Tinder18
的士佬，我地山水有相逢！
拎住紮花，戇鳩鳩咁企喺crystal屋企樓下，受盡途人側目…身為毒撚，真係好唔自在。
「我到咗你樓下喇…」我whatsapp crystal。
「你喺樓下撳15樓b，我會開門俾你。」crystal覆我。
「下…？你唔落嚟？」我問。
「你直接上嚟啦…我屋企無人，唔想郁…」
屋企無人…屋企無人…屋企無人
嗚呀！！！
呢四隻字不停喺我腦入面環迴立體聲係咁播播播播…all around me me me me！
不過我要冷靜，一定要冷靜…
嘟…嘟…
「crystal呀唔該…」我對住對講機講。
「哈哈，我本身都諗緊你會唔會咁講，點知真係咁講，同上次一樣～咪話咗屋企無人囉，一定係我接架啦！」crystal把聲開心返好多，咁對我嚟講都係一件好事。
估唔到佢仲記得我上次打電話俾佢嗰陣嘅開場白，心入面不其然有股暖流流過…
希望佢望到我紥花之後就即刻開心返晒，咁我就可以即刻飛的去同肥婆見面…
crystal都算係有錢人家，樓下保安竟然要我登記，我當堂嚇咗一跳…
「箍煲呀？」樓下保安問我。
屌…連保安都要玩鳩我…呢個到底咩世界…
「唔係呀…」我講。
好彩今次呢個保安就無追問啲乜嘢，我拿拿臨撳lift上15樓…
lift們閂埋嘅一瞬我仲彷彿望到佢陰陰嘴笑…
叮噹叮噹…
叮噹叮噹…
叮噹叮噹…
撳咗三次之後crystal終於出嚟開門。
佢頭髮凌亂，仲著住一身睡衣，有一種說不出嘅美態…
話時話，我都係第一次見女性朋友喺屋企嘅樣…咁樣落去真係唔做運動都減到肥…
「咁慢架…」crystal講，佢仲未留意到我身後嗰紥花…
而我亦都唔知到點解要收紥花喺身後面…搞到好似係我想俾驚喜佢咁樣…
crystal背對我行返入屋之際，我都好自然咁拎埋紥花入去放喺佢屋企張飯檯上面，不過咁撚顯眼嘅一紥花，又點樣收得埋呢？
「嘩好靚呀！你買架？」crystal一擰返個頭過嚟嘅時候就即刻發現啲玫瑰。
佢雙眼好似發光咁，面上泛起些許紅暈…
的士佬，算你啦…
「係呀…個的士佬囉…係都叫我買花…買花…結果就真係買咗…」我講。
「你搭的士過嚟呀？唔怪之得咁快啦！」crystal面上嘅紅暈比啱先深色咗啲。
花漾年華嘅佢，望落真係幾靚…
「哦唔係呀…都唔係唔係嘅…其實係…」我唔知點解釋我搭的士係因為我趕住去見肥婆，而家見crystal無乜嘢，我個心都安落返，但點樣同佢講我約咗人好？佢會唔會覺得我唔重視佢？
「真係送俾我嘅？」crystal用熾熱嘅目光望住紥玫瑰…
的士佬，你係得嘅…
「係呀…你喊吖嘛…」
「多謝你…阿鋒未試過對我咁好…」
又想我硬食好人卡？
「佢…真係話要分手…？」我問，因為我覺得J鋒重視crystal多過佢其他女朋友，好多。
所以更加諗唔明點解咁突然講分手。
「我都預咗架喇…不過無諗過咁突然…當佢真係講出口嘅時候…就好似…」crystal望一望紥玫瑰，然後拎起佢繼續講：「就好似插咗枝玫瑰入個心到咁，啲刺不停吉住吉住…好痛…好痛…」
「真係無彎轉？」我問。
crystal輕輕咁搖搖頭，然之後大大啖吸咗一口氣…
