Tinder01
「含啦八婆！」當然，我只係心諗。
經過呢段時間嘅訓練，我已經好識得處理女人m到嗰陣嘅情緒，唔會咁易俾佢地嘅情緒影響到自己嘅情緒，所以含啦八婆呢啲衝口而出嘅說話，我係絕對、絕對唔會send出去。
「乖啦，早啲瞓啦，唔好諗太多喇。」呢句先係我實際輸入對話框嘅訊息。
霸氣盡失？你以為啦！啲女就係要氹，就算佢幾無理取鬧都好，你都要好似氹細路哥咁氹佢，當你食晒佢啲脾氣之後，自自然然可以食埋佢。
「你到底有無聽人講架！我真係好嬲囉！你話有咩理由*^%&^$#…」佢似乎仲係一肚火，再一次重覆返已經重覆咗兩次嘅怨言。
「含啦八婆！」當然我只係再一次心諗。
「我梗係有聽你講啦，佢無理由^&%&$%^#^…」我重覆一次佢講嘅嘢以表示我有聽，因為內容太過無謂所以我為大家過濾咗。
「咪係囉…咁人地真係無話錯佢呀嘛！」用「人地」嚟稱呼自己，呢條女都算極品。
「乖啦，早啲瞓啦，唔好諗太多喇！」我重覆一次啱先講過嘅說話，不過細心啲留意，你會發覺我句尾係轉咗用感嘆號，以表示我幾咁著緊佢。
如果你留意唔到，即係代表你係男讀者。
女人都係眉精眼企嘅生物，更何況係同我text緊嘅佢。
「好啦…咁人地瞓喇…」似乎佢都察覺到我嘅心意。
「嗯，早抖喇～」
擾攘一輪之後，佢終於乖乖地收皮，我亦都鬆一口氣。
佢係邊個？佢係我第三個目標，叫yanny。
yanny轟炸完我一輪whatsapp，終於肯去瞓之後，我成個世界靜晒，隨之以嚟嘅係若隱若現嘅罪惡感。
好多想法突然之間浮現…
乜我咁樣做真係啱咩？乜我咁樣做真係有用咩？
我疑惑。
不過既然已經洗濕咗個頭，為咗100％成功，我一定會繼續落去。
更何況，喺呢個弱肉強食嘅愛情世界，唔係你玩人，就係俾人玩。
說服完自己一輪之後，我舒服咗啲。
然後我照例將whatsapp嘅對話紀錄cap出嚟，因為呢樣就係我嘅「課題」。
今次係訓練耐性。
或者你都疑惑，到底發生緊咩事…
咁不如睇落去？
你慢慢會知道，原來男人除咗唔可以窮之外，仲唔可以霉。
所有事都係因為一個女仔而起，事源就要追朔返去兩個月之前…
二零一九年，二月十四日，情人節。
「我一直都只係當你朋友…」眼前嘅阿欣咁樣同我講…
霎時之間我唔識得反應，腦海入面閃過呢段日子以嚟同佢相處嘅各種畫面。
就好似一個臨死嘅人見到嘅走馬燈咁。
當佢話我知佢一直只係當我朋友嘅嗰一刻，我已經死了。
阿欣係我中學同學兼大學同學，由於我地中學嗰班男女圈子都分得幾開咁玩，所以我同佢係大學先開始熟絡。
我揀嗰科比較冷門，喺識嘅人入面得我一個揀呢個系嚟讀，本住識多啲新朋友嘅想法，我join咗細o嚟玩。
我同阿欣中學畢業後嘅重遇就係喺細o，我同佢分埋同一組。
「咦，你係咪philip呀？」嗰陣我同另一個組員傾緊偈，佢突然之間喺後面打招呼相認。
Philip 正是小弟英文名，不過同我熟嘅朋友都好少咁叫我，所以我都load咗load先應佢。
「係呀…你係…阿欣？」
人地話中學畢業同大學入學嘅女仔係判若兩人，我望住眼前嘅阿欣，終於知道呢句說話嘅真確性。
中學時期嘅佢本身已經唔差，喺考完dse之後呢幾個月入面，阿欣染咗啡色頭髮，化咗少少妝，令自己提升咗一個層次。
硬係要舉例嘅話，就係由fyy變咗做桃谷繪里香。
我敢講，如果佢想，一定收到唔少兵。
畢竟呢度係香港，厹何其多。
「係呀！乜你真係philip呀？我仲以為我認錯人呀！你無咩點變喎！」
或者睇緊呢個故嘅你會奇怪，無咩點變嘅我佢又點會以為自己認錯呢？
答案只有一個，就係我喺班上面係極唔顯眼，屬於嗰類畢業後過三五七年之後就算望住張班相都噏唔出名嘅嗰類人。
再簡單啲講即係大眾臉。
A0。
「哦…乜係咩…哈哈…」
古語有云：毒撚最忌有自信。
喺阿欣同我打招呼嗰一刻，我已經響起咗毒撚警號，告誡自己千祈千祈千祈唔好咁易動情。
因為我有預感，會萬劫不復。
「好彩遇到你咋！其實我好怕陌生架！」只可惜阿欣完全無諗住放過我，用盡佢一切女人嘅本能務求要我動搖。
嬌聲嬌氣嘅阿欣簡直無視我嘅絕對防禦，我個心就好似一拳超人入面嘅king開咗帝王引擎咁卟卟卟卟跳，再加上佢情深款款望住我嘅嫣然一笑…
我知道，自己劫數難逃。
細o完咗之後，我已經徹底鍾意咗佢。
