Tinder10

Previous
Next

既然應承咗crystal,即係J鋒嗰邊都仲係要扮住先…

一諗起下次三個人一齊出街嘅情景,就覺得好撚攰…

都係嗱嗱臨沖涼瞓個靚覺…

自從同阿欣表白衰咗之後,我夜晚好大段時間都空咗出嚟,雖然以往都唔係日日都會傾電話,但至少都總會whatsapp一兩句講下啲無謂嘢,而我每次都喺答佢之前同答佢之後諗好撚耐…就算傾完都會不停reload返啱先講過嘅嘢,睇下自己有無邊個位講得差咗會令好感度下降…

不過呢啲而家通通都唔重要…學J鋒咁講,越在意一樣嘢嘅時候反而越容易失去…

唔知係咪因為咁,所以佢同佢啲女朋友都保持距離呢?

兄弟呀兄弟,你到底諗緊乜撚…小學嗰陣明明就好正氣嘅你…到底係幾時開始性格變到條條揈嘅呢?

諗下諗下,我已經瞓著咗。

夢境有時候總會為現實嘅煩惱提供線索,希望我呢個夢都幫到手。

「喂,去踢波咯!」夢入面嘅J鋒無啦啦過嚟拍門就叫我去踢波。

呢個畫面似層相識,我記得係中五嘅某一日放學。

「啱啱返到屋咋喎我,抖陣先啦。」隔住個鐵閘同佢講。

「係咪唔陪我先?」佢問。

「陪…陪囉…但抖抖先得唔得?」我問。

「好啦咁你開門先啦。」

「做咩無啦啦咁好興致呀?」我拉開鐵閘問。

「星期五呀嘛今日。」

「我最尾嗰堂test完呀我,而家仲係好撚攰。」

「喂,你覺得呢,點先叫成熟?」J鋒無啦啦問。

「下?你覺得自己而家唔成熟咩?」我問。

「點樣界定成唔成熟?思想?年齡?人生閱歷?」

「你做咩今日問啲嘢咁古怪嘅?」

「無…」

「我都唔知架,但我覺得你而家都叫係成熟吖。」我講。

「點解咁講?」J鋒問。

「感覺囉。」

「屌,有無啲實質啲嘅證據呀?」

「唔…你一係除褲自己望望?」

「唉…都係算鳩數,去踢波未?」

「行囉。」

然之後我就醒咗。

係一個唔撚關事嘅夢。

仲記得嗰場波J鋒好似食咗春藥咁,進攻防守都一併兼顧,跑全場跑撚到氣都咳。

雖然因為我太廢最後都係輸咗,不過踢完之後佢表情就好似輕鬆咗啲。

係唔係嗰場波之後佢開始慢慢變到而家咁呢?我都幾肯定唔係,但個夢似乎想話俾我知,J鋒而家嘅性格,肯定係關場波事。

我望望電話個鐘,先係凌晨三點,都係唔好諗咁多繼續瞓,聽日先約佢去踢波。

第二朝一覺瞓醒,我並無忘記到個夢嘅內容,我決定就喺今日要拆解J鋒性格轉變之謎。

就算要押上我同佢咁多年兄弟嘅感情,我亦都要知道係咩原因令佢變到咁花fit。

直覺話俾我聽,並唔係咩愛到入城大也分開咁簡單嘅問題。

「喂,有冇嘢搞?」我whatsapp問J鋒。

「尋晚先搞完咋喎。」

見到佢個reply之後我個心跌咗半個出嚟,唔通係crystal?但無理由嘅,尋日我地三個先一齊去完街,我地仲送咗crystal去搭車先返屋企…

「你想搞咩呀?」J鋒問。

「踢波?」

「是但…」

喺度交代下J鋒屋企背景先,J鋒係獨生子,佢老豆成日都唔喺香港,老母就成日都同啲親戚去旅行,所以佢屋企成日都係得佢一個。某程度上我覺得佢可以同時keep住咁多段關係都係多得佢屋企成日空出嚟可以俾啲女上去。

