Tinder13
嗰日之後又過咗一個星期，miss lin對我嘅態度都係無變，依然係老師對學生咁，又或者可以形容為朋友，最普通嗰種…
我唔知佢係無睇到個post定係睇完之後意會唔到我嘅心意，定還是係已經意會到我嘅心意但係決定繼續維持原狀…
早知就唔出個post…搞到而家自己係咁亂諗嘢…
呢個星期入面，我無再lunch搵佢，無再放學撞佢，明明只係因為佢無like到我一個post，我就唔知點解覺得同佢嘅距離變遠咗好多咁…
明明佢都無避我，明明佢態度仲係一樣，但我就單方面喺到淆底…
或者…佢態度仲係一樣先令我感覺退卻…
當視線對上嘅時候，我寧願佢避開，都唔想佢禮貌地回以一笑…
呢種彷彿唔放我在眼內嘅感覺真係令我好難受…
屌…咁樣諗落去都唔係辦法…我要整理一下思緒…
代課嘅日子已經過咗三個星期，我嘅目標其實係咩？三個月內令miss lin鍾意我？雖然呢個係最大目標，但…以而家呢個進度嚟睇，咁樣太難…我仲未可以喺佢心入面搣除到「學生」呢個標籤…
既然最大目標好大機會達成唔到，就要諗下有咩其他方法可以令代課期完咗之後繼續同佢keep contact…
咦…咪住先…既然佢係代課老師…咁代完課…就唔係老師啦！至少唔係我呢間學校嘅老師，咁樣到時隔閡會唔會無咁嚴重呢？
呢一點仲係未知之數…就算miss lin到時因為解除咗老師身份而同我close咗，剩低嘅呢段時間入面我都唔可以怠慢…
屌…咁樣又回歸原點…到底點樣做先好…我唔可以眼白白錯失呢三個月時間…
如果…我繼續更進一步去接觸佢…佢會依然對我嘅各種暗示視若無睹，定係會開始有所避忌呢…？
我就好似走咗入掘頭路一樣，搵極都搵唔到走入miss lin個心嘅方法…
「喂，做緊咩？」我走頭無路之下決定whatsapp個老死問一問…
雖然我都幾肯定佢無呢方面嘅經驗…不過，多個人多個腦…
「打緊機。」佢覆。
「打緊機都秒回，果然係好兄弟。」
「load緊咋，有咩事？」
「我鍾意咗個miss…」
「點樣同自己鍾意嘅人close啲？」
「如果鍾意咗個無可能嘅人，你會點？」
我入完又刪入完又刪，完全唔知點樣開口好。
「喂開波喇，陣間搵你。」whatsapp對面嘅佢講。
唉…
呢啲嘢，就算對住最熟嘅兄弟都好難講出嚟…更何況佢都應該俾唔到咩意見我…
都係算啦…
「煩春咩，下舖等你online一齊打。」一陣之後佢whatsapp傳訊息嚟，好明顯係死咗等復活。
「船到橋頭自然直架啦。」佢補多句。
嗯，船到橋頭自然直。
老死你講嘢都幾撚廢。
不過廢話之所以廢，係因為往往隱藏住真理。
我決定繼續做返自己，唔去諗點樣令miss lin鍾意我，唔去諗佢會唔會鍾意我，唔去諗佢會唔會避開我，只要我都做到泰然自若，想要嘅結果就會自己搵上門。
一定係咁，除非唔係。
當我決定順其自然之後，時間就過得快咗。
我無再俾一堆問題困擾住自己，上堂嘅時候專心上堂，喺走廊撞到miss lin嘅時候就say個hi傾兩句…
當初以佢嘅代課期三個月嚟作時限不過係作繭自縛，要追到比自己年長嘅女性，三個月一定唔夠，我已經做好長期作戰嘅心理準備。
首先，我一定要表現得比同齡嘅人更加成熟，所以呢段日子入面我經常去搵miss lin傾關於大學選科嘅問題，借呢個理由見多佢幾次刷存在感先。
其次，我係咁死背爛背顧城同聞一多嘅詩，喺同miss lin傾偈嘅過程入面有位就吟詩，仲吟到佢笑笑口。
