第十三章
到底同kathy走過銅鑼灣鬧市，會吸引幾多人嘅目光投射呢？
我有一個懷習慣，就係鍾意望啲麻甩佬嘅眼神。
假設我喺條街上面行緊，前面有位疑似靚女嘅物體，咁樣我就會望吓迎面以來嘅男性嘅目光喺嗰位女仔身上停留咗幾耐，從而判斷佢係唔係背影殺手。
我同kathy走入軒尼詩道，行上希慎廣場，短短十分鐘唔夠嘅路程，已經有十個以上嘅男孩子將目光投射落kathy到，其中仲有一半以上用殘餘嘅時間送我一個不屑嘅眼神。
不過， I don’t fucking care。
同女神行嘅係我，唔係你地，吹咩？
佢地心入面一定喺度諗，到底我係唔係kathy嘅男朋友，又或者妒忌我呢個柒頭，點解可以識到個咁靚嘅女仔。
諗到呢度，我不禁有啲沾沾自喜。
「你笑咩呀？」kathy問我。
「我咁細聲「嘰」一聲你都聽到？」
「係呀，雞尾酒會效應嘛。」kathy講咗一個我陌生嘅名詞。我唔確定我有冇記錯，大概都係咁上下名啦……
「咩嚟架？」
「之係話其實人嘅耳朵有選擇性，喺一個好嘈嘅環境入面，我都可以好清楚咁聽到你講嘢，因為我記住咗你嘅音頻。」
「咁玄嘅？」
「唔玄架，我地依家咪好自然、好清楚咁傾緊計囉～」
諗諗吓，又好似係。
銅鑼灣咁嘈，但我都好清晰聽到kathy把聲，我仲以為係因為我將佢把靚聲無限放大所致添。
「係喎！你想買咩鞋呀？」
「唔好轉移話題！你究竟笑咩！」
「哎呀，放過我啦卓大小姐……」無錯，kathy姓卓。
「唔得！講！」
「我無啦啦諗起一套動畫嘅情節者……」
「咩動畫？」
「日式麵包王。」
「哦！哈哈哈！嗰套野堅好笑！」我成功巧妙地轉移咗話題。
「你又有睇？」我問。
「係呀，黑柳好好笑！」
「係呀，哈哈！」
鬧市入面，我地肩並肩咁吹住水，我偶爾偷望吓佢嘅側面，偶爾望吓路人豔羨嘅目光，自得其樂。
星期日嘅下午，我同kathy拖住懶懶嘅腳步，遊走銅鑼灣嘅各大商場。
行完幾個商場之後，kathy都係買唔到嘢。
「你唔係話想買鞋咩？」我問。
「係呀？」
「我地行咗咁多間，都睇唔啱咩？」
「都唔係嘅，有啲我都覺得ok，但唔夠囉。」
「唔夠？」
「係呀，我覺得好多對都好靚，但就無一對鞋去到嗰個位。」
「咁其實你係想要啲咩？」
「我都唔知呀，我其實次次行街都係搵一種感覺，搵一種非買不可嘅感覺。」
「咁如果搵唔到呢？」
「搵唔到咪唔買囉～～又唔係無鞋著。」
喺kathy對於買鞋嘅價值觀上，我彷似領悟埋佢嘅愛情觀。
感覺。
感覺應該係對於佢嚟講最重要嘅一件事，個男仔靚唔靚仔，對佢好唔好都係其次。
或者，對於kathy嚟講，二十餘年嘅人生入面有好多條件好嘅男仔出現過、追過佢，但佢始終追求嗰種非一齊不可嘅感覺。
而呢種感覺，就只有佢男朋友俾到佢，所以即使佢咁靚，都只係拍過一次拖。
咁我係咩？
如果話，kathy渴望嘅係搵到一對啱晒心水，非買不可嘅鞋嘅話，咁我應該就係喺第二個陳列架上面嘅襪。
風馬牛不相及。
我可以係佢好貼身嘅物品，而絕對唔係佢尋求嘅嗰樣嘢。
大概係咁。
「你做咩靜咗嘅？」kathy問我。
「我成日都係咁架啦。」
