Tinder06

Previous
Next

時間慢慢推移,我同肥婆已經發展咗做得閒傾下偈嘅關係。

我唔知道點樣先叫做溝女,但同肥婆傾偈,其實傾得幾自在。

雖然同阿欣傾偈都好開心,但總係會成日形住形住自己會唔會講錯嘢,或者太鍾意一個人嘅時候,會連自己都望唔清楚自己。

呢段日子返學都會見到阿欣,但關係就當然無可能同以前一樣,而家見到佢我會隔硬擠個笑容出嚟,等佢唔好覺得自己對我有咩虧欠。

兩個字講晒,扮大方。

本來就無咩朋友嘅我,同阿欣疏遠之後,天地堂嗰陣就成日出現形單隻影嘅時候,而呢啲時候,我都會諗起肥婆。

記得肥婆講過佢讀bu,同讀city嘅我係鄰居…

「做緊咩呀?」我打開tinder,諗住撩肥婆傾偈。

「上緊堂呀,落咗堂之後搵你啦。」肥婆秒回我。

我吞咗啖口水,因為而家,我同佢都係身處九龍塘。

「okok」我都即刻覆返佢。

今日天地堂有成三個鐘,我無住hall,聽講city個hall好淫亂,唔啱我呢啲毒撚。

換言之,無咗阿欣嘅我,天地堂就處於一個鳩fingfing嘅狀態,無地方去。

既然肥婆讀bu…

我個腦閃過咗一個唔係幾好嘅諗法,就係打算去bu同肥婆見見面…話晒我個頭都剪咗五舊水,應該夠型。

呢個諗法閃過之後我個心無啦啦跳得勁快,點算好?去唔去好?

肥婆會唔會肯見我呢?見到又講咩好呢?一齊去食個頹tea?

頂我好亂,不過我發覺我身體很誠實,喺苦惱嘅同時已經行出咗又一城,向bu方向行緊。

「喂,如果我話想同肥婆見面,應該點開口好?」我whatsapp問J鋒。

「屌,咪話我想見你囉。」

「咁直接?有無咩方法婉轉少少架?」我問。

之後佢就無撚回到我,屌,朋友喎,兄弟喎…

嚟到bu,我好撚慌張,我係怕同肥婆見面之後佢會失望,定係怕肥婆拒絕我連見都唔見呢?我自己都唔知。

「我落堂喇!」肥婆搵我。

「咁啱嘅?我而家都空堂喎!」我講。

「哈哈,咁我同你而家咪好近囉。」肥婆講。

「係呀,你陣間仲有冇堂?」我問。

「有呀,要等成兩粒鐘,你呢?」

「哈哈,我都差唔多。」

「咁我地咪可以傾好耐偈囉?」肥婆講。

「呃…你啱啱係上lecture定係tutorial?」我問。

「lecture呀,做咩?」

點解我會咁問呢?係因為我前面有一大班人同我迎面相交,lecture落堂多數都係成棚人咁走,我好奇肥婆會唔會喺入面,所以先咁問。

「咁你行緊出campus?」我問。

「係呀,做咩咁問?奇奇怪怪咁。」肥婆講。

即係話,我喺呢班出緊嚟嘅人入面發現肥婆嘅或然率係50%!

