Tinder02
TASK 1：肥婆
「師兄，好揀唔揀揀呢個？」我對J鋒嘅選擇有啲不滿，因為嗰個女仔，身型同中大email差唔多，再肥少少。
「揀過第二個得唔得呀？」我問。
「作為訓練，呢個就啱晒架喇！」J鋒理直氣壯回應。
「點解咁講？」
「你知唔知你衰咩呀？」
「心態？」
「EXACT柒LY！你就係因為太投入同嗰個阿欣嘅關係，太在意得失，所以先會急住要表白，咁咪衰咗囉！」J鋒振振有詞。
「嗱，今次揀件肥婆呢，就係為咗訓練你對待女仔時候嘅心態，試下追佢，你就明我講咩。」佢繼續講。
「哦…」我有氣無力咁回應。
「當你成為一個老練嘅專家之後，再埋嗰個阿欣身，玩殘佢！哈哈哈哈！」
「我只係想同佢一齊…」
「嗱嗱嗱，你又嚟啦！心態！係心態！你要本著報仇嘅決心，咁先易成事架嘛！得咗手之後，你想點就點啦！」J鋒講。
「都係嘅…」
「飛少復仇記，上演喇！YOHO！」J鋒喺夜晚無咩人嘅海旁大嗌，真係好mk。
至於係唔係報仇，我自己都搞唔清楚。
講真，或多或少，我對阿欣都有啲恨意，可能我真係毒撚心態，容易誤會…當個女仔對自己好少少嘅時候，就以為對方都有意思…
腦入面突然之間閃過咗好多同阿欣相處嘅畫面…
幫我抹汗、餵我食嘢、同我搭膊頭等等…
如果咁都係無意思，我諗我呢世都分唔清咩係普通朋友，咩係曖昧，咩係男女朋友…
可能飲咗幾罐啤酒，我越飲就諗得越多嘢…
如果咁樣對我都只係普通朋友，咁即係佢對其他人都係咁樣啦…
即係佢都會同其他男仔傾偈傾到夜一夜，會餵其他男仔食嘢，會幫其他男仔抹汗…
我越飲越多，越諗越多，仲越諗越嬲…
你由始至終到底當我係咩？
乜我真係咁好玩咩？
我用力捏凹一罐啤酒，仲有少少未飲完嘅酒飛濺出嚟。
「女人之嘛，好閒啫！」J鋒安慰我。
「你唔明…」
「我真係唔明呀，呢條女唔得咪下一條囉，我地廿歲仔咋喎，咁快講一生一世咩？」
「…」正當我準備同J鋒發表我單身廿年所得出嘅偉論嗰陣，電話震咗一震。
「hi～咁夜都未瞓嘅？」係啱先match咗嘅肥婆傳嚟嘅訊息。
我望一望個鐘，十二點咋喎。
「咦？主動type嚟喎，易食呀呢個，易食呀！」J鋒瞄完我部電話之後講。
「點應佢好呀？」我問。
「因為等你搵我囉！」J鋒搶咗我部電話疾速輸入。
「咁進取？點解唔保守啲答話瞓唔著就算？」我雖然對肥婆無興趣，但都怕呢個答案嚇怕人。
「睇嘢啦！」J鋒胸有成竹咁答我。
當我成個樣仲係黑人問號嘅時候，肥婆已經傳嚟回應，實在出奇不意！
「咦你都幾口花喎XD！」肥婆回應。
我個問號就變得更加大。
「你想要玫瑰鬱金香定康乃馨？」依然係J鋒繼續操作我個tinder account。
「哈哈！你都幾搞笑架喎！」肥婆秒回。
「啲人都話我似C君。」J鋒答。
「似佢咁矮？」估唔到肥婆你都幾串架喎！我心諗。
「It seems you have a sense of humor！」J鋒有啲九唔搭八咁回應，但何解要轉英文呢？
「You2，haha！」
「我叫阿飛，點叫你好？」仍然係J鋒負責輸入，事關我仲係一頭霧水嘅狀態。
明明match嗰陣都已經show晒名，仲問嚟做乜春？
「我叫lily～」佢又真係答。
「我同個fd喺海旁飲緊酒之嘛，你呢？你又做緊咩？」J鋒答返lily一開始條問題。
「無呀，喺張床到準備瞓覺又瞓唔著，碌下tinder就見到同你match咗～咪say個hi囉～」
正當我十分好奇J鋒下一步點覆之際，佢就熄咗app，俾返部電話我。
「搞咩？仲咩唔覆佢？」我問。
「你真係唔識架喎！啱啱開始chat就秒回，整定俾人食住啦！」
「哦，原來係咁架？」我諗返起同阿欣之間嘅對話，的確我一見到佢嘅訊息就秒回…
咁我在意呀嘛…
「記住，心態決定境界！」J鋒拋出一句所有收佣行業人士嘅座右銘，佢若然去做倫敦金我諗實發達。
「咁我幾時覆佢…又覆啲咩好？」我問。
「大個仔喇，自己揸主意啦！」
「唔係喎，如果一陣衰咗咁點？」我又問。
「呀你真係蠢唔係扮架喎！而家你好想食個肥婆咩？唔係呀嘛！食唔食到重要咩？重要嘅係你要學識點樣控制自己，唔好去在意結果，enjoy the party！」
「哦…好似明明地…」
「試下追佢啦，你諗下，對住肥婆你都咁著緊，點樣追女神呀？」J鋒繼續袋錢入我袋。
