第二十四章

Previous
Next

回到雁婷家中,她拿著電話在床上輾轉反側。

「你頭先講得好大聲架喎?」我嘗試刺激她。

「咩喎,我諗緊電話講定係當面講之嘛!」

「梗係電話約佢出嚟,當面講啦!」我說。

「…我唔係好知點開口…早排我先大聲咁喝完佢…叫佢唔好煩我…」

「同佢解釋清楚囉!」我說。

語音剛落,雁婷便連忙拿起電話按下一連串號碼。

就在這時,窗邊傳來第三把聲音…

「嗨,我係導領。」不知道什麼時候開始,窗邊倚著了一個少年。

我吃了一驚,連忙看過去,一臉茫然。

「你係…?」我開口問。

「我係導領。」

仔細一看眼前這個少年的身體,和我一樣呈半透明狀態,只是透明程度沒我那麼高,比較像是一個實實在在的人。

「你係嚟…做咩?」我問。

「帶你走。」他說。

「帶我走?」

隨即他便舉起手,用戴在手上的戒指指向我和雁婷纏繞著的那條麻花狀的「尾巴」,然後麻花狀逐漸鬆開,我找回了自己的雙腳。

我和雁婷的連繫解除了。

「無錯,走喇。」他說,並再次舉起手來。

「咪,咪住先,做咩咁突然?無啦啦好地地做咩走?走去邊?」我一頭霧水。

「唔準走!唔準帶走佢!」雁婷也在旁邊阻止。

「咦?你見到我地?」導領似乎有點意外。

「係,佢係我嘅守護靈,唔準你帶走佢!」雁婷大聲說道。

「奇怪喇,唔通你有陰陽眼?但如果有陰陽眼,應該會有埋能力…如果有能力,應該就會一早解除靈體同自己嘅連繫…奇怪…」導領一連串地自言自語。

「你快啲走啦!唔好帶走佢,你快啲走!」

「唔通,你試過死過返生?」導領像是想通了什麼一樣地說。

「係又點呀?關唔關你事?你再唔走我報警!」雁婷說。

「冷靜啲先,我係導領,係負責帶走滯留人間嘅靈體,所以,佢係一定要跟我走…」

「我滯留咗三年幾喇喎?你而家先嚟?」我問。

「三年幾咁多?我係今日先收到訊號…」他說。

「訊號?」我疑惑。

「隻戒指會話俾我地聽邊度有滯留嘅靈體,你嘅訊號一直斷斷續續,一開始出現嘅時候係喺塔門,仲搞到我過咗去一轉但搵你唔到…」

「即係話要搵到我需要滿足一啲條件?」我問。

「聰明,以我估計就係情緒波動。」他說。

「但我返到嚟之後,都已經平靜返好多喇喎…」

「仲有一種叫共嗚波動。」他說。

「即係有人因為我產生劇烈情緒波動而令我俾你個雷達感應到?」我問。

「類似,又唔完全一樣,解釋起上嚟有啲複雜…因為一定要係心意互通嘅兩個人先做到共嗚波動,至於點解三年幾嚟我都收唔到你嘅訊號,呢點我都唔知…」他說。

而我則晃然大悟。

「既然我都滯留咗三年幾,即係我對呢個世界無影響啦,我想繼續留低…」我說。

「唔得…如果我唔帶走你…我會灰飛煙滅。」他說。

「即係話你有絕對嘅能力帶走我?」我看著他的戒指問。

「無錯。」

「有無寬限期?」我問。

「三日。」他說。

「好,一言為定。」我說。

三日嗎…

「唔好走…你唔係話過你唔會走嘅咩…應承過我嘅嘢點可以做唔到…」雁婷紅著眼睛說。

「…我都唔想走…但係…佢似乎係有能力帶我走。」我指一指從麻花狀變回正常形態的雙腳。

「而家算點喎!謬謬然出現,失驚無神就話要走!又話屋企人?又話陪住我?你講大話!你講大話!」

我無言以對…

為什麼那麼多說過的事,到最後都是做不到呢…

無論生前…死後…

當知道自己只剩三日限期,又回復自由身的時候,腦海中閃過想要去看看心渝的想法。

然而眼前的雁婷卻是這般模樣,實在使我不能放下心來。

「你走呀!你走呀!我唔想見到你!你快啲走!」

和她相處了四個多月的時間,又怎會不知道她是口是心非。

「我唔走…呢三日我都會陪住你…」

想不到那位自稱導領的少年出現的時機那麼不適合,偏偏要在雁婷致電家樂的時候出現。

「我唔使你陪呀…你想去邊就去邊啦!我唔要見到你!」她埋首於被窩之中。

看來雁婷也察覺到當我的雙腳回復正常的時候,我便和她失去了聯繫,我的靈體已經不受她的拘束,可以自由移動。

我沒有回話,仍然站在她那若大的房間。

燈光透過了我的身體,灑滿地上,灑滿房間的每一個角落。

我卻未能化作光,填滿她心靈的黑洞。

「你仲喺唔喺度…」過了良久,雁婷開口說話。

她的面一直埋著,沒有看我一眼。

「喺度…」我說。

「你仲喺唔喺度…」又過了良久,她又再問一次…

「喺度…」我答。

她緩緩坐立起來,掃視了房間一眼。

「我知…如果係你…一定仲喺度…」雁婷說。

我如同晴天霹靂,難道…?