由佢吸氣嗰陣嘅鼻水聲我已經知道，佢喺度忍緊唔喊。
「佢真係咁好咩…？」我問。
crystal無答我，而係放低紥花，跪上梳化，望出窗。
我見唔到佢嘅表情，但我知道我呢一刻唔可以離開佢。
「喊出嚟啦，喊出嚟舒服啲。」我講。
「我…唔想喺你面前喊…」crystal帶住哽咽嘅聲音講。
咁…你叫我過嚟做乜春？我心諗…
我望一望個鐘，時間係十二點三十分，如果而家走，即刻截到架肯過海嘅的士，加上唔塞車，我就可以準時見到肥婆。
但望住crystal嘅背影，我真係講唔出話要走…
睇嚟都係要同佢講聲話遲啲到…
正當我拎出電話打開tinder嘅時候，crystal擰轉身坐低…嚇到我即刻收返埋部電話…
「阿鋒呢…總係望住好遠嘅地方…」crystal開口講，我亦都聚精會神咁聽。
「咪成碌木咁企喺度啦…過嚟坐。」crystal拍拍張梳化，示意我坐過去佢身邊。
「哦…哦…」
唉…我連拎部電話出嚟話俾肥婆聽會遲嘅機會都無埋…
希望佢快啲講完…
「阿鋒呢…好似從來都無正眼望過我咁，哈哈…明明喺佢身邊嘅我，明明我地手拖手肩並肩咁行街，但…我知道…佢個心唔喺度…」
唔通…crystal已經知道J鋒有幾個女朋友？
「你一早知…？」我問。
「你指啲咩？」crystal試我口風，我講唔講好？
雖然佢地分咗手…但如果crystal而家未知J鋒有幾個女朋友而我又講咗出嚟嘅話，會唔會好無義氣？
「呃…都係無嘢喇…」我講。
「你指佢唔只得我一個女朋友？」crystal好平淡咁講。
「乜…原來你一早知…哈哈…」
「應該話…佢從來都無諗住瞞…」crystal講。
「咁你仲…？」我問。
「鍾意…解釋唔到架嘛，係咪？」
「都係嘅…」
「但…我唔係指佢個心喺佢其他女朋友到…而係…喺一個更遠更遠嘅地方…企喺我隔離嘅佢，無錯係阿鋒，但亦都唔係阿鋒…唔係真正嘅佢…」crystal講。
我答唔到嘴，或者我同J鋒一直都係兄弟，所以我完全無為意到crystal所講嘅「佢唔係佢」。
「就好似…」crystal欲言又止。
「就好似咩？」我追問，想佢快啲講晒想講嘅嘢，咁我就可以快啲去見肥婆。
「就好似…你而家個心唔喺度咁。」crystal講。
「呃…呃…呃…我…我…我其實…」
「你走先啦，我好返好多喇！」crystal拍一拍我背脊，鼓勵我離開。
有啲痛…
「你真係ok？」我問。
「得喇得喇…我阻咗你咁耐，我唔好意思就真啦！紥花拎走啦，我諗你都唔係送俾我，而係送俾陣間見嗰個人。」
「咁…我走先啦…但紥花，我真係諗住送俾你…」我講完之後起身行去門口。
crystal靜咗，搞到我又擰轉頭望一望。
佢dup低咗個頭，好似係微笑緊…
「咁…我真係走喇…」我講。
佢係咁點頭揈手，示意我快啲走。
臨走前我靜靜雞拎起一枝玫瑰，諗住陣間送俾肥婆補償，一物二用，我真係天才。
只不過，當我去到又一城嘅時候，已經係下午兩點。
離開crystal屋企嘅時候係下晝一點半，我已經馬上拎電話出嚟打開tinder，諗住同肥婆講我會遲啲到。
但…一打開電話就見到肥婆send嚟嘅一串訊息…
