Tinder12
Miss lin嚟代課嘅時間有限，佢一離開咗呢個校園之後，我同佢聯繫嘅方法就變到少之有少。
老實講，今次係我第一次有追女仔嘅衝動，平時同班上面女同學嘅相處都係嬉皮笑臉，打打罵罵，我都幾肯定我隨便搵個比較玩得埋嘅女仔表白，佢都會應承我…但一對住自己有感覺嘅女性，我霎時間諗唔到點樣做，我好想表現自己，好想令佢留意到好，好想令我自己喺佢眼中唔再係一個普通學生，但係我又驚弄巧反拙，驚表現得太急進會令佢提早落閘…
畢竟除咗老師同學生呢層關係之外，我同miss lin仲有至少五年嘅年齡差。
我今年十七歲，miss lin就算係啱啱大學畢業就搵到呢份代課工作，佢年齡都已經二十二歲…
五年係咩概念？係我中學到而家所經歷嘅所有時間。
基本上塑造出我張卓鋒而家呢個模樣嘅就係呢五年時間…
咁…miss lin呢？佢嘅過去係點？喺比我多經歷嘅呢五年時間入面，佢有過咩轉變，有過咩生活，有過咩體驗？
呢啲全部關於佢嘅我都想知。
突然之間，我覺得好忐忑。
我知道嘅miss lin就只係一個代課老師，教中文，有啲大頭蝦，做嘢好認真…而其他關於佢嘅嘢，我一無所知。
喺佢代課第二日，已經有同學問佢facebook係咩，佢講咗句「無嘢睇架喎～」就放咗出嚟，當然我都add咗。
我已經唔知第幾次拎起電話撳入佢個得一張profile pic嘅profile到…
明明咩都無得睇，就連張profile pic都係little twin stars，但我就係情不自禁咁一次又一次打開電話，一次又一次撳入去…
其實我會諗…佢嘅profile曾幾何時應該，裝滿佢嘅日常生活，只不過喺去到某一個位，就決定收埋晒自己以前嘅嘢…
因為相遇嘅時間差，我唔存在喺佢嘅回憶入面…因為代課嘅時間限，我無辦法確保自己存在喺佢嘅未來入面…
時間永遠都係咁叫人無奈…
到底點做先好…？
「miss，到底中文可以點進步？」
「miss，而家做緊咩？」
「miss，你鍾唔鍾意細過自己嘅人？」
「miss，你以前讀邊間中學架？」
「miss，你平時有咩興趣？」
「miss，你有無玩開咩運動？」
我打開facebook message，入完一句又刪一句，入完一句又刪一句…
唉，到底點開口好…
而家已經過咗兩個星期，再係咁落去佢好快就完成代課期，而我地就會好似無識過咁，就只係facebook多個朋友。
思念係一種會蔓延嘅虛無，此時此刻，電話另一端嘅miss lin到底喺度做緊啲咩…我真係好想知道…
我決定，用一種婉轉嘅方式去表達自己嘅心情…
我喺facebook出咗個post，希望可以投其所好：
你站在橋上看風景
看風景的人在樓上看你
明月裝飾了你的窗子
你裝飾了別人的夢
呢首詩係卞之琳所寫嘅斷章，希望憑詩寄意，令miss lin或多或少感覺到我對佢嘅心意。
無幾耐之後就已經引嚟一班人讚好同留意，mary問我係咩詩，ana問我做咩咁好文采，phobe問我係唔係唔開心，gigi問我係咪食錯藥…
不過呢啲我都通通唔在意，甚至連理都唔想理…
我就揸住部電話一直等，一直等，一直等…
直到Kayan Lin likes your post呢句通知出現為止，我成個人都彈咗起身。
我知道，我已經成功踏出咗第一步。
踏出第一步之後，要點樣繼續第二步呢？
雖然每日都有中文堂，但佢對住一大班學生，基本上無可能同我有單獨對話嘅機會…
如果話日日放學都去撞佢，又似乎太司馬昭之心…
我靈機一觸，決定lunch嗰陣去搵佢。
根據我呢兩個星期嘅觀察，miss lin應該係帶飯派，所以食lunch嗰陣佢一定喺教員室！
估唔到我年紀輕輕，就已經初嚐撳鐘仔嘅興奮…
不過呢個鐘，係連接我未來嘅鐘！
嘟…嘟
「喂？」咪後傳嚟miss lin把聲。
「你估下係邊個學生搵你？」雖然miss lin唔剩係代我地一班，不過我有信心佢認得出我把聲。
「雖然隔住個咪我認唔到你把聲，但係會玩呢啲惡作劇嘅，我剩係諗到幾個人。」miss lin講。
「除咗我仲有人咁無聊？」
「係呀張卓鋒同學，搵我有咩事？」隔住個咪我都feel到佢面帶笑意。
「你介唔介意出嚟先講？」
「好，你等一陣。」
無幾耐之後，教員室房門打開，miss lin喺入面行出嚟。
「你咁快食完飯嗱？」miss lin問我。
「哦係呀，我剩係食咗個三文治咋。」
「你平時唔係會同陳冠輝李俊傑佢地出去食嘅咩？」
「咦miss你都幾留意我架喎。」
「咁啱見到啫，咁你有咩事搵我？」
miss真係miss，俾著係平時啲女同學聽到我咁講，一定怕羞到紅都面晒，但miss lin仲係一副游刃有餘嘅樣，好明顯佢並唔將我放在眼內…
不過唔緊要，萬事起頭難，只要有恆心。
「我想請教下關於斷章呢首詩嘅嘢。」我講。
「我見你尋日facebook share咗出嚟喎！有咩想問呀？」
「咦miss你有睇我facebook喎！無呀我咁啱上網見到，覺得幾有意境就share咗出嚟，但其實我都唔係好明，明明係幾隻好簡單嘅中文字，點解可以寫到咁有feel？」我問。
「呢首詩出色嘅地方就係在於…」miss lin好興致勃勃咁一輪嘴同我解釋，但其實我已經無心裝載。
望住佢雙眼好似識發光咁，睇得出佢好鍾意呢首詩，而我投其所好嘅策略亦都相當成功…
只係…點先可以令佢唔好再在看待學生嘅眼光嚟看待我…
講真，喺學校入面就算留一年級已經好似同同學格格不入咁，但出到社會做嘢之後每個人之間閒閒地都差三四年，年齡從來都唔係溝通唔到、相處唔到嘅問題根源，真正決定一切嘅係心態…
只要老師唔將我當係學生，區區五年左右嘅年齡差，算得上乜嘢？
事實亦都證明，miss lin而家就喺我面前滔滔不絕咁同我分享緊佢嘅興趣，仲介紹我睇顧城、聞一多嘅詩…我地絕對係可以好似朋友咁相處，明明可以，咁點解仲要受制於老師同學生嘅身份？
「睇唔出張同學你都鍾意詩架喎！」miss lin講。
「咁啱見到覺得幾有趣，哈哈，似唔似文青呀我？」
「唔，如果講嘢穩重啲嘅話就更加似。」
「咁就唔係文青，係文中、文老架喇喎！」
「哈哈，好喇好喇，差唔多打鐘喇，返去準備上堂啦！」miss lin俾我逗到笑出嚟，我真係好想擁有呢個笑容。
「miss，你笑得好好睇。」我衝口而出講出呢句說話，然後紅都面晒咁跑返班房。
你眼睛會笑，
彎成一條橋。
返到班房之後我拎電話上facebook出po打咗呢兩句嘢。
返屋企之後等到凌晨一點，miss lin都係無like到。