「你一定喺度諗,我係唔係已經見你唔到…係呀…我已經見你唔到喇…當你對腳變返正常,你就越嚟越透明…越嚟越透明…我已經見唔到你…已經聽唔到你講嘢…」她邊啜泣邊說。

「我知你仲喺度架,係咪…」她再掃視了房間一眼。

「窗邊?」

「衣櫃隔離?」

「電腦檯上面?」

「我知你仲喺度架…」

「係呀…我仲喺度呀…」我無奈地說…

原來鬼魂,也會分泌出眼淚。

一滴一滴,滴落在虛空之中消失不見。

「如果你仲喺度…你走啦…唔使擔心我…用剩低嘅三日時間,好好陪住心渝,佢先係你最重要嘅人…我唔想你死咗都後悔…」

我再一次無言以對。

為什麼這個世界,那麼多事未能如願,又有那麼多事,要折磨人心…

我不過是死了而已…

死了後好好往生不行嗎,偏偏要再闖進別人的生命…

都算了…為什麼我連留下來的資格都沒有?

為什麼我連想陪著一個人的資格都沒有…

「呢四個幾月,好多謝你…我瞓喇…你真係可以走架喇…唔使理我…就算你想理…我都唔知你理緊我…所以…唔好嘥時間喺我度喇…」雁婷說。

我沒有離開,仍然留守她的床邊,靜候她進睡。

現在才晚上八時多,她卻說要進睡…

這個傻瓜…

不過,她也累了吧…

當雁婷傳來深沉的呼吸聲後,我才終於離開。

事隔三年,終於重獲自由,第一時間當然是回家探望一下兩老。

我是家中獨子,要讓他們白頭人送黑頭人,實屬不孝…

我走了以後,他們一定都很寂寞吧…

拿回雙腳之後,我就和平常人一樣走動,不過卻是一個沒有觸感的世界。

就在我穿過牆壁的一刻,我心中起了一個疑惑。

既然我可以穿牆,為什麼地板不可以?

意念一動,我整個人便透過了原本踏著的地板,直穿到下一層。

我有一個假設,就是鬼魂狀態下能做到的事和自己的認知有關。

當我認為穿透可以應用於地板的時候,便能穿透地板。

所以我從二十三樓一舉穿到地面,然後由寶馬山飛奔回家。

其實,即使回到家又怎樣呢…

如果看見他們死氣沉沉,愁眉苦臉…我又能怎樣呢?

既不能讓他們得知我死了後都安好,更不能讓他們看見我…

算吧,還是先去看看。

鬼魂移動的速度比人快,兩三步便跨出一大段距離。

大約晚上九時多,我回到大廈的大堂。

雖說下來的時候可以穿透,但爬上去就要一步一步…

我家住十九樓,還好死了後不會消耗體力。

回到家門前,我看見不可思議的一個畫面。

心渝正站在我家門前,而兩老正在送別她。

「打搞晒喇世伯伯母…」心渝有禮地道別。

「打咩搞吖!多啲上嚟陪我地食飯!」我媽說。

「係嘅係嘅,咁我下星期再嚟就whatsapp伯母你。」心渝說。

「好好,我煲定靚湯等你!」

「咁下次見,拜拜~」

想不到,一回來就讓我看見這一幕。

我滿腦子疑惑,因為我生前從未介紹心渝給我父母認識,而她亦從來都沒有上過我家。

所以是為什麼呢?

我沒有跟著心渝離開,因為我知道她家住的層數,雖然不知道確實的單位,但只要每個單位都闖進去就可以了。

我回到自己的家中,兩老看上去比記憶中的他們蒼老了不少。

心,莫名地隱隱作痛。

「呢個女真係乖,成三年幾啦,都仲係時不時嚟探我地。」我媽說。

「呢種女仔,而家好難得喇!」我爸說。

對呀,我也這樣覺得…

所以為什麼心渝會這樣自然地來我家和你們吃飯呢?

「仲記得喺靈堂,佢仲喊得勁過我同你,真係陰功…到底阿仔前世積咗幾多陰德,今世先識到個咁樣嘅女仔…」我媽說。

「一直都無話聽阿仔有拖拍,點知要到佢去咗先知佢收埋個咁好嘅女朋友…」我爸說。

女朋友?

心渝不是我女朋友呀…

我們還未互相確認關係…

「係囉…真係幾生修到…」我媽說。

我雖然仍然一頭霧水,但大概整理出一些思緒。

心渝和我父母相遇大概是在我的喪禮上,心渝哭得死去活來,我父母好奇之下前去搭話,然後便成為了今天的關係。

問題是…中間的過程…

我父母是熱情好客狂熱分子,當看見心渝泣不成聲,即使自己也在傷心,也會因為好奇而走上前慰問心渝和我的關係。

如果心渝只是回應朋友,似乎不至於構成現在的狀況。

所以我猜測,心渝當時應該說了她是我的女朋友。

我暗爽了一下,然後再失落起來…

我真的…很想作為她的男朋友,再作為她的丈夫走完這一生…

「多得佢,我地呢幾年先無咁難過…」我媽說。

「係呀…不過阿女佢似早都會搵男朋友…佢條件咁好,一定好多人追…到時我地都寂寞得多喇…」我爸說。

「咁好嘅女仔,唔可以入門做新抱…真係可惜…」

「喂女人,不如我地…?」

好的好的,到此為止了,我要去看心渝了。

我媽和我爸是青梅竹馬,聽說他們中學時便開始交往,大學畢業後直接結婚,大約在廿三歲之齡便誕下了我。

以現今社會的醫學水平,現在他們仍然有心有力。

所以,我還是不打搞了。

趕緊去找心渝吧。

Please Login to Comment.