Tinder15
嗰晚J鋒始終都係無講到自己嘅故事出嚟，剩係講咗句：「我唔記得喇。」就含糊帶過。
作為兄弟，見到佢成副屙屎唔出咁嘅樣，都唔好意思繼續逼佢。
或者呢個故事佢唔想分享俾任何人知道，等個故事剩係屬於佢同嗰個女仔。
所以，呢晚之後，我決定唔再嘗試去試探出佢嘅回憶，因為我知道，佢回憶中嘅嗰個人，比我地咁多個兄弟加埋都重要。
食完餐飯之後，我同J鋒搭同一架車返屋企。
佢飲咗好多酒，平時都比較有節制嘅佢，而家竟然飲到臨近斷片嘅狀態，成個人鳩下鳩下咁喺度fing，好彩佢係我鄰居，如果唔係都唔知幫佢call一號二號三號定四號嚟送佢走。
終於送咗佢返屋企，我直接一嘢就撻咗佢上床，幫佢敷條熱毛巾就鬆人，玩咗成日，我都好撚攰。
仲記得J鋒第一次同我講佢拍拖，係喺中六嗰年暑假，詳情係點佢就無講，純粹係通知我一聲咁解，嗰次之後佢就無再同我講過佢拍拖嘅事，所以我一直都唔知佢有幾多個女朋友，飛過幾多條女，又溝返幾多條女…
仲記得J鋒上一次飲到咁醉，係中五嗰年暑假。嗰陣我地仲未成年，但佢就喺某一日叫咗我去佢屋企飲酒，雪櫃有成打藍妹…
「嘩，你點撚樣買返嚟架？唔check身份證嘅咩？」嗰日我一打開佢屋企個雪櫃就好驚訝咁問。
「著得成熟少少，佢check身份證咪去第二間囉，總有人唔check架嘛。」佢講。
「你屋企又無人呀？」我問。
「係呀，去旅行呀佢地。」
「咁今晚…我地飲撚晒佢？」我講，因為未試過飲酒嘅我都好興奮想試下係咩味道，亦都想試下醉係咩滋味。
「屌，好兄弟！一於陪我醉到仆街！」
講完呢句之後，佢嗰晚真係醉到仆街，仲飲撚到嘔都繼續飲，直至飲到喺梳化瞓著先識停。
嗰陣我仲以為係因為第一次接觸酒精飲品，佢太過興奮所以先無節制，但而家諗返轉頭，呢件事發生喺佢同我講佢第一次拍拖之前，即係話，令到佢而家變成咁嘅並唔係佢第一個女朋友…而極有可能係一個得唔到嘅人…
當我閂埋門離開佢間房嘅時候，我突然之間覺得自己同阿欣嘅事好渺小。
只不過係過咗幾個月時間，阿欣喺我記憶入面當然仲係佔據住絕大部份，日常生活嘅種種細節當然仲係會不斷不斷提醒我同佢之間嘅各種過去…
但…幾年之後呢？幾年之後當我諗起阿欣嘅時候，仲會唔會好似而家嘅J鋒咁，灌到自己咁醉去麻醉？
我不禁再次問自己一個問題，我真係有咁鍾意阿欣？
返到屋企之後，我決定搵肥婆傾下偈。
「瞓咗未？」我問。
「未呀，差唔多，咁夜嘅你？」肥婆好快就覆咗我。
「無…有啲嘢諗唔通…」
「咩嘢？」
「我喺度諗緊，一生一世嘅愛情到底係點樣…」我講。
「嘩！做咩無啦啦好似好大感觸咁？」肥婆問。
「因為今日我突然發覺，原來我嗰個老死，或者唔係我所認知嘅咁多情。」我講。
「你係指佢可能係因為受過傷，所以先變到咁？」
「係…我諗我幾年之後，都未必會好似佢咁，咁放唔低我而家心入面嘅人…」
「放得低先好呀！做人要move on架嘛！」肥婆講。
「如果嗰個人係放得低嘅，咁…仲有無一齊嘅必要？」我問。
「唔…我諗我要諗諗先答到你，我覺得你嘅命題有謬誤，但霎時間又講唔出…你等我諗諗…」肥婆講。
「哈哈…其實你唔使太放上心，我都係隨口問下…早啲抖啦，唔阻你瞓覺。」我講。
「你都早啲抖，good night～」
Good night…曾幾何時，呢個字係每一個好夢嘅咒語…
阿欣…到底你對我嘅生命嚟講，係個點樣嘅存在…？
我諗…我一定要追到佢先可以知道答案。
嗰晚我發咗個夢，又再次夢到miss lin婚禮嘅情境，又再次夢到嗰封信嘅內容…
夢入面miss lin把聲喺我耳邊響起，用最為平淡嘅聲線讀出封信嘅內容…
明明我剩係睇過一次，但一字一句，都好似緊箍咒咁，喺腦入面不停縈繞。
明明只係夢…明明再清醒少少嘅時候，夢嘅內容就會慢慢褪去…
但點解，點解你仲一直喺度，點解你仲要一直喺度？
刷牙嘅時候、踢波嘅時候、打機嘅時候、上堂嘅時候、同朋友一齊嘅時候、同女朋友一齊嘅時候、落雨嘅時候、打風嘅時候、睇戲嘅時候、食飯嘅時候…
無論我將自己嘅生活填得幾滿幾滿都好…點解我眼角總係會見到你嘅身影，點解總係會聽到你把溫柔嘅聲，點解總係會聞到你用開嗰隻香水嘅味…
到底無處不在嘅係你，定係我對你嘅思念…？
喺收到嗰封信之後，我即刻打開facebook諗住inbox miss lin，但佢已經shut down咗自己facebook，徹徹底底喺我嘅世界消失。
如果當初我再勇敢一啲，如果當初我更加知道佢嘅心意，如果當初我聲淚俱下求佢俾次機會我，結局會唔會唔同…？
點解你要對我咁唔公平…？我只不過係遲咗幾年出世，我只不過係遲咗幾年識你，我只不過係無機會參與你嘅過去，我只不過係無機會去製造同你之間嘅回憶…
點解當個天剝奪我呢啲機會嘅時候，連你都唔肯俾我…
點解你肯定我唔可以令你一直心動…點解你肯定我唔可以鍾意你一世？
我肯定我可以，點解你唔信我，點解你唔願意行出一步？
…
原來失戀，係呢種感覺…
原來最心痛嘅地方，唔係對方唔鍾意自己，而係明明鍾意，都唔可以一齊。
嗰日之後，我再搵唔返嗰種感覺。
後來中六返暑期工，有個女仔同我表白，我諗都無諗就應承咗，我唔鍾意佢，但我想試下鍾意佢，後來試咗兩個月，我就同咗佢講分手，因為我知道無論再相處幾耐，我都無可能鍾意佢。
如果鍾意呢兩個字係用嚟形容我對miss lin嘅感覺，咁我諗我可能呢世都唔會真正鍾意其他人。
我想知道答案。
嚟到而家，二十歲嘅我，已經數唔清自己拍過幾多次拖，有時同女朋友分咗手之後，過幾日我連佢個名係咩都已經唔記得。
我就係咁一直搵，一直搵，一直試，一直試…
我到底係想搵返鍾意miss lin嘅嗰種感覺，定係想證明我呢世都剩係會因為一個人而心動？連我自己都漸漸分唔清楚。
或者當miss lin唔再喺我夢入面出現嘅時候，我會知道答案。