第十一章
我嘅世界，就係我眼前嘅全部。
我對眼就好似較咗大光圈嚟睇嘢咁，只有kathy處於世界中心，其他嘅景觀都係灰濛濛。
「你覺得，一對情侶，好似朋友咁樣係唔係一件好事？」kathy問我。
我唔明佢嘅意思。
「乜唔係所有情侶成為情侶之前，都係朋友咩？正路嚟講……」因為我唔排除有啲人喺蘭桂坊企完一晚之後會變情侶。
「係嘅……但係，如果因為一時嘅心動而成為情侶，成為咗情侶之後又做返普通朋友會做嘅嘢，除咗平時拖吓手，攬吓錫吓之外就無其他，你覺得咁樣好唔好？」
「無話唔好嘅……咁無可能確保心跳嘅感覺會持續一世架嘛……」其實我都答得有啲九唔搭八。唔明自己點解當時會咁樣講。
「咁你認為某啲老人家係點樣走到白頭到老？」kathy繼續問。
「呢層可能真係要問佢地先知喎……可能佢地經歷過好多嘢掛……我諗到左咁上下歲數，兩個人之間就唔存在愛情架啦，好多男人都係貪新鮮，見一個愛一個，無論幾多歲嘅男人，都鍾意十六歲妹妹仔，所以要行到白頭到老，好難。」
「咁你呢？」
「我？做咩無啦啦講我呀，哈哈……」唔通我又話你知，我鍾意你咩。
「你試過鍾意一個人鍾意幾耐？」kathy問。
令我諗返起阿欣。我到底鍾意咗阿欣幾耐呢？我自己都唔清楚。
因為我搞唔清楚我係由邊個位開始鍾意鍾意佢，而唔係鍾意佢。
「呃……幾年掛……」我是但答。
「幾年……如果嗰種心跳嘅感覺，可以持續到幾年……咁之後又會點樣發展落去？」kathy帶點自言自語。
「呃……細水會長流嘛……唔一定每個人都轟轟烈烈嘅……」
「我男朋友好鍾意行山。」
卟卟！
佢無啦啦掟呢個說話出嚟，令我個心狠狠跳咗落大東山。
「係咩……」我執返個心之後講。
然後kathy開始講佢同佢男朋友嘅故事。
其實，我唔想聽。
kathy講完之後，我已經唔記得咗佢講過啲咩。
人嘅腦部係非常奇妙嘅一樣嘢，可以令人選擇性失憶。
我剩係記得，當時一路聽，一路哦。
哦，哦，哦，哦，哦，哦，係呀，咁呀，哦……
大概係咁樣嘅反應。
我唔想知道佢同男朋友之間存在咩問題，亦都唔想知道佢同佢男朋友之間嘅經歷。
我剩係知道，我遲過佢男朋友認識kathy呢個人，令我失去咗一個公平競爭嘅機會。
下一個想法係：哪來的自信。
為咗戲劇效果，kathy男朋友嘅一切我暫且喺度留白，日後再交代。
重點唔係佢男朋友有幾有錢有幾靚仔，現實中邊有咁多白馬王子，重點在於，即使佢男朋友並無特別優秀嘅條件都好，佢都係kathy心目中嘅白馬王子。
喺kathy嘅神情中，透露咗一件事，就係佢好鍾意佢男朋友。
一段時間之後我先知道，強如老細想追kathy，都慘遭檸檬禮待。
而我，只係角落嘅一朵殘花，仲未來得及盛放就枯化。
如果呢個世界所有嘅花，喺凋零之前都會狠狠咁盛放嘅話，咁就唔會存在咁多遺憾。
最慘嘅係，連一個表演舞台都無，就要黯然離場。
咁樣，就係人生。
嗰次行完山之後，我同kathy之間多咗種奇怪嘅氣氛，有別於曖昧。
可能佢同我分享咗佢嘅秘密，甚至乎，我可能係第一個聽佢講秘密嘅人。