仲有就係，我死操爛操中文卷嘅past paper，啲乜乜柒柒文言文都俾我鑽研到一定程度，甚至乎叫我即席用文言文寫篇嘢出嚟都仲得，務求用顯著嘅成績進步嚟吸引miss lin嘅注意。
應該做同可以做嘅嘢我都做咗，再做就只會太over，我唯有相信自己，相信已經確確實實咁傳達到自己嘅心意，亦都唯有相信呢份心意可以令miss lin有少少動搖。
唔好再當我係細路仔喇，好嘛…
轉眼間就過咗三個月，今日係miss lin喺我地學校嘅last day。
唔知呢個係唔係定律，代課老師硬係會比一般老師受歡迎，而當代課老師走嘅時候，班同學就硬係會送張感謝卡俾佢…
遺憾嘅係，我同佢嘅關係仍然停滯於老師與學生，佢始終都係無將我當作一個異性嚟看待。
不過咁又點？
而家只係啱啱開始。
喺同學歡送完一輪miss lin之後，竟然有人提議去放學去唱k嚟個farewell party…miss lin喺群眾壓力之下亦都就範，我感覺到…機會嚟喇飛雲！！！
呢啲成班人去唱歌嘅活動，必定會上演一人唱一首歌嘅情節，唔講你唔知，我唱歌好撚好聽，啲人都話我把聲似側田，仲係有頭髮嘅側田！！！
去到k房之後，我馬上就點咗首到不了，用林宥嘉n年前參加超級星光大道個key嚟唱，希望憑歌寄意，唱入miss lin個心入面。
「若你懂我…這一秒～～～～」唱到呢句嘅時候我擰轉頭橫掃去女同學and miss lin嗰排，當視線同miss lin對上嘅時候，我將目光停留，今次終於、終於、終於俾我見到佢迴避我嘅視線！！！
「我想看到…我想尋找…那所謂的…愛情的美好…」
「願你看到…」
我出盡奶力去唱完呢首歌，眼角仲瞄到有女同學聽到喊。
Miss lin呢？
你又知唔知道我嘅心意？
唱完之後我好瀟灑咁放低支咪，然後頭也不回咁坐返去原本坐緊嘅位，呢個時候就梗係會有幾個女同學過嚟搲水吹兼吹噓我兩句，呢啲情形我都慣。
雖然唔係特別鍾意呢類嘅女仔，但都無話特別討厭，因為我知道佢地都係懷著好意嚟同我溝通、相處，所以我例排都係會保持一種來者不拒嘅態度，但就唔會話交個心出嚟。
或者人真係犯賤，對住一啲自己觸摸唔到嘅目標，先份外在乎、著緊…
可能我對miss lin嘅感覺，都係源自呢種距離感…
呢三個月入面，我不停咁問自己幾個問題：
到底令我著迷嘅係miss lin本身，定抑或係追逐觸不可及目標嘅嗰種患得患失感覺呢？
到底我係怕失去一個人，定係怕失去一個目標呢？
無論我問自己幾多次，都係得唔出標準答案，畢竟我都只係第一次對異性產生呢種感覺。
但唯一可以肯定嘅係，我唔想喺佢嘅世界入面消失。
我唱完之後就坐咗喺度等miss lin唱，因為注意力俾女同學分散咗，搞到我無留意到miss lin點咗咩歌，而我地嘅歌單又係較隨機播放，所以我連急尿都唔敢去屙，怕錯過miss嘅演出。
結果皇天不負有心人，喺我賴尿之前，終於見到佢拎起支咪。
電視機顯示嘅係一首我無聽過嘅歌，係胡清藍嘅兩個世界。
起初我仲以為佢會點告別校園時呢類行嘢，點知完全唔係嗰回事。
前奏起遠，miss lin準備開口唱：
「傷感故事，誰真的愛聽…」
「特別那是你，怎麼忍心…」
…
「兩個不同世界，要走一遍，路會有多遠…」
「Goodbye my wonderful world，一句再見都未留…」
