第三十九章

Previous
Next

啪啪啪啪啪!

呼……

唱完了……

隨著歌詞,浮起了好多好多和詩雨之間的回憶……

想起了好多好多,可以做好,但沒有做到的地方……

待會兒就讓我一次過向她說出全部……

我站起身來,拿著咪高峰走回台的前方位置。

「呃……多謝大家支持。」我說,回報聽眾們的掌聲。

我看見晉傑他們,拍他尤其用力。

果然是好兄弟!

「唱完歌之後,我想同新娘講一下我一直以嚟嘅心底話……係一段當初喺海洋公園無講到出嚟嘅心底話……當然,亦都同首歌有關,唔係唱嚟都無意思啦係咪……哈哈……」我苦笑兩聲,然後看向台下的詩雨……

她看似目無表情,但我還是察覺到她雙眼開始泛紅……

我就要你哭出來。

「丘詩雨小姐,首先,多謝你……一直以嚟對我嘅照顧,體恤,包容,諒解……」我吞一吞口水,然後深呼吸一口,準備再說下去……

「大約五歲嗰一年,阿姨帶住你撳我屋企門鐘,介紹你俾我同我老媽子識,就係咁,我地嘅命運開始交織……」耳邊響起鋼琴的伴奏,是阿軒不是什麼時候走了上台在彈著。

「我嘅童年,極大部份時間都係同你一齊過……我地一齊睇卡通片,一齊玩搖搖,一齊玩古羅卡,一齊玩芭比,一齊畫畫,一齊砌puzzle……到後期少少,我地一齊玩暴龍機,一齊玩gameboy,一齊玩寵物小精靈,一齊卡關,一齊研究……真係好開心……但我一直都無察覺到,原來我嘅開心,唔係建基於所有遊戲同玩具之上……而係因為有你同我一齊玩,所以我先咁開心……我當時仲未知呢種咁特別嘅情感到底係咩……」

「然後慢慢大個,到小六嗰一年,你俾隔離班個肥仔蝦,我諗都唔諗就同你出頭……個肥仔足足高我大半個頭……但我依然淆都唔淆就走去挑戰佢……因為,我唔想你喊,我唔想你受委屈……我諗呢種就係所謂「鍾意」嘅形態……」

「到中學,我同你小小嘅年紀,竟然會有緋聞傳出……我真係覺得好煩厭,我唔想成日俾人講……但我竟然用咗一個最蠢嘅方法去處理……我竟然疏遠你……我好後悔無捉住你隻手,同全班人講我就係鍾意你……對唔住……」

「後嚟我地就因為咁……開始減少聯絡……到中二中三,我都無分到同你同班……更加令我地嘅距離越嚟越遠……」

「去到中四……我哋都終於做返同班同學……但我竟然……唔知點樣開口同你講野,唔知點樣先可以回復返我地昔日嘅關係……我竟然開始串你……講每一句嘢都要奚落到你……希望你可以注意到我……」

「但你無介意不突只……仲永遠都笑笑口咁同我傾計……我好後悔……後悔點解唔好好對你……你仲喺我病咗嗰陣放學跑返嚟照顧我……煮麵俾我食,煲粥俾我食……斟兩杯水俾我食藥同飲……我發覺,你已經成為無可取締嘅存在……」

「但我一直都無同你講……因為我怕你當我只係一個由細玩到大嘅好朋友……」

「考完會考你應承同我去海洋公園,我真係好開心,我覺得我哋拍緊拖,只係差講出口嗰步……臨走嘅時候,我將隻熊送俾嗰陣,我真係想一次過同你講晒咁多年嘅心底話,但我又唔爭氣嘔咗出嚟……至令我一直錯過,又錯過……」

「去到中七𠴱陣,你問我係唔係鍾意你……我竟然會因為學業呢啲無謂藉口而答一個不知所謂嘅答案……如果可以再嚟過……我一定會講我鍾意你……」

「本身諗住考完試再同你表白……我準備晒一堆打動你嘅禮物……點知天意弄人……」

「當淅言出事,我下定決心再同你表白嘅時候……你已經選擇咗同子華一齊……」

「或者人生就係咁……永遠無辦法好似自己希望、預想嘅方式去上演……你最後都係決定同我保持距離……」

「幾年之後,我同你做返好普通嘅朋友……但你已經喺職場上有唔同嘅追求者……最後仲選擇咗而家呢位成為你丈夫……恭喜你……你地真係好登對……」

「衷心衷心地,祝一對新人幸福快樂……但我依然想同詩雨講最後一句說話……丘詩雨,我愛你……由我知道咩係愛開始,我就已經愛上咗你……我唔知你有無對我有過同樣嘅感覺……如果你有……如果你對我仲有絲毫留戀……可唔可以……唔好結婚住……俾一次機會我……由零開始,展開對你嘅追求……」

全場哄動如雷……

而詩雨,哭得梨花帶雨,淚如雨下……

她用雙手拭去眼淚,然後向著我綻放出尤如雨後彩虹般的笑容……

那麼,宣告我的死刑吧……由你親手來……

Please Login to Comment.