「你覺唔覺得你變咗？」
「我變咗？」我有少少詫異kathy嘅敏銳程度，竟然連少少改變都擦覺到。
「係呀。」
「變咗啲咩？」我扮唔知。
「變得無咁死氣沉沉。」
「乜我以前好死氣沉沉嘅咩？」
「係呀，以前覺得你嘅周圍都係籠罩住灰色。」
「咁依家呢？」我問。
「依家……唔話你知住～」
聰明嘅女性，好識得捉住男人嘅心。
假設呢個故事有女性睇，我可以100%咁同你講，只要你永遠唔好滿足你另一半嘅好奇心，佢永遠都唔會離開你。
一旦女仔任何方面都滿足男仔嘅好奇心，等於滿足咗佢嘅征服慾。
滿足咗征服慾，對於男性嚟講，就好似打爆咗機咁。
好多女仔以為，男仔打爆機嗰下就係追到個女仔嗰下。
但其實唔係。
追到個女仔，只係等同開咗個save嚟打機。
將個女仔嘅一切都掌握喺手上面，先至係打爆機。
所以，假設呢個故事有女性睇，唔好咁傻豬豬，以為條仔愛你，你就毫無保留咁展示晒自己。
愛，好大程度建基於神秘感。
唔係個個男仔都好似我咁，即使kathy俾晒所有秘密我知，我都咁愛佢。
我呢種人，絕種架喇。（唔好打我）
不過，kathy天生就有一種雲嘅特質。
虛無飄渺，陰晴不定。
你永遠估唔到佢下一步想點，但偏偏，呢種女人先最吸引。
「不如去行維園？」kathy提議。
「咁老坑？」
其實我係想講：「咁浪漫？」
喺夕陽西下、和煦嘅陽光照射住嘅情況之下，我難保自己唔會受氣氛嘅影響喺草地上推倒KATHY……
SORRY，係難保自己唔會受氣氛嘅影響拖住佢隻手先啱……
對於KATHY嘅提議，我從來都無抗拒餘地，唯有努力用理性壓抑獸性。
有時真係唔明，點解人類呢種生物有咁多慾望……
明明前一排，我都只係想做個喺一邊守望女神嘅人，然後當佢行入我嘅生活，然後當我行入佢嘅世界，我就變得越嚟越貪婪。
我而家直頭想做佢嘅枕邊人。
「咁你行唔行丫？」KATHY用半威脅嘅口吻。
正話都講咗，我從來都無抗拒嘅餘地。
不過今次，我唔想剩係跟住佢嘅腳步走。
我做咗一樣OK痴線嘅事。
「我地先喺外面行去天后先，然後再喺天后入維園行返銅鑼灣，你點睇？」我講。
「點解呢？」
「陣間你就知。」
「哇，你識賣關子架？」
「賣瓜子我都識呀！」
「唔好笑。」
「SORRY。」
然後我地一齊喪笑。
我同KATHY好夾，亦都好有默契。
有時候我想講一樣嘢，會停兩秒，然後佢就會同我一齊講同一樣嘢出嚟。
有時候我地遇到某一件事，會做埋同一個反應。
有時候我地對某一個議題，會持有相同嘅價值觀，然後不停反駁其他人嘅論點。
或者因為我地唔係情侶，唔會出現情侶間嘅問題，先令我地嘅相處咁愉快。
講返嗰樣痴線嘢先……
「入去嚕。」喺經過一間樂器店嘅時候，我講。
KATHY仲未嚟得切反應，已經俾我拉咗入去。
入到去之後，佢又變返個細路女咁，聚精會神咁睇唔同款嘅小提琴。
不過重點唔係帶佢睇小提琴，重點係買一枝結他。
「哇！你做咩無啦啦買枝結他呀？」
「買嚟彈。」
「唔通買嚟裝飾咩！」
「買嚟彈俾你聽。」
KATHY呆咗嗰下表情，我到依家都記得。
五秒後，佢問：「做咩彈俾我聽？」
「報答你。」