第二章
老實講，我份工，真係HEA撚到仆街。
平時返工嘅娛樂，就係襯佢地度橋個陣偷望房入面嘅VIVI，NIKI同FIONA。
雖然有時唔小心目光停留左係ESTHER到令自己異常心悸，不過都無防止到我繼續偷睇個三位靚女。
自從KATHY黎左之後，我嘅目光，就只係停留係佢身上。
即使係ESTHER呢啲龐然大物係房入面移動，都DISTRACT唔到我。我因為KATHY而掌握左一樣新技能，就係專注力提升。
或者有人會好奇，點解我會咁明目張膽咁望，原因好簡單，個塊係單面玻璃。出面睇到入面，但係入面就睇唔到出面。所以，瘋狂望靚女，就成為左我返工嘅一部份。
Kathy真係好靚，靚到令人不能自拔。
不過，我同佢就係兩個世界嘅人，佢生出黎，就係屈我地呢啲凡人機。
第一日，我除左同佢講過句你好同簡單地自我介紹之後，就再無交集。
因為kathy，我比平時遲左收工。
上面都提及過，佢地負責創作嘅，基本上都係有返工無放工，不過自從kathy黎左之後，我多左一份期待，就係期待佢地收工。
因為，kathy同我住係同一區。
我期待過，同佢一齊收工。
不過呢個期待，好快就落空。
係我見到kathy坐住老細車走之後。
其實，都唔係話好出奇，雖然老細住貝沙灣但KATHY住銅鑼灣，不過作為一個體貼嘅老細，順路車女同事返工企，都無咩大不了。
屌，我連自己都厄唔到。
第二日，我問RECEPTION個位MM地K嘅女同事AMY……
「你覺得，我有咩比老細優勝？」
AMY嘖左聲，講：「面皮囉。」
係個一刻，我再將KATHY係我心入面嘅位置再收埋一啲。
我諗，鍾意靚女，係人之常情，呢份常情，應該唔會持久。
我諗，呢份感覺，會隨住時間流逝而慢慢變淡。
我諗……
事與願遺呢4隻字，係我廿幾年人生最常出現嘅詞語。
有時我都唔知道，到底我係因為佢靚而鍾意佢，定還是我真係鍾意佢，而唔係因為佢靚。
咁樣講好似好難明，係，連我自己都唔明。
或者舉個列子，有時有一個人，佢明明唔係生得靚，但係就會無啦啦吸引到你……可能係因為一個小動作，或者係一陣髮香，一個笑容……
果個人對你黎講，就好似係個天做出黎專登俾你鐘意咁。
其實我都唔識分，只不過覺得，如果係後者嘅話，會更刻骨銘心。
有時我又諗，到底點先算係鍾意上一個人……
如果我放假會想見到佢，如果我放工之後會掛住佢，
如果我無啦啦想聽到佢把聲，如果我會在意佢同其他男性交流，
如果我睇到佢走光嘅反應唔係繼續睇而係怕俾其他人睇到，
如果我想同佢獨處，如果我想更加了解佢，
如果我遇到開心事會想同佢講，遇到傷心事又怕同佢講左佢會難過，
如果我食野食多左，如果我做運動做多左，
如果我留意多左自己外表，如果我襯多左衫先出街，
如果我夜晚臨訓前會諗起佢，如果我訓醒個陣會諗起佢，
如果我會無啦啦寫低佢個名，如果我會望住佢望到入神，
如果我會為左佢去增值自己，如果……
我諗，如果中晒以上全部，就係鍾意左一個人嘅訊號。
結論係，我好撚鍾意KATHY。
記得有一日，佢著住件鬆身嘅T返工，又俾我見到佢鄔低身執野。
無錯，我係望到好多野，但我在意嘅，竟然唔係我可唔可以望到更多野，而係睇下自己可以望到幾多野。
因為我望到幾多野，就代表其他人都望到幾多野，如果我望唔到再多啲野，之係代表其他人都望唔到再多啲野。
簡單啲咁講，之係我怕佢蝕底俾人。
但明明，佢唔屬於我，佢心靈同肉體都唔屬於我，不過我就係好在意，在意佢蝕俾除左我之外嘅人。
可能細心嘅你一早就注意到，KATHY把聲，其實仲未出現過。
當然，佢唔係老牛聲咁大反差，完美嘅人之所以係完美，就係因為佢每一方面都完美。
「阿傑，唔該可唔可以幫我CHECK CHECK呢個……」KATHY有一次行過黎同我講，叫我幫佢手。係個一刻，我已經知道自己萬劫不復。
「哦……哦……」附合毒撚嘅回應方式，就係我嘅回應。
我可能可以講多幾句，問下晏就去邊度食飯，問下放工一唔一齊走。
但係，然後呢？
滴答滴答……
雨落得好大。
我鍾意落雨，尤其當我心情唔好嘅時候，好似個天幫我喊左出黎咁。
我有自知之明，知道自己身為毒撚，無可能同係天上面嘅老細媲美，更加無可能觸及女神所在嘅地方。
我堅持住留係自己個COMFORT ZONE，我驚再涉及多啲佢嘅生活，我會再鍾意佢多啲。
不過，就算我堅持得住自己留守係COMFORT ZONE，都阻止唔到人地行入黎。
雨，落得好大。
六點鐘，我行出公司門口，搵一搵個袋，發覺自己唔記得帶遮。
我企係大廈門口，望住一波波銀針灑落黎，好靚。
微黃嘅燈光下，雨點自由咁飛舞。
呢一刻，我不其然，諗起KATHY。
「咦，你無帶遮呀？」我擰一擰頭，就係KATHY。
命運就係咁撚ON9嘅一回事，當我極力回避嘅時候，命運就會推你一把。
「唔係呀，我睇雨。」我鳩UP。
「哈，你都幾風趣喎，不如我遮埋你啦。」佢一路講一路遞把遮過黎，重心向前傾左半下，就好似打籃球啲人FAKE你向前咁。
我，就係俾人FAKE到嘅例子。
「你擔喎，嘻～」佢伸一伸隻手黎我個度，然後微笑住咁講出呢一句。
我內心獨白係：屌你老母。