「是我怕你淚流，還是我說不出口…」
「Goodbye my wonderful world，愛得最深的朋友…」
「最需要我的時候，我轉身走，未留下理由…」
…
…
…
我一路聽，一路死忍住眼淚，唔知點解就係好想喊…
有人話過，只要你留意一下某個女仔鍾意嘅歌，你就會大概知道佢諗緊啲乜…
我唔覺得一首歌嘅歌詞可以100%形容晒一個人嘅心情，但或多或少，都總有一兩句中。
尤其係當miss lin唱到「是我怕你淚流，還是我說不出口」呢一句嘅時候，我覺得佢係唱緊俾我聽…
佢點呢首歌，係唔係就係想話俾我聽，我地係兩個世界嘅人，就算唔係隔住生與死嘅距離，我地之間都係有不可跨越嘅牆壁呢…？
我控制唔到自己咁樣諗…
你係老師，我係學生…
你係老師，我係學生…
你係老師，我係學生…
除咗咁，真係無其他？
因為咁，我地就唔可以有其他？
嗰晚miss lin剩係唱咗一首歌，而剩低嘅時間入面，我個腦都係空白一片。
回過神嚟嘅時候，大家已經散咗場，我就好似靈魂出竅咁望住自己同一個個同學講bye bye…
不過係因為一首歌，不過係因為一首歌入面可能有嘅暗示，就成個人頹到咁，連我自己都覺得有啲莫名奇妙…
只係當我一諗起，今日就係呢世人入面最後一次見到佢，今日就係呢世人最後一次同佢講嘢，今日就係呢世人最後一次聽到佢把聲…
我完全控制唔到自己失落…
我根本無辦法好好整理自己思緒…
Miss lin…係唔係今日之後，你就唔打算再同我有任何交集…？
望住佢慢慢行遠嘅背影，腦入面一瞬間閃過好多呢三個月入面單獨相處嘅畫面…
喺佢完完全全消失於我視線嘅一瞬間，我真真正正確定自己，真係鍾意miss lin，唔係因為佢係老師，唔係因為患得患失，唔係因為觸不可及，而係因為佢係佢，佢係有啲大頭蝦嘅佢，佢係有啲神經質嘅佢，佢係對學生好認真嘅佢，佢係笑得好靚嘅佢，佢係佢。
如果就咁放佢走，我呢一世都會後悔。
如果連自己心意都唔清清楚楚講俾佢聽，我呢一世都會後悔。
決定咗之後，成個人都豁然開朗，我就好似偶像劇入面嘅男主角咁樣，起勢咁跑去佢等車返屯門嘅嗰個巴士站，希望呢啲午夜時間略為疏落嘅班次可以幫我留住佢。
跑呀跑，跑呀跑…
跑出呢條橫街，如無意外就可以見到佢嘅蹤影…
結果映入我眼簾嘅啱啱埋站嘅962，而我仲隔住成條大馬路…
「miss lin！」我唔理三七廿一，嗌咗先講。
我以為架巴士駛走之後，miss lin都會好似偶像劇嘅女主角咁企喺原地等我跑過去，笑住同我講聲：「白癡。」，然後bbq結局全劇終。
可惜理想與現實往往總有偏差，miss lin無聽到我愛的呼喚，架巴士頭也不回咁離站。
不過我嘅決心唔會因為咁而動搖，港島區無嘢多，最多就係紅綠燈，只要架車越上多幾次紅燈，我再起勢咁跑，一定可以喺下個站追到架巴士，再同miss lin嚟個深情對話。
估唔到皇天今日第二次不負有心人，喺兩個紅燈之後，我終於追到架巴士，上車。
下層唔見miss lin，我即刻跑上上層。
佢就坐咗喺車頭窗邊位置。
當我跑到上去嘅時候，佢已經喺玻璃嘅反光處見到我出現，仲用一個一啲都唔驚訝嘅樣擰轉頭…
「嗨…」我尷尬到唔知講啲咩好，say咗hi先…
Miss lin無理到我，只係擰返個頭過去，而我亦都行上去佢隔離嘅座位坐低。
「張同學…」佢終於開聲，我屏息靜氣，等佢嘅答案。