Tinder14
嗰日之後又過咗三個月，轉眼間嚟到中五嘅暑假。
嗰年暑假好熱好熱，雨唔多，一直都好潮濕。
啲人成日話香港濕熱全世界最熱，香港濕凍全世界最凍，雖然明知係鳩嗡但都總會令人有種講得無錯嘅感覺。
就喺嗰年暑假入面最熱嗰一日，我出席咗一個喺教堂舉行嘅婚禮。
太陽曬得好厲害，天空好藍，寧寧舍舍有一朵雲飄下飄下，令到成個天望落比平時更深。
我換上恤衫西褲，一行出門口就已經受到熱浪洗禮，街景都因為炎熱而變得扭曲，為咗避免到達目的地嘅時候成身臭汗，我果斷咁跳上一架的士，直剷目的地。
到達教堂門口，遞出邀請函，撞到一啲其他同學仔，然後一齊行入去。
悠悠嘅鋼琴聲，排列得整齊嘅長椅，萬花筒一樣嘅窗紙，十字架上嘅耶穌…今次係我第一次行入教堂內部，冠冕堂皇嘅裝潢令到我內心有種唔踏實嘅感覺。
過一陣之後，就會有一對新人喺呢個地方簽紙結成夫婦…
男主角姓藍，女主角姓林。
無錯，miss lin今日結婚了，新郎不是我。
「張同學…多謝你。」嗰晚喺巴士上面，佢剩係講咗八隻字，呢度係其中六隻。
我無講啲咩，或者係我咩都講唔出，因為佢嘅表情、語氣、眼神，都已經俾咗答案我。
我無落到車，只係一直靜靜咁坐喺佢隔離，同架車一齊穿過一條又一條隧道。
或者我期望緊，喺呢個鐘車程入面佢會改變主意，決定試下接受我…
但結果只係，一句「再見」。
原來一直以嚟我所做嘅嘢，就只係等值於呢八隻字。
原來一直以嚟嘅努力，係唔足以跨越感覺呢堵牆。
Miss lin落咗車之後，我繼續坐多咗兩三個站，出奇嘅係，我無話好難受，或者我若多若少都已經估到呢個結果，只不過係唔想自己後悔所以先一手揭破。
而家知道答案，反而唔使再估估下佢嘅心意，思緒就好似由一片混濁變到澄明咁，估唔到，第一次失戀就係咁安然過去。
第二朝一覺瞓醒，我仲係好撚掛住佢。
不過既然已成事實，就唯有唔好再去諗。
日子安然無恙咁過咗兩個月，然之後某一日，我屋企信箱收到一張喜帖，唔只我，仲有其他有add佢facebook嘅同學都收到。
寄件者當然就係miss lin。
我嘆咗一口氣，然後好平淡咁就接受咗呢個事實。
原來一直以嚟所感覺到嘅距離感，原因並唔在於老師同學生嘅身份，而只係因為miss lin佢已經有對象。
我仲曾經自作多情地覺得miss lin不過係因為跨越唔到年齡差先拒絕我，哈哈…
「有請新娘入場…」
mc把聲喺教堂響起，我同其他同學、賓客一齊企起身，拍手歡迎miss lin。
然之後成個過程都係拍手、拍手、同拍手…
完咗之後，同其他有嚟嘅同學一齊同miss lin影張相，再離開。
行出教堂，天氣仍然好熱，天空仍然好藍…
唔同嘅係，今朝望到嘅嗰朵孤雲已經飄咗唔知去邊度，唔知係咪已經搵到其他雲呢？
唔同嘅係，miss lin今日之後唔再係姓林，而係姓藍。
同其他出席婚禮嘅同學道別之後，我返到去一個人都無嘅屋企。
瞓喺床上面，望出窗，終於都落雨。
希望聽日，唔好再咁熱就好。
當我以為同miss lin之間嘅事會就咁告一段落嘅時候，過咗幾日，我收到一封信。
張同學：
多謝你，嗰晚講完多謝你之後，其實我仲有好多嘢收咗喺心入面，我無勇氣當面同你講，更加無勇氣去面對同你講咗之後你嘅反應同行動。如果你有呢個心理準備，咁就揭開第二張紙，睇落去。如果你唔想知道答案，咁就丟咗封信佢啦。
我個心跳得好快好快，但都快唔過手速，我即刻馬上毫不猶豫就揭開第二張紙。
多謝你願意打開我嘅故事。
其實早喺我嚟代課之前，我已經接受咗男朋友求婚，亦都已經喺教堂排咗期，通知晒親朋戚友。我而家老公係我中學同學，我地由中四開始已經一齊…我地一齊考公開試，一齊入大學，一齊上莊…哈哈…我諗你應該唔係咁想知道我同佢嘅事…簡單啲講…就係喺識你之前，佢已經喺我生活入面紮根。
你係一個令人感覺好奇妙嘅男仔。就咁相處落會覺得你好有親和力，但相處耐咗、深咗，就會覺得你性格好似雲咁，無梭角，但亦都無邊緣。講到呢度，你應該已經知道我點諗…？
就算我再遲鈍，亦都感受到你對我嘅好意，我好自私，明知自己嘅身份同立場，明知我絕對無可能接受你，但都唔忍心、唔捨得推開你。我知道上堂嘅時候你總係望住我，我知道你facebook出嘅post係同我講，我知道你讀嘅詩係為我而讀…
我無辦法推開你，亦都無辦法接受你，請你原諒我嘅自私。如果一早俾你知道呢個答案，你一定會用盡你嘅創意去令我動搖，我無辦法確保到時自己嘅理智…我知道你有讀顧城嘅詩，咁…你就當我係個唔願意種花嘅人啦…講個秘密俾你知，我今年已經二十六歲，足足大你九年。
多謝你…我所多謝嘅，除咗係你鍾意我，仲係你為我帶嚟嘅霎時心動。我好愛我老公，但十年時間，一早已經由情人嘅愛變咗做家人嘅愛，係你令我再次感受到個心狂跳嘅感覺。不過，正正係因為經歷過，所以我知道呢種心動總有一日會變為平淡，漩渦最終會化成漣漪，然後細水繼續長流。所以，我無勇氣去放棄而家嘅一切去接受一段未知嘅關係…對唔住…
你要搵個比我更好嘅人，然後同佢經歷一次轟轟動動嘅戀愛、細水長流嘅愛情。代課嘅三個月時間，我心境都好似返到中學咁，真係好開心，多謝你為我帶嚟呢種感覺。希望你搵到命中註定嘅一個，而我，只不過係你生命中嘅曇花一現。
林家欣上