後記

「喂，出嚟陪我飲酒。」

有一日我收到阿文whatsapp，劈頭第一句就叫我陪佢飲酒。

「做咩？」

「出or no出？」

「出囉，when where？」我覆。

「八點老地方。」

有酒飲嘅地方，多數都有我。

更何況阿文今次語態緊急，似乎係有咩事。

「做乜鳩？失戀？」我去到嘅時候，阿文已經坐喺度飲緊。

「喂幫我寫個故得唔得？」

「乜鳩？做咩咁突然？」我問。

然後阿文就講咗佢同阿怡嘅故事俾我聽。

「記住俾個good ending我。」阿文講完之後咁樣交帶。

「盡力而為啦。屌你我原本有其他嘢想寫㗎。」

「係咪friend先？」阿文呢一句說話就同日本人嘅「一生嘅請求」一樣，推唔到。

「其實你有冇諗過佢根本無鍾意過你？」我問阿文。

「我有諗過。但如果我咁樣諗嘅話，即係代表佢對其他男仔都係咁…咁…唔…」

「咁即係點？姣？」我問。

「類似啦，咁樣嘅話我寧願相信係我做錯令到佢失望放棄，都唔寧願相信佢係一個會亂咁flirt人嘅女仔。」阿文好認真咁講。

「哦…咁點解你要做錯？」我問。

「有時我都控制唔到，佢啲態度真係太過模稜兩可，講真，佢成日話我逼佢，但我又何嘗唔係俾佢逼緊？我知道自己做錯，但係唔係有需要一刀兩斷得咁乾淨利落？」阿文繼續向我訴苦。

「咁可能佢有佢苦衷呢。」

「如果有苦衷，點解唔講？」

「你又嚟呢！如果可以咁易講出口，就唔係苦衷啦，係咪？」我講。

「屌…唔撚同你嗌…」

「算啦bro，女死女還在，right？」

「記住幫我寫做故事。但唔好抹黑佢。」阿文講。

「sure！」

「但我唔想自爆，你事但塞啲自己嘢落去魚目混珠啦。」

「咁撚高難度？」

「唔係使乜你寫？飲啦屌你…我請。」

「咁又唔拘呀。」

就係咁，阿文同阿怡喺故事入面，都叫係有個happy ending。

奈何故事係故事，現實係現實，到最後都無人知阿怡由一開始嘅心態係點。

或者正如阿文所引述，阿怡的確係只係當佢朋友。

但講真，一隻手掌拍唔響。如果阿怡真係只係當阿文朋友，咁樣嘅話只不過代表佢係一個對所有啱啱識嘅朋友都會拋眉弄眼、騷首弄姿嘅人。

阿文話，佢寧願相信。

你呢？

二百五十七日，過咗去，就不過係一個數字。

然而每一日廿四個鐘入面有幾難捱，就只有當事人先知。

希望呢個故事可以警剔大家，凡事太盡，緣份誓必早盡。

阿文同阿怡，就係活生生嘅例子。