「我到咗又一城麥當勞喇，等你～（12:50pm）」
「你大概幾點會到？（1:03pm）」
「你仲未到？（1:09pm）」
「你無咩事呀嘛？（1:15pm）」
「嚟唔嚟都講聲我聽吖。(1:20pm）」
「再唔出現我走架喇，以後唔好搵我。（1:27pm）」
唔知好彩定唔好彩，一點三十一分我已經覆返佢message…
「啱先有啲緊要事處理…我要遲少少先到，兩點前！兩點前一定到，等我…」
不過肥婆無覆到我…
即使係咁，我亦都唔敢怠慢，俾我截到架肯過海嘅的士…
唉…連埋紥花，今日駛費真係大…
「我嚟緊喇…等我…」我繼續send訊息俾肥婆。
佢都係繼續無理我…
唔通已經走咗…？
下晝兩點，我終於到咗又一城，比約定時間遲咗足足一個鐘…
肥婆呀肥婆，求下你一定要等我…
肥婆tinder係會喺tinder profile到放相嘅嗰類人，佢比中大email仲肥少少嘅身型喺又一城嘅麥當勞入面應該相當顯眼，而且我遲咗成個鐘，所以我推斷如果佢仲等緊我嘅話，一定會食住嘢等！
踏入麥當勞，我即刻就行一圈睇下有無一個食緊薯條嘅肥婆，而且不停咁張肥婆喺tinder張相同我眼前見到嘅面孔對照。
兩點鐘又一城麥當勞嘅人流唔係非一般嘅多，雖然係中資，但大家都係無骨氣嘅香港人，一出新包就照狗衝。
我喺人群入面穿插，行咗麥當勞一圈都見唔到肥婆、或者疑似肥婆嘅蹤影…唔通真係無等我走咗…？
唔會嘅唔會嘅…
肥婆咁善良…唔會丟低我…
但…我係唔係利用咗佢嘅善良…？
喺我趕去見crystal之前，我內心深處係唔係覺得…無論我遲幾多，肥婆都會等我…？
係唔係因為我咁樣覺得…所以先咁樣選擇？
到頭來…原來丟低肥婆嘅…係我…？
俾人丟低嘅感覺好惡劣，呢點我感同身受…
肥婆…你到底喺邊…
我成個人呆撚咗咁企喺麥當勞，好想好想無啦啦就有人從後拍一拍我膊頭，然後當我擰過去嘅時候就見到揸住甜筒遞過嚟請我食嘅肥婆…
但我呢種盼望到最後都係無實現到…
我個心就好似甜筒咁，穿咗個窿…
我再打開tinder望一望，肥婆仍然係無覆我，連訊息都唔係顯示已讀狀態…
我碌上去睇多次肥婆嘅訊息，原來佢十二點五十分已經到咗，足足等咗我八個字…仲要係我無應機嘅情況之下等…
嗰種心情，一定好不安…
而家係下午兩點十五分，我決定send多個訊息俾肥婆。
「對唔住…我而家仲喺又一城麥當勞，我會等你返嚟…」
直到兩點三十分，肥婆終於都應我機。
「咪叫咗你以後都唔好搵我囉。」佢講。
「對唔住…」除咗對唔住我都唔知講咩好…
「我唔會原諒你。」肥婆講。
重視，往往係各種強烈情緒嘅來源…
肥婆咁嬲，我諗佢一定係好重視呢次見面…
「對唔住…」我重覆又重覆。
「除非…」
「除非咩？」我以最快嘅手速輸入。
「除非你搵到我啦。」肥婆講。
咁樣講，即係佢未走！一切都仲有轉機！
「你喺邊？」我問。
「你傻的嗎？話你知我喺邊咁使咩你搵？」
又係喎…
「咁…仲喺又一城入面？」我問。
「係呀，剩係又一城都夠大啦。」肥婆講。
我即刻彈起身，表示challenge accepted！
肥婆，我一定會搵到你！