可能因為同阿欣係中學同學嘅關係，佢對我都好似有種一見如故嘅感覺，明明中學嗰陣都無乜兩句，但上到大學就好似他鄉遇故知咁。
總而言之，好自然地，我同阿欣變得越嚟越熟絡，大學嘅堂都係出雙入對咁上，喺旁人眼中大概已經一早以為我地係一對？我都唔知。
作為一個不折不扣嘅毒撚，放假只會喺屋企睇新番或者補番嘅我，竟然好似變咗個現充，連我自己都覺得有啲不可思議。
同阿欣開始熟之後，放假會陪佢去做下義工，或者一齊行下山，輾轉之間，嚟到而家。
二零一九年二月十四，情人節，我決定約佢出嚟食飯，而佢都爽快答應。
「點呀，我地去食咩呀？」阿欣問我。
「follow me！」
我帶住佢嚟到一間我一早預約好嘅西餐廳。
「哇！呢度好貴架喎！」
「我請！」為咗呢餐飯，我已經儲咗幾個月錢。
「唔係咁好嘅…不嬲都係aa架嘛我地。」
「唔緊要啦，難得一次。」
阿欣係個好女仔，我一直衷心咁樣覺得。
唔單只唔以貌取人，仲好有愛心。
我同佢喺呢段日子入面，相處得好開心，偶爾傾電話都會傾到凌晨兩三點，講夢想，講未來，講抱負，講興趣。
結果…
「我一直都只係當你朋友…」
就喺嗰晚，我對世界嘅全部認知好似一瞬間崩潰咁…如果相處得咁好都只係朋友…如果閒日會約出嚟睇戲食飯都只係朋友…如果傾電話會傾到夜晚兩三點都只係朋友…
咁我仲有咩好講…
「哈哈…哈哈…哈哈…」我成個腦都空白一片，唔知講咩好，唔知做咩好…
回過神嚟嘅時候，我已經喺海傍隊緊啤酒。
望住個海黑媽媽，一浪又一浪咁起伏，一聲又一聲咁拍打岸邊，我心情先叫好返少少。
可惜個仆街政府拆撚咗皇后碼頭，我細細個最鍾意喺嗰度食住雪糕車嘅雪糕嚟望海…
雖然記憶已經越嚟越模糊，但我都仲記得嗰啖雪糕有幾好食。
政府拆走嘅除咗係一個碼頭，仲係幾代人嘅回憶。
「點呀飛少，煩咩呀？」身後傳嚟一把熟悉聲音。
因為我啱啱表白衰咗，心情好低落，所以就叫咗個老死嚟陪我，唔知係唔係大多數毒撚身邊都總有個mk朋友呢？
而佢，就係我身邊嗰一位。
佢叫J鋒。
並唔係因為佢英文名叫jay呀，jason呀呢啲原因，而係因為佢有一句口頭禪。
「條j生出嚟係要用架！」
就係咁，我地都叫佢J鋒。
飛少係我個花名，因為我叫philip，起初佢地都叫我飛仔，但我唔鍾意，後來改下改下，就改咗做飛少。
明明係個毒撚，但有個咁mk嘅花名，我自己都唔係咁好意思，不過點都好過叫飛仔。
「我失戀。」
「下？幾時嘅事？你有拍過拖咩？」J鋒一面疑惑，順手拎咗我一罐啤酒開嚟飲。
「同個女仔曖昧咗好耐…啱先表白衰咗…」
「有啲咁嘅事？講嚟聽下！」
就係咁，我將我同阿欣嘅事講晒俾佢聽。
「你知唔知你衰咩呀？」J鋒問我。
「咩？」
「你衰在太有自信呀！」
屌，我又係失策，要聽到第二句先知佢扮緊江華。
「唉…」
「講下笑啫，你好鍾意人咩？」
「係掛…」
「想唔想翻啅？」
「都無啅過…」
「你知唔知你衰咩？」
「又嚟？」
「衰心態呀！你咁嘅心態，點會溝到女呀！」
「咩心態呀？」
「溝任何女之前，你都要覺得自己已經啅咗佢，咁咪無包袱囉！」
「咁深？」
「大把嘢有排你學呀！拎部電話出嚟啦！」
「嗱。」雖然唔知佢想點，但我都照做。
「我幫你裝個tinder，你慢慢學啦！」
「咁易match到咩…我唔係你呀…」
「嗱嗱嗱，就係你呢種心態！未試過就覺得唔得！拎你表白嘅勇氣出嚟！再講，無人叫你用個樣做相架嘛！塞夠九張風景相，啲女實覺得好奇！信我！」
J鋒有意無意咁暗串咗一下我個樣唔得。
「咁你幫我搞啦…」
「嗱，買埋個premium plan，等有女like你我再幫你揀。」
我真係由衷地覺得J鋒畢業之後應該去做保險呀，倫敦金呀，健身教練呀之類嘅職業，啲伏嘢由佢把口講出嚟唔知點解變到好有說服力。
我胡里胡塗就俾撚咗錢。
有一剎那我仲以為，佢係想我出錢俾佢溝女。
說時遲那時快，佢已經幫我開咗account，仲揀咗九張九唔搭八嘅相做profile pic，而我地就繼續一路飲酒。
無幾耐已經有幾個人like咗我，我拎住部電話，感嘆咗一下：如果你地知我咩樣，仲會like咩？
「而家點搞？」我問J鋒。
「睇過…唔…唔…就呢個啦！」J鋒碌兩碌之後幫我like咗其中一個。
我望一望對方張相…心諗：唔撚係掛？