以往喺公司，當我眼神喺宇宙中飄浮之際遇上佢眼神嘅時候，佢多數都會微微一笑點點頭。
依家，佢嘅視線會先逃離0.17秒再返轉頭對我微笑點點頭。
反之，我就越望越起勁。
之前偷望佢俾佢發現的話，我都會因為心虛而移開目光。
依家我放棄左治療，已經唔介意佢知唔知我偷望佢。
每一次望到佢望返嚟，我都會拚死咁望，一路望，一路諗呢個咁完美嘅女仔已經名花有主，就會理直氣壯咁覺得，我既然只有望嘅權利，就一於起勢望。
終於望到佢眼神逃避我眼神。
如果愛意可以用眼神嚟傳達，我諗，佢已經辭左職。
因為我對佢嘅愛無異於一個痴線佬。
同一個望落相處落都正常嘅痴線佬一齊返工，無人會頂得順。
「我塊面有污糟嘢？」kathy whatsapp問我。
「你開電話內鏡頭睇吓咪知。」我回覆。
kathy個白痴妹真係開左電話相機內鏡嚟照，難以置信嘅係一個女仔連鏡都唔帶出街。
不過講開又講，kathy平時真係唔化妝返工，可能因為份工唔洗點見客，又或者佢覺得佢唔化妝已經夠靚。
總而言之，後生嘅女仔真係無敵。
順便一提，我真係好鍾意嗰啲近乎唔化妝出街嘅女仔。
素顏先係皇道。
所以，kathy真係我夢中情人。
屌，講完咁撚多，都係帶出我到底有幾咁鍾意佢，講咗兩萬幾字都仲係形容緊我幾鍾意佢，真係對唔住。
但我真係好鍾意佢。
而我又真係因為佢，作出咗改變。
「無污糟嘢喎！」
「我想玩下你之嘛！」
「（嬲嬲emoji）」
我地用whatsapp，搭通咗140cm嘅距離，亦係我張檯同佢張檯之間嘅距離（大概啦）。
呢種情況，持續咗一段時間。
喺某一個早上……
「我幫你買埋早餐？」kathy whatsapp問我。
「餐蛋治。」我答。
kathy用輕盈嘅腳步喺我檯頭放低咗份餐蛋治，殘留住清新嘅體香。
我咬嘅每一啖，都洋溢住幸福嘅感覺，一種欺騙自己大腦後得返嚟嘅幸福感。
喺某一個下午……
「今晚等埋我先走，去大排檔。」臨放工前kathy whatsapp我。
「好呀。」我答。
我地之間whatsapp變得越嚟越自然，彼此之間亦多咗種默契。
我唔會再因為藍tic無回覆而不安，唔會因為話題突然終結而糾結。
一切都，好舒服。
喺某一個lunch time前十五分鐘……
「我喉嚨痛，幫我買得果定。」kathy叫我。
「叫咗你咪嗌咁多煎炸嘢！」
「好食呀嘛。」
「洗唔洗食藥呀？」
「唔洗掛，喉嚨少少痛者。」
「唉，都係咪喇。」
因為佢地做創作要度橋，所以經常都會嗌外賣，而我就多數一支公出去覓食，而嗰次，佢地似乎大比數通過叫雞，即係21800000。
嗰日知道kathy喉嚨痛，我一放lunch就衝出去，幫佢買得果定，清熱酷同埋米線，然後衝返公司。
一來，廢事kathy頂唔住誘惑食咗炸雞，二來，廢事佢頂得住誘惑但都無啖好食。
我唔知我嘅行為係出自咩原因，或者我咁樣做，只係滿足自己想對佢好嘅心理。
正如佛洛依德咁講，我嘅行為，只係不斷地揉合原我同超我，並喺中間搵一個平衡。
我嘗試咁樣說服自己。
唔知邊位舉過一個例，用嚟簡單解釋咩叫原我同超我。