「你係咪帶咗女上去你到?」我問。

「走咗啦,christine嚟,即係三號。放心啦,叫得你溝crystal我仲點會叫佢上嚟。」J鋒講。

聽到咁我講我個心先定返定。

「咁我一陣過你到煮麵食,食完先去。」

「煮埋我嗰份喎。」

「得啦屌你。」

其他嘢我唔敢講,但講到煮嘢食,J鋒就同我無得比。至於係幾時開始間中會去佢嗰度煮嘢一齊食,大概就係我知道佢屋企成日都係得返佢一個之後。

唔記得由form幾開始,我地放學打完機之後佢成日捉我去食老麥,仲越嚟越密。起初我都會陪佢,但之後零用錢唔夠使,我老母又開始有說話俾我聽,我先無陪到佢,有一次我好奇問佢:「你唔使返屋企食飯嘅咩?」,佢就成個人頹撚咗咁同我講屋企都無人…

自此之後,一個星期有兩三日佢都會過嚟食晚飯,如果你仲記得,上文提及過我老母喺我同J鋒讀幼稚園嗰陣係會搣佢面摸佢頭嘅老母嚟,所以亦相當歡迎佢嚟食飯。

而晏晝我老豆老母都要返工嘅時候,我就會過去煮下啲濕星嘢一齊食。

唔好諗到我好偉大,喺屋企又係要煮,喺佢屋企又係要煮,不過喺佢度煮完就唔使洗碗,對於我嚟講,就梗係寧願煮多份而跳過洗碗呢個程序啦。

「你好少約我去踢波架喎。」J鋒一路食我碗黯然銷魂麵一路講。

「耐無踢呀嘛。」我仲諗緊點開口令佢如實招來。

「你有啲嘢喎。」J鋒講。

「屌,咪咁多心啦,食你個麵。」

「話時話,你煎蛋技術又好咗,個皮好脆,個蛋黃仲要流心。」J鋒讚嘆我嘅廚藝。

「碎料啦,我咩類型嘅蛋料理都識整。」我講。

「下次煮俾crystal食,一定加分。」J鋒講。

「係都煮俾阿欣食啦…」

「阿欣會上你屋企咩?唔會架嘛!crystal就唔同,下次我叫佢上嚟玩,還掂前排買咗部switch都未郁過。」

「你對crystal同對其他女朋友有啲唔同。」我講。並唔係諗住試探佢,而係我真係咁樣覺得。

「係咩…可能啦,如果唔係都唔會叫你溝佢,你唔會見我叫你溝我其他女,哈哈。」J鋒講。

「crystal同你其他女嘅分別喺邊?」我問。

J鋒無答到我,而係擺部電話上檯面,開個通訊錄出嚟。

佢將部電話擰向我,然後一路向下碌。

iphone通訊錄係顯示中文先到英文,佢一路碌我見到臭雞一號、臭雞二號、臭雞三號、臭雞四號…

然之後臭雞系列就完咗,一跳跳到c字嗰欄,上面有crystal個名。

佢竟然無將crystal入做臭雞五號,真係令到我驚訝不已,到底係咩原因令到J鋒咁做呢?

