入面逼,就係人都知。不過今次係我第一次慶幸香港咁撚多人。
 
因為擠逼嘅地鐵,令我同KATHY嘅距離拉到好近。
 
基本上,佢就貼住我心口。
 
我盡力抑制住自己,希望個心唔好跳得太快,奈何世事總係未如人意。
 
我感覺我個心跳到連件衫都震埋,希望KATHY唔會FEEL到……
 
成程車我地基本上都無講過野,因為太逼,都唔知點講好。
 
「咁我地聽日見啦,拜拜~」臨走個陣,佢都要笑住講拜拜。
 
唔記得左我有冇提及過,佢笑個陣,對眼會變做一彎月。
 
係我見到佢笑之前,我覺得月亮好靚,見到之後,我覺得我可以望佢對眼一世,都唔再抬頭望天。
 
佢岩岩黎做個陣,係六月,我地行出地鐵站個陣,個天仲未黑晒。
 
唔知係唔係因為氣壓嘅問題,個日個天好紅,加上就黎天黑,紅同紫同橙溝下溝下,好靚。
 
但係,我只係望住佢個背影離開,直至佢消失係視線範圍內,都無望過個天。
 
喺個一刻,我諗起側田嘅美麗之最……若然你話你要我望佢一世,我諗都唔夠。
 
如果世界上真係有最美麗嘅野,大概就係KATHY。

【人與人之間嘅相遇,真係好奇妙】
 
個晚我將我WHATSAPP嘅CAPTION轉左做呢一句。
 
仲影低左KATHY嘅背影消失之後,殘留係天空嘅夕陽同佢嘅配色。
 
個晚,KATHY WHATSAPP我。
 
「你講我同你呀?」佢問。
 
如果要形容個一刻嘅感覺,我諗大概係俾一個馬桶泵係咁泵自己個心。
 
我唔識得點樣反應,亦都估唔到KATHY嘅意圖。
 
我以為佢放工遮我去地鐵站,係出於對同事嘅關懷,我以為佢KEEP住搵話題唔想DEAD AIR,大怕場面尷尬。
 
返到屋企,佢大可以放低係出面嘅個套應付人嘅裝備,做返最真實嘅自己。
 
但偏偏,呢個可能係最真實嘅佢,WHATSAPP搵我。
 
如果我有少少錢,我真係會懷疑佢目的係我啲錢。
 
不過,我係連錢都無嘅人。呢個世界,並唔係所有人嘅生活都多姿多彩。
 
我就係個種,生活係灰暗嘅人。
 
但奈何一個來自KATHY嘅WHATSPP訊息,為我嘅世界帶嚟一抹彩虹。
 
「呃……係呀。」我諗左十五分鐘,諗過好多種方法去延續話題,但最後,都係HEA覆。
 
我唔希望佢帶嚟更多希望,我亦都唔希望自己進一步會錯意。
 
但世事往往事與願違。KATHY,繼續一個話題。
 
係佢身上,總係閃耀住七彩。
 
只不過,彩虹,只係短暫嘅天文現象。
 
 
「你返工慣未呀?」到最後我都係補多左句,作為同事簡單嘅問候。
 
輸入中……
 
我終於感受到愛因斯坦嘅相對論入面提及時間嘅相對性,喺等KATHY輸入中嘅幾十秒鐘,好似過左好耐咁。
 
我呆呆望住輸入中三隻字,懷住緊張又期昐嘅心情等待下一句。
 
「OK呀!我幾鍾意呢份工呀,自由度都算大,同事NICE,老細又好人,你呢?」KATHY回覆。
 
「下?我做左好耐架喇喎,我個位都無咩野做,但求得過且過就算。」我答。
 
輸入中……
 
每當你打完一句就見佢對方輸入中嘅個種感覺,真係好正。我直頭唔敢想像,我電話嘅另一邊,係女神級別嘅KATHY。
 
而呢個女神,秒回緊我。
 
「你諗住一路係呢度打工?」KATHY問我。
 
「呃,暫時我都無咩其他想做,咪做住先囉,人工黎講算唔錯啦,份工又無咩野做,學你咁講,同事同老細都好。」我答。
 
輸入中……
 
在線上
 
藍TICK。
 
失落感原來會喺一刻鐘嘅時間籠罩全身。
 
我明明無期待過,但點解會失落?
 
我攤喺床上面碌左幾轉,諗自己到底邊個位回覆得唔恰當,以致佢欲言又止……
 
當然,我知道我唔會得出一個結論,但就偏偏沉醉係猜度嘅過程中……
 
過左大約半個鐘,WHATSAPP再次傳黎震動。
 
KATHY傳來一張圖片。
 
我用最快嘅速度撳入去,然後見到佢打左一句。
 
「你要唔要聽我拉小提琴?」

Please Login to Comment.