「你唔會過咗嚟掛?」肥婆追問我,佢真係好敏銳。

「傻啦!哈哈!點會!我過咗嚟你都唔認得我啦!」因為我無放真樣上tinder。

「咁你係唔係頭dupdup望住部電話?」肥婆問。

屌,我當堂嚇咗一跳,然後四處張望,睇下見唔見到肥婆。

「你點知架?你見到我?」我慌張發問。

「試下你咋!有邊個覆message唔係頭dupdup架?乜你真係過咗嚟呀?」

「散步經過…咪入嚟參觀下囉…」

「咁你知唔知bu喺九龍塘有兩個campus架?你又知我喺邊面落堂?」

「我散步經過啫…經過啫…」我講。

「你想見我?」肥婆問。

「呃…呃…都係嘅…」

「但我唔想同你相認住喎xp」

「哦…喔…好呀…我都係散步經過望望啫…」

「總有機會嘅,嘻嘻~」

「哦…好…」

我企喺bu校園,重新橫掃一次,確認唔見肥婆嘅蹤影之後,有啲失望咁行返city,決定喺上下一堂之前去libra摺陣先。

「你同個女仔點呀?」肥婆問我。

「無呀,咪變咗好似唔識咁。」

「好心你大方啲啦,人地拒絕咗你啫,唔使避開人下話?」

「唔避開佢咁可以點…我好難受…一見到佢就會諗返起之前嘅嘢…有時仲會諗到嬲嬲地…如果仲一直留喺佢身邊,我驚我會傷害佢…」

「點樣傷害?」

「唔知…可能會俾說話佢聽…之類…」我講。

「所以你就索性同佢保持距離?」

「係…我知佢仲願意同我做朋友…但我真係做唔到…」

「唉…睇開啲啦…」

「好彩識咗你。」我講。

「哈哈,其實好多朋友都鍾意搵我傾心事。」肥婆講。

「因為你夠耐性?」我問。

「唔知架,可能我有親和力掛?」

「都係架,咁你呢?你自己有無心事?」我問肥婆,因為呢段日子以嚟都係佢聽我嗔,我從來都無喺佢口中聽過半句埋怨嘅說話。

「點解咁問?」

「因為你俾我嘅感覺係一直都好開心、好樂天咁,所以我會好奇你會唔會有心事、有情緒…」

「um…都有架,不過習慣咗,好快就可以消化,唔會影響我太耐。」肥婆講。

「包括失戀?」我問。

「有啲明知無結果嘅嘢,煩嚟都無用啦,係咪?」肥婆講。

「感覺上你比同齡人成熟。」我講。

「哈哈,多謝喎~」

喺libra拎咗本參考書出嚟裝假狗嘅我一直同肥婆chat,有時仲唔小心笑咗出嚟,我開始越嚟越明白J鋒講嘅嘢。

就算對方係肥婆都好,只要我好投入咁同佢溝通溝通,點都會產生感情,但奈何佢係一個肥婆,無論點我都無辦法鍾意人,呢種既係在意又唔鍾意嘅感覺喺我體內蔓延,我諗我已經逐漸學識點樣拿捏同異性相處嘅距離。

呢個時候,我見到阿欣入咗嚟,一個人。

佢見唔到我,但我一直留意住佢。

佢手上拎住本notebook,聽緊歌,望落無咩表情,面如死灰咁,係唔多開心,定只係唔夠瞓?

無咗我陪佢傾電話傾到兩三點,都係唔夠瞓?

阿欣有個習慣,每晚臨瞓之前都一定會睇蠟筆小新,佢話好好笑,但我一集都無睇過。

就算傾到夜一夜都好,佢都會開嚟睇,所以有時為咗唔好令佢太夜瞓,就算我好想傾落去都好,我都會控制住個話題,留返啲時間俾佢睇完小新就好好瞓一覺。

阿欣望落無咩精神,唔通係同第二個男仔傾到夜一夜?我唔敢諗落去。

點都好,喺我覺得自己可以自然咁同佢相處之前,我唔打算繼續同佢有交流。

咁樣對大家都好。

有時我諗極都唔明,明明有過深交嘅兩個人,點可以無啦啦喺對方生命入面消失得無影無蹤。

但原來有時候,消失,並唔係一種選擇,而係一種折衷。

明知道繼續拖拖拉拉只會構成更大傷害,倒不如唔好再有交集。

不過我放唔低,亦知道自己無可能放得低。

理性同感性不斷喺腦入面碰撞,一方面覺得應該唔好再同阿欣來往,另一方面又好唔捨得。

所以我嘅結論係,走咗陣間嗰堂佢。

天地堂最爽嘅地方莫過於上完天唔上地,雖然我已經等咗一段時間,但而家再決定走堂都唔算太遲。

「喂喺邊?」我whatsapp問J鋒。

「同五號行緊街。」J鋒答。

屌,五號相信就係前排剪完頭髮嗰陣佢當我面搭訕嗰個女仔,果然男人都係貪新忘舊嘅生物,睇嚟一號或者二號就快要被分手。

「陪我。」我講。

「打機?」佢問。

「一個鐘後老地方等。」我講。

「okok。」

所謂老地方,就梗係銅鑼灣I-ONE,我諗呢度唔單只係屬於我同佢嘅老地方,仲係千千萬萬對gay友嘅老地方。

男人嘅友誼,都係喺網吧萌生。

如果你同你老死無打過同一隻game,我敢講,你地嘅友誼係經唔起考驗。

說時遲那時快,我已經嚟到大廈嘅大堂,不過話時話,銅鑼灣真係變咗好多,以前嘅銅鑼灣有好多機舖同網吧,而家執下一間執下又一間,機舖直頭去到碩果僅存嘅地步,而網吧以我所知都係得返呢棟大廈有。

有啲唏噓。

畢竟我嘅青春有好多時間都係喺呢啲場所流連,而家連懷念嘅機會都越嚟越少。

「yo bro~」一出電梯已經見到J鋒,仲拖住條女,相信係五號。

「嗨~」五號同我打招呼。

「hihi。」我都相當有禮貌咁回應。

「佢叫crystal呀,話嚟睇我地打機喎。」J鋒同我介紹佢條新女。

「咁悶都好睇?」睇嚟五號應該相當不滿拍拍下拖個男朋友俾我叫走咗,突登嚟同我示威。

「我都叫佢唔好嚟架喇,佢又死都要跟住。」J鋒口吻有啲責備嘅意味,不過已經相對溫柔。

「咁我都無嘢做,咪嚟睇下囉,你地打咩呀?我都識打機架!」五號講。

「我地本身諗住雙排打rank,你嚟咗咪打ng囉。」J鋒講。

「咁呀…一係我睇你地打囉…」五號有啲委屈。

「唔使啦,好閒啫。」我講。

「咁開位啦!」五號燦放出笑容講。

「你自己開啦,我同佢都係會員。」J鋒講完走行咗入去,我都跟住行入去,廢事喺櫃檯陪佢開位咁尷尬。

我同J鋒坐低之後,五號仲喺櫃檯搞緊手續。

呢個時候,J鋒問我:

「你要唔要試下溝佢?」

Please Login to Comment.