第八章
正所謂，穿針一刻值千金。
打籃球同篤波一樣，喺射嗰吓，都係要心無旁騖。
或者，打飛機都一樣。
三者都愛，難分高低。
最後同阿樂喺球場消耗咗半日，有少少重拾返當初激情嘅感覺。
之不過，一諗起聽日返工要對住KATHY，心入面又失落咗一吓。
我唔知道用咩表情望佢，唔知道用咩語氣應對佢。
講到呢到，我諗好多人都好好奇，到底阿樂條仆街係做咩工，點解可以陪我廢一日。
條仆街，係做FREELANCE，因為佢有家底，所以可以無後顧之憂咁做FREELANCE，都係全靠阿樂，老早已經幫我嘅人生上咗一堂，先令到我第一日返工嗰陣能夠比較處之泰然地面對老細。
阿樂提早令我知道呢個世界有幾咁唔撚公平。
不過，你唔會妒忌佢，因為佢嘅性格，佢嘅品行，佢嘅態度，令你唔會產生妒忌佢嘅情緒，頂多，只係羨慕。
妒忌同羨慕之間，有好大分野。
前者有敵意，後者無。
況且，阿樂係個好豁達嘅人，富貴榮華佢都唔太放在眼內。
亦都有時候好豪咁請我去旅行，我真係無辦法討厭一個咁好嘅朋友。
唔知睇緊呢個故事嘅人會唔會有一個疑問，就係按照我鋪排阿樂出場嘅套路同埋對佢嘅描寫，佢一撚定就係KATHY嘅男朋友，而且仲係要瞞住我晚晚中出我女神嘅嗰種人渣。
不過現實生活並無咁戲劇性嘅展開，阿樂真係只係我一個好好嘅有錢朋友。
KATHY男朋友，另有其人。
「喂屌，我今晚有JOB，你自己搞店啦！」阿樂望一望電話嘅提示，然後同我講。
「得啦，你去死啦。」
「屌你老母。」
「拜鳩拜啦。」
屌嚟屌去嘅相處方式，我諗係麻甩佬之間先做得到。
阿樂走左，世界由兩個人變做一個人。
耳邊奏起林宥嘉嘅旋律，我總是一個人練習一個人。
「呼。」喺肺部呼出一大啖氣，希望藉此排解寂寥。
啪……啪……啪……
阿樂走咗之後，我自己留咗喺球場到，坐埋一邊。戇鳩鳩咁。
聽住籃球偶爾墮地嘅啪啪聲，心靈好似踏實咗一啲。
細細個嗰陣，總係討厭飲到爛醉如泥返屋企嘅老豆。
但今晚，我又想買醉。
酒精有一種魔力，令人本身嘅煩惱都變得疑幻似真，甚至乎會反問自己，我到底係唔係真係煩緊呢一樣嘢。
飲酒，係短暫嘅解脫，係愁緒嘅釋放。
雖然所有嘅愁到最後都係會返去同一個地方，繼續努力做好折磨人嘅工作。
不過，我都係想飲。
我預先較咗十個鬧鐘，每一分鐘一個，恐防第二朝返唔到工，所謂奴性，我都算演繹到極致。
間公司絕對唔係無咗我唔得，但係，我都唔想加重同事嘅負擔。
請叫我呢啲做負責任。
第二日我輕鬆起到身，因為飲得唔算太多。
當我返到公司，發生咗一件我意料唔到嘅事。
「阿傑，你無事呀嘛？」KATHY一面擔心，衝過嚟用手心摸我額頭。
屌你老母。
「你額頭好熱喎！你OK嘛？洗唔洗抖多一日呀？」KATHY好似好焦急咁問我。
我心諗，你哄到咁埋摸我個頭，就緊係熱啦，好彩係摸額頭咋，唔係我著火添呀！
「無……無事……」我下意識甩開佢隻手，雙眼目光因為慌張而左右上下咁浮動。
「唔係喎……真係好……」
「都話無事咯！你無野做咩？」我莫名奇妙地有少少發火咁同佢講。
KATHY有啲俾我嚇親，但無好似其他港女咁發返我脾氣，而係仲用住好擔心嘅眼神咁講：「哦……」
我嘅愧疚感湧咗上心頭，但又開唔到口同佢道歉。
大概有好多段關係，都係咁樣無疾而終。
不過我同佢，咩關係都稱唔上，充其量，咪就係同事囉。
點解佢作為我嘅普通同事，會咁關心我？會咁在意我？
我諗唔明，亦都唔想明。
我剩係知道，佢有男朋友。
無論我同佢之間有幾咁曖昧都好，嗰種曖昧，都只係我認為嘅曖昧，並唔存在喺佢嘅想法入面。
我諗，我嘅無名火，係因為我知道我一直以為嘅曖昧，根本無存在過而起。
然而偏偏，佢仲係要痴埋嚟呵護我。
我已經失去咗拿捏嗰條界線嘅分寸，我正話直頭想狠狠咁攬住佢，攬到佢嗌痛，攬到佢嗌救命為止。
忍住唔去表達對一個人嘅愛，係會令人痴線。
我已經痴左線。
自從嗰次發咗少少火之後，我每日返工都搭正準時六點走，因為唔希望出現同KATHY一齊行嘅尷尬。
加上呢排佢地啲JOB好多，所以係公司都無咩傾談時間。
不過，偶爾我個位會傳嚟佢電話嘅震動，然後望見佢回覆訊息時嘅絲絲甜笑。
我嗰刻先知道，咩叫個心俾蟻咬。
隨住佢電話嘅震動，一下，一下咁蠶食我個心。
我唔想知佢同佢男朋友有幾CLOSE，有幾SWEET……
咩都唔想知……
說來可笑，之前先話過要改變自己，令自己變做一個佢有少少少少少少可能會鍾意上嘅人，依一刻，已經處於頹廢狀態。
面對住毫無轉機，毫無勝算嘅戰役，戰略性撤退絕對係明智之舉。
「今晚得唔得閒？」我WHATSAPP阿樂。
「屌你又嚟呀？」
「係呀。」
有一段時間，我都係不停咁叫阿樂出嚟陪我，聽我發牢騷，飲酒，之後再飲酒，重覆又重覆。
直到有一日，阿樂終於都頂唔住，佢選擇咗開解我。
「你條撚屌又話變嘅？變咗啲咩？」
「唉……我唔知呀，我難受呀，日日喺度聽住佢電話震，然後睇住佢甜絲絲咁覆，仆街我以為個電話係震蛋呀！震到佢咁撚HIGH！」我帶住醉意語無倫次。
「係咁架啦。你又要鍾意人，又要放唔低人，又要唔捨得人。」
「咁唔係點呀？唔通我要係佢世界消失呀？我做唔到呀！」
「咁你睇下你依家似乜鳩？成個東尼大木同周杰倫混合體咁！」
咁我本身都似嘅……
「唉……咪撚再講喇……」
「咁你想點撚樣先？你係唔係連少少希望都要錯過先？」
「希望？邊撚到有？CANT SEE SHIT CAPTAIN！」
「你唔變，就無希望！」
「變乜鳩者？變完咪又係周杰倫同東尼大木混合體！」
「變咗，我肯定你會比較似周杰倫！總好過依家似東尼大木！」
「有乜撚野分別呀？」
「周杰倫靚仔啲！」
「唉屌……咁點變呀，我依家同佢都無傾無講喇……」
「等我教精你啦。」