「我都唔識解釋佢地具體上嘅分別喺邊,但感覺上嘅分別,就好似你睇到咁樣。」J鋒講。

「咁你仲叫我溝佢?」我問。

「但咁樣唔代表我真係好鍾意佢,亦都唔代表我唔鍾意我其他女朋友。」J鋒講。

「咁我問你喇,如果係都要你揀定一個女朋友過世,你會揀邊個?」我問。

「我五個都唔會揀。」佢諗都無諗就答。

「點解?」

「一生一世太沉重,我唔覺得自己承擔得起。」J鋒講。

「咁就寧願自己一個?」

「如果要喺一生一世同孤獨終老之間揀嘅話,呢一刻我會揀後者。」佢講。

「你…係唔係對愛情無信心?」我問。

「呀,飽晒,我換件衫先,等我一陣。」

屌,又俾佢兜走咗。

不過唔緊要,今日仲好長,我實可以令佢坦白。

「喂,不如就今晚叫埋crystal上嚟煮飯仔啦!」J鋒換完衫之後出嚟講。

「唔好啦。今晚你過我到食啦。」我講。

「怕羞呀?」

「唔係呀,我老母前幾日話掛住你,叫我呢排叫你過嚟食飯,咁我咪心諗不如就今日啦。」我講。

「咁梗係好架,伯母煮嘢咁好食,我求之不得添啦。」

「咁我同老母講係今晚架喇。」

「哦。但crystal嗰度你咪諗住走得甩喎。」J鋒講。

「得啦得啦,遲啲實有機會嘅。」

「叫唔叫埋肥西佢地一齊踢波?」J鋒問。

「都好,反正呢個鐘數又無乜人,你喺個group到問啦,睇下阿輝嗰啲得唔得。」我講。

肥西係我中學少數玩得埋嘅同學,而阿輝嗰啲就係J鋒嘅fd,我同J鋒熟悉嘅程度已經去到會介紹自己啲朋友俾對方識,當然我介紹俾佢嘅剩係得肥西一個,而佢介紹俾我嘅就係阿輝、阿傑、偉哥等等一班人。

我地呢班人嘅共通點就係大家都有打lol同有踢波,當然仲同其他全部男生圈子一樣,都係咸濕,所以我地好自然就混熟咗。

一班混熟咗嘅人有咩特徵?就係會改花名。

就好似叫阿成嘅一定係大麻成,叫阿明嘅一定係孱仔明,叫阿偉嘅一定係偉哥咁,圈子內每個人都有花名,正話提到嘅肥西其實全名係陳振東,不過佢好撚肥,所以就叫佢肥西。

至於阿輝同阿傑嘅花名多數踢波先用,一個叫貝碧托輝,一個叫傑c。

呢班人都係我生命入面最好嘅朋友,同樣地係J鋒生命入面最好嘅朋友。

所以我決定利用下群眾壓力,威逼利誘J鋒講出自己嘅愛情故事。

「偉哥話約咗女,其他都ok。」J鋒講。

「哦,好,咁一陣踢完波去食個tea,再去打鋪機,夜晚再返嚟食飯,完美。」我已經計劃好今日嘅行程。

但我同J鋒講咗個大話,就係我啱先暗地裡whatsapp老母話唔返食飯,諗住打機嗰陣先同J鋒講話佢要ot煮唔切,咁就可以順勢約埋肥西佢地一齊落大排檔,飲啤酒傾心事。

屌,呢個計劃簡直完美。

「okok,定你同伯母講我下次先嚟食飯呀?難得今日齊人,打完機我地一齊去食飯仲好啦。」J鋒講。

我地真係心有靈犀。

「好,最好啦,一於咁話。」

我地約咗兩點鐘維園,因為慣性遲到嘅關係,我同J鋒去到已經兩點半。

都仲係得我同J鋒。

不過都慣,唔係咩叫慣性遲到。

無幾耐之後,肥西登場。

「屌,做乜撚嘢運動呀,直接去打機啦。」肥西嘅第一句對白就係呢句。

「你咁撚肥,跑下啦。」我講。

「屌,啲女都俾佢溝晒啦,仲減肥嚟做乜撚。」肥西當然係指J鋒。

「屌,使唔使介紹啲女你識?」J鋒講。

我個心唔小心跌咗半個出嚟,以為佢係講crystal。

「屌,不了。」肥西講。呢條肥西就係咁撚煩,成日一邊講無女,一邊又怕同女仔相處。

但偏偏同我就好撚夾,可能因為我都係咁嘅人。

「嗰兩條仆街啦?」肥西繼續問。

「未撚死到過嚟呀,我地猜住波先囉。」我講。

今日維園無咩人,都係得嗰小貓三四隻同廢老四五隻,閒日嘅下晝,係屬於廢老同學生嘅時間。

阿輝同阿傑到咗之後,我地連埋其他落嚟射下波嘅後生仔,同班終於湊齊七個嘅廢老展開隔代對決,廢老優勝於我地嘅地方在於有經驗,同埋夠茅,而我地嘅優勝之處就係有氣(除咗肥西),夠跑得,齋放都放甩啲廢老。

經過一場激烈嘅比賽之後,我地大勝班廢老四比一。

雖然我就無入波,不過就助攻兩球俾J鋒,唔知點解,我同佢默契寧舍好。喺踢波同打機嘅時候都經常體現出嚟,我地會喺同一時間做同一個判斷,就好似大家都知道大家會點諗會點做咁。

嗰下快感真係無可比擬。

踢完波沖埋涼之後,就去附近茶記食個tea,成個流程一氣呵成,如果成世都可以咁樣過落去就好…

J鋒向來都係沖涼沖得比較慢嘅一個,當其他幾個已經完成出返嚟嘅時候,趁J鋒仲俾啲水聲遮住緊聽覺,我同佢地講出我嘅計劃。

目的就係喺今晚食晚嘅時候,一路灌佢飲酒,一路將話題帶去點解佢會溝咁多條女到。

輾轉之間,嚟到夜晚,中間食tea打機嗰啲情節咁廢就唔多講喇,直接就戲肉啦!

