廿四
這樣的日子持續著，然而阿文卻在快樂之中忘記了當初遞信的事宜。
在和阿怡和好之前，阿文的辭職已經呈交到人事部，能留在部門的時間尚餘不多。
但即使離職了，也可以繼續和阿怡來往吧？
日子一天一天地過，阿文和阿怡如常地相處著。
因為是淡季，所以阿文閒時就去撥弄阿怡的頭髮，而阿怡閒時亦會走過來找阿文聊天。
阿怡在這段時間當中，開始會把自己的事和阿文說，雖然阿文感覺她仍然藏著很多很多，但每一小步對於阿文來說，已經難能可貴。
「呢度唔係咁喎…我啱先咪講過囉！」某一次阿文被bill哥吩咐，去修正阿怡的工作。
「呀係喎…」
「咁改返啦！」阿文的語氣稍微重了一點，因為不想因為對方是阿怡而出現偏頗。
「你鬧我…」阿怡撒嬌說，並抿一抿嘴。
效果拔群！
「我點係鬧你呢？我點捨得鬧你呢？」阿文頓時霸氣盡失地解釋。
但當他看見阿怡展露笑顏的時候，什麼都值得。
有一次，阿文看見阿怡檯上放了中藥…
「你邊度唔舒服？做咩要食藥？」阿文連忙慌張地問。
「我嗰次，咪同你講咗我唔舒服嘅…」
阿文腦內頓時彈出那個時候的事，正是他在電話中一直進逼阿怡的時候…
那次還說了些很難聽的話…
無地自容都不足以形容阿文當下的感受，如果可以，他寧願生病的是自己…
「咁而家呢？係覆診咋？定係有咩事？」
阿怡例牌地微笑著揚揚手，便拿著水杯到pantry斟水。
「有咩事你要講呀…唔係有咩事呀嘛？會無事㗎嘛？」愧疚的感覺驅使阿文不停發問，卻又覺得既然自己當初沒關心她，現在來關懷又來得虛假…
「無事呀…」阿怡說。
也許是真的沒事吧？
阿文只好接受她的說法，悶悶不樂地走回部門房間。
坐著坐著，擔心的情緒依然不能壓止，阿文想知道阿怡身體的狀況。
「川芎、白芍、沙參、百部…！」阿文隨便在網上找了些中藥名稱，然後走去那起阿怡剛沖完的那包中藥嗅起來。
他邊嗅邊亂噏，希望藉此旁敲側擊。
「哈哈！你都傻傻哋嘅！邊有咁易聞得出呀！」阿怡笑了起來。
「咩呀，唔好睇少我個鼻！我中學係讀e班㗎，簡稱中e班！」
這次阿怡笑得更開懷。
「我呢，之前去捐血啦，咁量血壓嗰陣，個姑娘話我血壓低，捐唔到…」
「咁之後呢？同你唔舒服有關？」
「唔關事，哈哈！之後飲咗杯橙汁再量多次，啱啱好合標準就捐咗。」
「你身子弱就咪鬼捐血啦…」
「都話唔關事～我純粹講下上次捐血啲嘢俾你聽。」阿怡說。
阿文覺得，阿怡雖然有時候是個有點跳脫的人，但不至於告訴他無關的事。
捐血，低血壓，中醫，和血有關，身體不適，頭暈…
「哦！你嚟太多咩？」阿文問。
阿怡紅著臉沒有回應，阿文知道自己猜對了。
「咁你煲啲紅棗水飲吖！補血！同埋記住做多啲運動！」阿文說。
「得啦得啦！」阿怡笑著揚揚手。
即使現在才懂得關心她，也許太遲，但，還來得及吧？
阿文希望，阿怡知道他的心意。
不止於喜歡。
也許，美好的事都總有限期吧。
阿文和阿怡好好地相處了一段時間後，兩者之間出現了致命性的矛盾。
「文哥，你之前咪跟開單咩嘅？又返嚟喇喎！」bill哥向阿文說。
「哦！嗰單咩呀嘛，我記得？又返嚟嗱？但我就快last day喇喎！」阿文說。
「係囉，你搵個新人跟埋啲手尾佢啦，順便教下佢哋點做大job！」bill哥說。
「哦，阿怡啦咁，佢未跟過呢類！」
「都估到你個死仔會咁講啦，陣間三點會議室開會，個客上嚟。」bill哥說。
「哦。」
「咁你叫阿妹睇睇啲料先，同佢講講大概個flow係點，再開會。」bill哥吩咐。
「ok！」