佢用咗西遊記嚟做例子，唐三藏就係超我，一種究極嘅自我規範；
而豬八戒就係原我，一種究極嘅自我放蹤。
唔知我有冇理解錯，我嘅理解係，無論係邊兩種走向極端，都對身體唔好。
為咗我嘅身體著想，我即使知道kathy有男朋友都好，都無可能離佢三萬五千八百公里遠，又唔同佢傾計，亦都唔同佢一齊放工，我做唔到。
但我亦都唔可以太過主動，唔可以晚晚纏住佢傾計，亦都唔可以講啲冧佢嘅說話。
我只可以，喺佢唔開心嘅時候問句：「你ok呀嘛？」，然後等佢答句：「嗯。」
喺佢喉嚨痛嘅時候，幫佢買得果定。
喺佢作感冒嘅時候，沖杯感冒茶。
喺佢嚟m嘅時候，幫佢入個暖水袋。
亦只可以喺想約佢出街嘅時候，撳delete掣刪返已經喺whatsapp打好咗嘅一段嘢。
不多也不少。
我地嘅距離，好微妙。
佢會搵我，我會搵佢，但我地唔會flirt嚟flirt去。
似係好朋友，但又有別於好朋友。
有時候我都有少少迷失喺呢段關係上面，唯一解釋係，佢feel唔到我對佢有嘢，而又真心覺得我係佢嘅一個知己。
畢竟，我都叫行過入佢內心世界。
所以，我都樂於扮演佢心目中認為嘅「我」。
如果我地之間咁樣嘅相處會令佢開心，咁又何妨呢。
只要我唔表白，我呢個平凡人，就多咗一個用處，就係令佢開心。
我無同kathy講我因為佢而改變咗啲咩，呢點亦都仲未向睇緊呢個故事嘅你地交代。
其實，我真係為咗kathy呢個人，努力作出改變。
首先，我跟阿樂條死剷去咗學打拳。
柔軟度只有6嘅我，學呢味嘢真係攞嚟賤。
不過，我依然心甘情願踩咗落呢個伏到。
講真嗰句，學拳嘅理由好單純，就係因為kathy靚。
我怕有朝一日，kathy俾人調戲，我保護唔到佢。
如果連自己心愛嘅人都保護唔到，咁樣仲有冇資格去深愛？
我可能，窮一生氣力都無可能成為到一個襯得起kathy嘅人，但係，我想成為一個有資格愛佢嘅人。
愛一個有男朋友嘅女仔，需要意志力同精神力，而我相信，打拳可以幫到我鍛鍊呢兩樣嘢。
除此之外，精神力同意志力都可以幫我去實行另一種改變。
就係賺錢。
阿樂條仆街，係一個投資專家。
而我，係一個對投資咩都唔識嘅人，咩嘢牛熊窩輪期權期指對沖基金呀，我全部都唔識，我為咗賺錢，我決定跟阿樂學。
「拿，保力加通道呢，之係咁咁咁……」
「隨機慢步指數呢，之係用嚟睇……」
「相對強弱指數呢，之係俾你參考……」
「移動平均線呢，就可以咁睇……」
「……」
阿樂好用心咁教我，我都好俾心機咁學。
我希望賺多啲錢，可以偶爾請kathy食一兩餐大排檔，嗌多隻炸子雞餵飽佢。
當你望到自己鍾意嘅人流露出滿足嘅表情，唔知點解，都會得到快感。
「今晚？」我whatsapp問佢。
「今晚約咗佢呀(伸脷emoji)」kathy回覆。
「好啦，玩得開心啲～」
kathy所講嘅佢，當然就係佢男朋友。
而我回覆嗰句句子後面嘅嗰條蛇仔，埋藏住我嘅肝腸寸斷，不過，天真如kathy，一定以為我係真心凳佢高興。
痴撚線。
我嘅潛台詞係，咪飲咁多酒呀！
不過，我又有咩資格咁講？