「係嘅係嘅…」
「當你唔在意結果嘅時候，你想要嘅結果就會嚟搵你。」佢真係好撚多金句。
「咁如果到時lily真係鍾意咗我，咁點？好似唔係咁好意思喎…」
「話唔埋你到時都鍾意咗人呢？」
「唔會啦…」我肯定。
「一係咁啦，你定時定候cap圖俾我睇，等我覺得你已經具備今次課題要求嘅條件，就同條女好嚟好去，咁得未？」
「咁做真係好咩？」我疑惑。
「屌你男人老狗咪婆婆媽媽啦，呢啲女玩得tinder都唔方認真啦，認真你就輸了！」
「又好似有啲道理…」
「嗱，聽朝瞓醒先好覆條女，就話咩個fd飲到好醉扶咗佢返去，之後自由發揮啦。」
「哦…不過我想問，點解你會用咁樣嘅開場白？唔驚嚇親人咩？」
「係first impression呀！我幫緊你咋飛少！一嚟就俾個playboy形象佢，就算你之後柒下柒下咁，佢心入面都會覺得你係個playboy。」
「你又知人唔介意？」
「條女夜媽媽咁主動去同一條match咗無耐嘅仔say hi，諗都諗到佢發姣啦，況且對方係一個肥婆，平時一定好少match，有機會仲唔食住上咩。」估唔到短短幾句對話，J鋒已經計算咗咁多嘢…
「咁點解明明都show晒名，都仲要自我介紹一次同問對方咩名呢？」我再問。
「係尊重！雖然咁樣做好似好多此一舉，但你咁樣問，對方先會覺得你重視佢！當然啦，唔同女有唔同嘅處理方式，呢個望落都似係嗰類平時容易被忽略嘅類型，所以更加要咁樣做。」
「哦…咁…」
正當我打算問落去嘅時候，J鋒部電話響起，來電顯示係臭雞二號。
「喂？」佢接聽。
「你喺邊呀？做咩唔覆我whatsapp呀？知唔知我擔心你架？」海傍好靜，臭雞二號把聲又好大，所以我都聽到晒佢講咩。
「我喺邊做緊咩使唔使同你交代呀！」J鋒語氣都幾重咁回應。
真不愧係J鋒，我內心暗暗咁佩服咗佢一下。
「咩喎…咁我擔心你呀嘛…」臭雞二號態度擺明軟化咗，聲都收細埋，不過我仲聽到。
J鋒見到我咁好奇，都索性開埋擴音。
「我個fd失戀，我陪緊佢呀。」J鋒答。
「男定女嚟架？」臭雞二號問。
「唔知呢？」J鋒故弄玄虛。
「喂也！快啲講！你係唔係同第二條女一齊！」聽落臭雞二號都幾緊張咁問。
「唔係呀，有你我仲使乜有第二條女呀？」J鋒突然之間好溫柔咁講。
但你明明就入佢電話做臭雞二號…
「算你啦！返到屋企打俾我！」臭雞二號好似冧晒咁講。
「得喇，收線喇。」
「拜拜～」
J鋒連拜拜都無講，就直接收咗線。
高手。
我滿腔疑問，但又唔知點樣開口問好。
「想問咩？」J鋒睇穿我。
「點解要將個名set做臭雞二號呢？」呢個係我最大嘅問題。
「心態呀，係心態！呢種係我對自己嘅自我暗示，令對方喺我潛意識入面被貶到一個最低賤嘅地位，咁樣我喺男女攻防戰入面先可以處於上風！」
「哦…原來係咁…咁…點解係二號呢？」雖然有啲明知故問，但我都想確認一下。
「一號有人，咁佢咪二號囉！仲有三號同四號！」
「你而家同緊四條女一齊呀？」我嚇咗一跳。
「條j生出嚟係要用架！」J鋒拋出自己嘅名言。
「因住虧呀…」
「好似你咁，咪無撚用囉！哈哈哈哈哈！」
「我有用呀…日日都用添…」
「屙尿定打丁呀？哈哈哈哈！」J鋒毫不留情咁恥笑我。
如果唔係同佢識咗十幾年，我真係會打鳩佢。
不過調返轉諗，越熟嘅朋友先可以越無底線咁笑鳩對方。
我同J鋒係幼稚園加小學同學，兼且係鄰居。
細細個開始，老師就對佢寵愛有加，因為生得可愛。
呢個世界就係咁唔公平，就連我老母嚟接放學嗰陣，都會搣佢面豬登同摸下佢個頭。
小學嗰陣即使闖咗禍，老師都以為係我帶壞佢，剩係罰我唔罰佢。
隨住我地慢慢大個，佢輪廓越嚟越深，成個後生版希哥咁。
而我，就連妒忌佢都做唔到。
記得小六嗰一年，班上面嘅女同學情竇初開，圍內搞埋啲咩靚仔選舉。
上至老師下至隔離班，全部俾amy list晒出嚟，俾班女同學投票。
amy可以話係班入面女同學嘅首領，嗰期佢鍾意聽周杰倫，啲女同學就聽周杰倫，嗰期佢鍾意金城武，啲女同學就鍾意金城武。
好簡單，因為amy生得標緻。
其他女同學覺得，同amy鍾意埋同一樣嘢，就會提升到自己嘅格調。
你話無知多好。
起初我以為個投票只係佢搞出嚟過下癮，但就完全無諗過係衝住我而嚟。