「乾杯!!!」

我地成班麻甩仔喺大排檔碰杯,真係好撚爽!

「話時話我地幾耐無聚過?」阿輝問。

「都好似成幾個月喇,你班仆街個個都有女,點聚呀?」肥西講。

「you are not alone。」我安慰肥西。

「不過偉哥條柒頭又係唔蒲頭。」阿傑講。

「佢多女呀嘛。」J鋒講。

「屌,邊夠你多。」肥西直入佢中路,nice shoot bro!

「挑~女之嘛,介紹俾你你又話唔要。」J鋒反擊。

果然唔係咁易架,葉師傅!

「其實你咁多女,諗住點收科?」今次輪到阿傑進擊。

「順其自然啦…」J鋒飲咗啖酒。

「飲杯!」我乘勝追擊,焗佢飲多嘢。

呢個時候,伙記上咗第一道菜,椒鹽九肚魚。

有人話,去大排檔嗌椒鹽鮮魷而唔嗌椒鹽九肚魚嘅都係廢柴、係懦夫!亦都有人持相反意見,識嗌一定嗌椒鹽鮮魷咁話。

我就話,真男人一定係兩樣都嗌晒,咁樣送酒先最撚爽架嘛。

「使唔使嗌咁多炸嘢呀。」當碟椒鹽豆腐都上撚埋嘅時候,肥西竟然有怨言?

「喂你肥西嚟架喎,怕條鐵呀?」我講。

「怕你地唔夠食呀,你老味!」肥西講起食嘢,幾撚有霸氣。

不過我都不忘向佢打個眼色,示意佢繼續進擊J鋒。

「喂,食多啲啦,自己食唔飽點餵飽啲女呀。」肥西不愧係肥西,咁都兜到去啲女到。

「其實我唔係條條女都搞。」J鋒講,唔知佢係咪開始醉,我feel到有啲唔同。

大排檔有個氣氛加乘,有時唔覺唔覺飲多兩啖飲急咗就好易醉。

不過聽到佢話唔係條條女都搞,我都有啲好奇。

「crystal?」我問。

「其一啦。」J鋒講。

「邊個crystal?未聽過呢個名喎!」阿傑加把口埋嚟。

「你有邊個名聽過架?」J鋒問返佢轉頭。

咁又係,屌你啲女嘅名唔係一號就二號,唔係二號就三號,都幾難聽過佢地本名。

我都剩係聽過christine同crystal,本來J鋒就係將啲女朋友收得好埋嘅人…與其話係收得埋,倒不如話佢無在意過自己啲女朋友,所以自然都唔會同我地講。

「crystal係最新嗰個。」我幫佢答。

「唔只佢啦,sophie同esther我都未搞過。」J鋒講。

「你五個女朋友剩係搞過兩個?我唔係好撚信呀!」肥西講。

「屌,要你信嚟做咩?我講事實。」

「有食唔食,罪大惡極喎兄弟。」阿輝講。

「屌,我唔係你地諗到咁撚淫賤囉ok?」J鋒講。

我feel到要入正題了。

「咁你溝咁多條女為乜?」我問。

「啲女唔係我溝都係俾人溝架啦,我見合眼緣咪試下一齊囉。」J鋒講。

「咁點解有啲女會搞有啲唔會搞?」阿傑問。

「有啲乖乖女嚟,就廢事啦,christine同ceci本身都player嚟,咁唔差在多我一個啦。」J鋒講。

「你有咁好死?」肥西問。

J鋒又飲咗啖酒,無答到佢。

「咁邊個係你第一個女朋友?」我問。

「唔記得lu…」

「鳩噏啦你。一係我換個問法,邊個係你初戀對象?」我再問。

J鋒又飲多啖酒,睇嚟佢嘅故事,要揭盅了。

Please Login to Comment.