Tinder19

Previous
Next

講係咁講,又一城大撚到咁…即使我係城大嘅學生,都從未試過行晒每一個角落…

加上啲九唔撚搭八嘅樓層名,真係會令人迷失在這場尋人遊戲。

「限時三十分鐘。」肥婆send嚟。

屌呀?三十分鐘?三十分鐘連行一次成個商場都有難度啦…點搵你呀…

等等…咪住先…

我唔可以一嚟就假定肥婆係有心刁難我,佢應該係俾緊tips我…

如果佢將時間限制喺三十分鐘,即係代表佢唔會匿到好埋,而係想我跑到成隻狗咁嚟下返啖氣。

我相信佢會喺一個顯然易見嘅地方等我!

我喺腦入面投映出又一城嘅地圖,再將自己代入肥婆嘅思維空間。

有人話,鍾意匿埋自己嘅人其實只係鍾意被搵到嘅感覺,所以我首先可以排除女廁。

然之後…戲院入面都可以排除…餐廳都可以排除…因為呢個鐘數應該已經食完嘢…

如果我係肥婆,我會去邊呢?我會揀一個咩地方呢?

唔…

三十分鐘嘅時限,應該唔會移動…如果唔係難度就太高…但我諗都唔會就咁坐喺啲櫈到等我,一嚟太顯眼,二嚟太無聊…

又一城入面可以hea三十分鐘嘅一個地方…

我shortlist咗幾個選項出嚟,最高可能性嘅係taste、馬莎、無印,因為呢三者都係同零食有關,而且夠大間,滿足可以行三十分鐘呢個條件。

其次就係apple store、log on、u記、h&m呢幾類…再幾次就係其他所有細舖頭。

我而家先發覺,原來我並唔係咁了解肥婆…喺諗佢會匿埋喺邊嘅時候,我全部都剩係諗到同食有關…

一直以嚟同佢傾計,好多時候都係佢開解我,同我分憂…而我就竟然丟低咗一個咁樣嘅人…

喺呢一刻,我終於發現肥婆喺我心入面嘅重量,一定比佢嘅體重更加、更加重…

我無時間左諗右諗,只係希望可以順利喺以上地方發現肥婆,畢竟三十分鐘時限都唔容許我去更多地方搵佢…

我喺腦入面規劃出最慳時間嘅路徑,由可能性最高嘅地方開始搵…

呢三十分鐘係我人生經歷過最快同時最慢嘅三十分鐘…

我一路搵一路喺個心入面默念肥婆…希望吸引力法則喺呢啲時候發揮作用…

結果我用半跑嘅方式行晒我列出嘅所有地點,都係搵唔到肥婆…

三十分鐘已到。

「夠鐘,拜拜~」肥婆講。

我喘撚晒氣咁望住個訊息,好撚絕望。

手上面拎住嘅玫瑰仲因為我嘅高速移動而跌咗幾片葉,變咗一枝殘花…

「對唔住…」我除咗呢句都唔知講咩好。

「不過見你搵得咁辛苦,算你啦。」肥婆講。

「?」

我成頭都係黑人問號,肥婆講得出呢句,即係代表佢喺附近,但佢身型咁出眾,我無理由發現唔到佢…

我成個人三百六十度咁轉咗圈,視線入面都係見唔到一個肥過中大email嘅女仔。

我再三百六十度轉多個圈,都係見唔到肥婆,不過,就俾我見到一個戴住cap帽著住t-shirt牛仔褲嘅女仔喺對面同我揮手。

一啲都唔肥。

望住對面揮住手嘅肥婆,我成個腦都空白一片…

係咪真係佢嚟架,定係佢係同緊我後面嘅人打招呼咋?同張相一啲都唔似喎…

我望一望身後,確定真係無其他人喺度,已經唔肥嘅肥婆真係同緊我打招呼。

一個唔肥嘅肥婆…我以後點叫佢好?

「過嚟啦白痴!」已經唔肥嘅肥婆喺tinder講。

初初J鋒喺tinder幫我like肥婆,係想鍛鍊我同女仔相處時候嘅心態…但而家肥婆唔肥,咁仲點樣鍛鍊?

