第八章
不消一會，心渝便到達了。
T恤牛仔褲，永恆的經典配搭。
簡單，不過脫俗。
在麥當勞的座位上坐著，不難發覺多位經過的男士投來的豔羨目光。
不過只可惜，我和她並不是因為男女之間的約會而來。
「我啱先改到呢到，諗住去到呢到就完呢一段，之後可能會跳咗呢部份佢…」我向心渝解說我的工作進度。
「哦哦…哦哦…」她邊聽邊點頭，並一邊把側面的頭髮撥到耳背。
「咁你可以開始做呢到，我搞埋手頭上嗰啲就可以分嚟做。」
「好呀，你食唔食雪糕？我請！」心渝笑著對我說。
「咁好死？」
「咩呀！當多謝你唔得嘅？」
「你講咗多謝啦！」
「唔食咪唔食囉…」她抿起嘴來。
「食！食！我要朱古力味多醬多花生！」
「我請，就梗係你去買啦！」她在口袋拿出一張二十元。
「咁你食咩？」
「一樣吖唔該！」
我走到櫃檯，要多了一個大薯條，因為雪糕和薯條的關係就像豬大腸與屎一樣，密不可分。
「嘩你個黎淅言，嗌埋薯條喎！」
「係我請返你食架！」
「算你啦！」
「嗱，找錢。」
「唔該～」
然後我便邊用薯條點著雪糕吃，邊開始手頭上的工作。
「你唔食薯條嘅？」我問心渝。
「費事整污糟隻手…同本簿…」
我因而察覺了心渝一個習慣，就是她寫字的時候會用點力按著簿子，一筆一劃寫出秀麗的字。
而我則是狂草派，單手寫字兼按簿，另一隻手則可以空出來吃薯條。
「咁樣…好好食架？」她問我。
「你唔好同我講你未試過薯條點雪糕喎？」我十分、十分驚訝。
「嗯…因為原本就好少食麥當勞…就算食都係嗌一個餐就飽，又或者好似咁樣淨係嗌杯雪糕當飯後甜品食…」
的而且確，以女生的食量來說，實在鮮有像我和子華他們一樣，叫一個餐還要加大加雪糕。
「嗱。」我很自然地拿起一條薯條，深深插入我的朱古力雪糕，然後遞到她的嘴邊。
「唔該…」心渝的臉漲到好紅好紅，但還是吃下我「餵」她的薯條。
她吃完之後滾大眼珠定晴看著我，彷似讚嘆著想出這配搭的我。
我還以為雪糕配薯條是常識呢…
被她漂亮的眼晴盯著，任誰都撐不過五秒，我尷尬地低下頭繼續工作，並順勢拿多一條薯條點雪糕遞給她。
一條又一條。
這個晚上，我的右手做著最枯燥的事情，左手則做著最幸福的工作。
直到十時多，我們已完成了多份講稿，以剩下的日子來看，進度絕對趕得上。
「好嘢！就做到呢到先啦！」她說。
「嗯，咁樣就差唔多搞掂，嚟緊班會大家排一次就ok。」我邊說邊收拾桌上的東西，準備離開麥當勞。
「真係、真係好彩你肯幫手咋！」
「傻啦，就算我唔幫手，你叫到，大把男仔報名啦。」
「點解？下個星期有兩個test，我諗好多人都要溫書。」
她真不會沒自覺到這個地步吧…
「當我無講過…哈哈…」
「同埋唔係個個好似你咁叻架嘛！」聽到她讚我不其然有種飄飄然的感覺。
「唔係吖，阿軒、澄渢嗰啲都好叻，我只係識讀死書啫…」
「講起澄渢，你覺得佢點？」心渝問我。
雖然我知道她沒有那種意思，但在我面前問我對其他男生的意見，實在有夠難受。
「靚仔…聰明…多朋友…受歡迎…畫畫好靚…」我實話實說。
說真的，如果硬是要將我和他拍在一起比較，我覺得他比我優秀很多。
「我唔係問呢啲呀，我係問你覺得佢對詩雨係點？」心渝補充。
「聽講佢地由細玩到大，詩雨就好明顯鍾意澄渢啦，澄渢就…有啲睇唔透，但應該都係鍾意詩雨，不過用錯咗方式表達。」我說。
「我好羨慕佢哋嘅關係呀…青梅竹馬…詩雨仲成日水水、水水咁叫佢，好sweet。」
「但佢地無一齊喎，咁都sweet？」
「你唔覺得，可以叫一個人花名，代表兩個人嘅關係好好咩？」
「我就唔想俾人叫我花名喇…」我說。
「點解？咪住先，你有花名？」心渝雀躍地問。
「唉…細個呢…我成日病…小學成日都返唔到學…」我欲言又止。
「所以？」她興奮追問。
「所以啲同學會叫我黎sick言…或者sick sick言…」
「好cute呀！哈哈！」
「唔cute囉…根本就係欺凌！」
「話唔定係你聽錯，佢地係想叫你sick sick完呢？」
「咁你呢？你有無花名架？我可以叫你花名架喎！」
「無呀，由細到大都係叫心渝，況且我好鍾意呢個名。」
「點解？」
「個名就好似爹地媽咪同對方示愛咁…此心不渝。」
「好浪漫…」說著說著，已經走到心渝的住處。
「咁我返入去喇，聽日見啦，sick－sick－」她說完便轉身就走進去，不留給我回話的餘地。
那天之後，她比起「淅言」，更常用「淅淅」來喊我，後來「淅言」這稱呼更加絕了跡。
而我每次喊她雖然都是心渝，卻多了一層意思。
此心不渝。
那次早會演講雖然發生了點小意外，但卻以意想不到的成功來結束，而我和心渝的關係亦邁進一大步。
後來到了調位的季節，我還被調到和她坐在一起。
「淅淅早晨～你真係日日都咁遲先返學架喎！」調位後的第一個早上，我在鐘聲響起之際施施然回到班房。
「咁你就知之前我起身起得幾辛苦！」
「所以發晦氣？」心渝時不時還會拿我那次在電話發她晦氣來揶揄我…
「我無心…」
「咁你記住，你以後都差我一樣嘢！只要我一日唔發返你晦氣，你就始終都係我債仔！」
「係嘅大人…」
其實我不只一次，覺得心渝也喜歡我，然而她就是對所有同學都那麼親切的人，如果我覺得自己是特別的一個而向她告白，很難說我會不會因此破壞我和她現有的關係…
每個不去告白的人，大概都是太怕失去。
不去擁有，就不會失去。
這是千古不變的法則。
自從和心渝成為鄰座之後，我和她的關係發展一日千里，卻在千里之處停滯不前。
有時候在課堂上，我不小心踩到她的腳，她便會狠狠地踩下來報復，我又會不甘示弱地踩回去，來回好幾轉…
有時候課堂比較沉悶，我就會在她的書本上寫字撩她，或者和她玩起文字版的接龍來。
也許，是因為相處得太好，才令我對表白這回事更加卻步。
和她坐在一起的日子過得很快，我們班每三個月就調一次位，而三個月之期轉瞬就到，不過班主任是位開明的老師，只要兩位同學共同向他提出要求，他就會把提出要求的同學安排到鄰座。
問題是，我要怎麼向心渝開口，而她又會答應嗎？
不記得看過的哪一本書這樣說，如果想讓女生答應你一件事，就和她打賭吧。
那個時候適逢陸運會，所以…
「如果我拎到金牌，你可唔可以繼續同我坐？」我問。
「咁咪好益你？」心渝說。
「係架，驚呀？」
「你拎到先算啦，哈哈！」
就這樣，我再一次為她賭上我的全部。