即使bill哥不吩咐，阿文也已經有這種打算，藉工作為由去找阿怡聊多幾次天、看多她幾眼。
「陣間三點開會，你要幫幫手跟呢個job。」阿文走去和阿怡說。
「哦…」
「做咩？」
「無呀。」
「咁你睇睇之前我做落啲嘢先。」阿文說。
直覺告訴他阿怡有點不妥。
「ok！」
「你真係無事？」
「無呀ok呀，陣間我有唔明再嚟問你啦！」阿怡說。
「哦…咁你慢慢睇下先啦…」
阿文不敢問太多，有時他自己也不禁想，這種總要「就住就住」的關係，真的好嗎？
轉眼間來到三點。
和客人開戶是阿文最討厭的一個環節，因為他是個不善應酬而且有點怕生的人，這點阿怡亦一模一樣。
可是工作就是工作，相信這世界沒有一份工作能100％稱心如意，況且和客人開會佔總工作量的比率亦不高。
這次這位客戶亦不算麻煩的類型，會議很快就達到共識，彼此在會議期間已經商議好日後的方向，只差進一步地落實文案。
「ok嘛？有冇咩唔明？」阿文問阿怡。
「ok嘅…係氣氛有啲緊張囉。」
「咁文哥你睇下阿妹佢有咩幫到你手，你lead一lead佢啦。」bill哥說。
嘟嘟嘟嘟…
bill哥語音剛落，電話就響起。
「喂？係…係…唔係咁呀大佬？咁急？」bill哥對著電話抱怨。
「大佬呀，我哋呢排多嘢喎！咁，我唔肯定俾到你，不過盡俾。」bill哥繼續說。
「得啦得啦，係咁。」bill哥說完後掛斷電話。
「喂文哥，有壇急嘢要你搞咗先。阿妹你搞晒啱先開會啲嘢佢啦！」bill哥隨即說。
「乜鳩嘢咁急呀？做咩唔屌鳩佢先？」阿文抱怨。
「你聽唔到我啱先講得好撚兇狠咩？」bill哥說。
「講就兇狠嘛…」
「係咪唔幫手先？」
「唉得啦，邊個客呀？」
「黃生呀！」
「唉屌…又係撐起半間公司嗰個黃生？」
「係呀，咁你識做啦！」bill哥說。
「我盡快搞掂啦…」阿文說。
「咁你跟住開會啲內容，揼住份嘢先啦。」阿文接著對阿怡說。
「哦…」
尤於事出突然而且事態緊急，部門其他同事亦有工作在手，阿文逼不得已要先處理大客黃生的工作，而相對沒那麼急的那部份就交托給阿怡。
阿文由第一日開始上班，一直以來都堅持著不願開ot的守則來工作，開完會後已經下午四時，阿文尚有兩小時去完成這單urgent case。
在極度專注之下，阿文在五時五十三分完成工作，在bill哥過目後把電郵send出去。
而驅使他能那麼專注的大部分成因，無非是因為阿怡。
「點呀，你搞成點？」阿文連忙走去察看阿怡的工作進度。
「咦你搞掂嗱？」阿怡問阿文。
「係呀，你呢？」
「我…咁囉…」
「哇咁同無係無咩分別㗎咋喎…你兩個鐘剩係得呢啲？」
阿怡一面為難地看著阿文。
「未deadline呀嘛…」阿怡說。
「咁樣你deadline前都做唔到啦！你陣間留喺度做？」阿文想起當初阿怡還在之前的部門的時候，已經常常留在公司處理工作。
「唔得呀我約咗人…」
「又約咗人？問親你都係約咗人㗎喎…」
阿怡的表情加倍地為難。
「我聽日搞得掂嘅！」阿怡說。
「你知唔知我哋啲job絕大多數都係deadline之前一日搞掂？in case有咩突發事出現，你而家拖到咁忟…問你有咩事又唔講…唉算喇算喇，約咗人吖嘛？走先啦！」阿文看看大鐘，已經到了六點。
「我之前再同你講返咩事啦…」阿怡說。
「唉你鍾意…走啦走啦…」
滿腔悶氣的阿文也不想再和阿怡繼續說下去，因為又只會導致自己脾氣暴走。
阿怡離開公司後，阿文看著她兩個小時下來做出的東西。
內心又再糾結起來。