我慢慢一步一步行過去,有咁慢拖咁慢,實不相瞞,我啱先喺taste入面搵肥婆嘅時候仲諗過好唔好買支美極傍身,但我勢估唔到肥婆已經唔肥…

肥婆!!!點解你要減肥!!!

嗚呀!!!

初初同肥婆透露咁多心底話,某程度上係因為我知道佢一係個肥婆,同我一樣係處於食物鏈嘅底層,佢可以體會到我嘅感受,我先講咁多…

但…肥婆已經唔肥…

我有啲接受唔到呢個事實…

每一步行過去佢身邊都好沉重,我初初諗住我同肥婆嘅關係係對等,或者係我佔少少上風…但而家…肥婆已經唔肥…

我嘅自信頓時消失得無影無蹤,本身喺送俾crystal紥花入面抽出嚟嘅嗰支玫瑰突然變到好尷尬…我送唔送好?已經唔肥嘅肥婆會唔會以為我想溝佢?

「行快啲啦!咁快無氣無力拿?」已經唔肥嘅肥婆喺我行到一半嘅時候開聲催我快啲。

頂…點解我會有種好唔妥嘅感覺?呢種到底係咩感覺?

我唔係好識得形容,就好似打麻雀自摸海底撈月但最後發現原來係食炸糊咁…

當肥婆已經唔肥,咁我以往喺tinder到底係同緊邊個講嘢?

我一直腦入面嘅幻想原來同現實唔相符…佢既係佢,又唔係佢…明明係佢…但就唔係我幻想中嘅佢…

媽…好亂呀…

我諗我開始有少少明白crystal所講嘅嘢嘅含意…

應該大概就係一種好似俾人呃咗嘅感覺…

「你係…lily?」我將拎住玫瑰隻手收喺身後,諗住等適當嘅時機丟咗佢。

提提大家,肥婆其實一開始就有名,叫lily。

「係呀,好出奇呀?」lily問我。

「少少啦…」

「你仲唔送俾我嘅?」lily問。

屌…我又係大意,唔記得咗肥婆極有可能一路都喺度監視緊我…我而家先收埋朵花有咩用…

「我見甩咗幾塊葉…諗住廢事啦…」我講。

「唔係吖,都仲好靚!多謝!」

肥婆…唔係唔係…lily至啱…

lily多謝我嘅時候,唔知點解我有啲心虛…可能因為個零鐘之前我先送咗成紥花俾第二個女仔…

「唔使客氣…你食咗嘢未?」我問。

「梗係食咗啦!等得你嚟我餓死喇!」lily講。

「咁又係…」

「我仲未原諒你架!」

「下…?哦…咁…咁點好?」

「你做咩事呀?好似心不在焉咁嘅?」lily問我。

「無…我…有啲怕陌生…」我講。

「哈哈!點會呀?我地喺app到傾咗咁多偈~」lily講。

「但…你都唔係tinder入面嗰個樣…」我講。

「咁你鍾意邊個多啲?」lily問。

一時之間我答唔出…問住眼前減咗肥嘅肥婆,再一次證實咗所有肥人都係潛力股呢個都市傳說…

不過…可能係我自卑心作祟,當肥婆唔再係肥婆,我覺得好唔自在…

「你係唔好意思講,定呢個問題真係有需要你諗呀?」lily繼續問。

「兩樣都有啲啦…哈哈…」我苦笑兩聲。

「我自己啦,就兩個自己都鍾意。」lily講。

「咁做咩要減肥?」我衝口而出問咗出嚟。

「因為其他人唔鍾意囉!不過,我減肥之前其實都唔鍾意自己,係減咗肥之後,先發覺無論邊一個自己,都係自己,唔應該俾其他人嘅眼光影響。所以我先會喺tinder到放減肥前嘅相,希望識啲唔會以貌取人嘅人。」lily講。

我突然之間猶如醍醐灌頂,成個人清醒過嚟,腦海入面嘅肥婆同眼前嘅lily一瞬間融為一體。

lily即係肥婆,肥婆即係lily。即使肥婆變咗做lily,佢都係肥婆,即使lily變返肥婆,佢仍然係lily!

所以,我決定以後都係叫返lily做肥婆,親切好多。

Please Login to Comment.