天氣之子觀後感

Previous

--世界再癲狂,也不要去習慣

因為工作關係,經常都有機會可以睇到電影嘅優先場或者試映會。作為新海誠死忠嘅我,今次就去咗睇天氣之子。

當然,喺我心目中,秒速五厘米已經成為不能被超越嘅作品,所以即使天氣之子有幾多票房上嘅突破,我都唔打算吹奏太多。只係想同大家簡單分享一個電影帶俾我嘅概念。(應該唔算劇透掛)

呢個世界,原本就係痴撚線。但係,即使呢個世界係痴撚線,都唔好覺得係理所當然,身為世界嘅居民,我地有責任去了解,去承擔,呢種痴撚線嘅常態。

當你以為你嘅做法、你嘅取態係叫「習慣」,其實只係逃避。逃避面對解決唔到嘅問題,逃避面對承擔唔起嘅責任。或者呢點唔係成套戲嘅中心思想,但對於目前嘅我,對於身處目前香港嘅我嚟講,睇完成套戲之後就得出一個咁嘅結論。

世界癲狂,當習慣成自然,將唔會有任何改變。

因為嚴格嚟講呢個post都算係影評,所以就唔拉埋太多政治嘢嚟講。呢套戲可以話係貫徹新海誠嘅風格,又可以話同以往嘅作品有啲細微分別。喺氣氛營造上同以往有少少唔同,寂寞嘅感覺變得無咁濃烈,至於係好定唔好就見仁見智。

前段鋪墊上節奏有啲略慢,不過中後段漸入佳境,劇情環環相扣。每個角色嘅故事都圍繞中心主題,亦將一種矛盾嘅概念呈現得恰到好處,唔會顯得太過刻意造作。

值得一讚嘅係起歌位真係起得好好,不過起歌方面從來都係新海誠作品嘅殺手鐧。(秒速個起歌位我喊到仆街)同埋新海誠繼續發揮佢嘅強項,角色嘅情感描寫非常細膩,令人好容易同角色產生共嗚。除此之外,笑位亦都多咗。

絕對唔可以唔提嘅係天氣之子入面有個幾有趣嘅彩蛋,一定要留意。

Please Login to Comment.