第十二章
kathy同咗佢男朋友食日本嘢，kathy唔食生冷嘢，但偏偏對佢男朋友萬般遷就。
kathy望住佢男朋友食魚生，而佢就食拉麵。
佢男朋友好奇，拎舊魚生淥落碗麵到睇吓係咩味。
kathy有少少停唔順殘留嘅魚生味，但依舊扮食得好開心。
佢地再嗌支清酒，灌下一口又一口……
kathy無飲好多，但亦都開始有醉意。
食完嘢，佢地埋單，去咗行海旁。
行行吓，有啲攰，佢地喺海邊嘅長椅坐低咗。
kathy倚偎住佢男朋友……
佢嘅頭髮，散落喺佢男朋友嘅胸膛……
佢男朋友用好溫柔嘅手撫摸kathy個頭，然後攬住佢膊頭……
kathy好似個細路女咁，聞住佢男朋友嘅香水味，靜靜咁聽住佢男朋友心跳。
佢男朋友開始講啲甜言蜜語，講佢自己嘅抱負。
kathy覺得佢講嘅嘢有啲不切實際，但都默默咁點頭表示支持。
佢男朋友同kathy道歉，話之前少時間陪佢。
kathy搖搖頭，話唔緊要。
然後，佢地含情默默咁對望。
越靠越近，越靠越近。
佢男朋友輕鬆超越咗我一直維持嘅14cm距離。
0。
世界，亦都喺同一刻歸零。
並再次提醒我，女神，並唔屬於我。
利申：以上只係我嘅想像，我絕對無跟蹤人。
重覆，我絕對無跟蹤人。
「唔好飲咁多酒呀！」
「唔好咁夜返屋企呀！」
「唔好咁千依百順呀……」
「唔好俾人屌呀！」
以上都係我打完入whatsapp再刪除嘅句子。
我無辦法，無資格send出去。
如果愛嘅極致，只係望住鍾意嘅人幸福就夠，咁世界一定唔會出現情殺案。
愛嘅極致，根本就係佔有。
完完全全嘅佔有。
呢種佔有慾，係與生俱來，係推動人類呢個物種向上嘅原動力。
因為想佔有，而產生競爭，有競爭，而汰弱留強。
所以，人類有著好強嘅佔有慾……
就好似細細個玩玩具，唔希望同兄弟姊妹分；大個咗識朋友，最怕自己嘅好朋友唔係自己……
再直接啲嘅一個例子就係，人地用過嘅飛機杯，就算洗乾淨送俾你你都唔會用啦！
何況係……
要對抗呢種由愛而洐生出嘅佔有慾，真係省一不慎就會變成痴線佬。
雖然我隱藏得好，但唔代表我正常。
我用咗打拳呢個方法去釋放。
我唔想再諗關於kathy同佢男朋友嘅嘢，唯有一拳一拳將思念、將妒忌、將猜測、將不安……將所有所有嘅嘢都打出嚟。
「哇！做乜今日成個地盤之猛鳩咁呀？咁好力嘅？」阿樂問我。
我諗起kathy同佢男朋友纏綿嘅畫面。
啪！
一拳。
「唉，見你咁撚樣，帶你去個好地方啦！」阿樂見我沉默不語，再次提議。
星期日，阿樂帶咗我去一個球場。
「又打波呀？我打拳打到好撚攰呀。」
「今次帶你睇人打波。」
原來，嗰日係乜乜區中學生街籃比賽。
仲要好鬼死多學生妹。
雖然我心情鬱悶，但無可否認，學生妹有種令人心曠神怡嘅能力。
當中仲有唔少學生妹會落場比賽。
見到佢地一個二個都紮住馬尾，又令我諗返起行山時候嘅kathy。
「唉……」
「咁多學生妹都唉？六個囡囡十三個波喎！你睇你睇！嗰面啲女幾高質呀！又青春，又彈吓彈吓！」
的而且確，我一直以為打籃球嘅女仔多數都係tb，但今次俾阿樂帶嚟，真係好多外貌娟好嘅青春少艾喺度打波。
空氣中彷彿瀰漫住學生妹嘅體香，但係，都比唔上kathy。
無論啲學生妹幾青春幾可人幾正都好，都比唔上kathy。
呢個世界無人比得上kathy。呢個係我無經過任何其他人同意而擅自下嘅結論。
古語有云：情人眼裡出西施。
咁西施愛人眼裡嘅西施又會係點？
就會係好似我睇kathy咁。
唯一。
我諗起鋼之鍊金術師入面嘅名句子：一即是全，全即是一。
就算在場嘅所有學生妹向晒我投懷送抱，我都寧願揀kathy一個。
「喂……」當我想同阿樂吹兩句嘅時候，發覺佢已經埋咗個負離子學生妹身，阿樂係個負離子長髮控。
我心諗：有無咁快呀……
「我琴晚發夢見到你（笑喊emoji）」電話傳嚟震動，係kathy嘅訊息。
屌你老母。
我晚晚都夢見你添。
「（笑喊EMOJI X3）」我以不變應萬變，睇吓kathy進一步嘅舉動。
「你唔問嘅？」
「你唔講嘅？」我反問。
「有人想知再講（笑喊emoji）」kathy扮網民嘅賣關子技巧。
咁我又無理由同佢講：「講咗死老母，唔講死老豆。」呢啲咁嘅說話。
唯有唯命是從。
「我好想知呀！！！！」
「哼！係都要本小姐出呢招（鼻哥噴氣emoji）」
唔知道有無細心嘅讀者發覺，kathy唔同咗。
的確，kathy對我嘅方式唔同咗。大家可以去返上面睇第473行。
我知道無人會咁做，所以個數字都係鳩up出嚟。
初初識嘅kathy，無錯係一個交際能手，對所有同事關嘅關係都駕輕就熟，甚至乎會主動認識我呢個唔屬於佢地team嘅人。
但一直以嚟，總係覺得kathy唔係做緊佢自己，而係扮緊一個人地心目中嘅自己。
到咗依家，我再無呢種感覺，佢喺我心目中變得自由。
或者，只係喺同我相處嘅時間入面，佢先感覺到自由。
真荒謬，把自己看得那麼高。
我對於kathy嚟講，只係一個可以令佢放低裝甲嘅朋友。
佢變到好似一個細路女，喺我面前毫不修飾咁表現自己嘅情感，不過絕對唔係愛情。
我好清楚。
我無辦法去迴避，亦都無辦法感到討厭，因為令佢變成一個真正嘅自己，正正係小弟嘅功勞。
如果我離開佢，只會傷害到佢。
「咁你個夢係點架？」我問。
「無呀，我發夢夢到自己返工之嘛haha，你話慘唔慘，明明係星期六夜晚，竟然係夢入面返咗一次工（喊喊emoji）」
「白痴，咁有冇趕到deadline呀？」
「就係無呀！！個夢好恐怖呀，啲嘢做極都做唔完！」
「咁最後點呀？」
「醒咗囉（笑喊emoji）」
「你依家喺邊呀？」kathy繼續問。
睇緊波……
「我同個fd喺港島個邊呀！」
「啱喇！我喺銅鑼灣呀，你過嚟陪我行街呀～」
「（ok emoji）」
我用心靈通知咗仍然同學生妹溝通緊嘅阿樂，然後過銅鑼灣搵kathy。
kathy whatsapp咗佢嘅位置資訊俾我，叫我喺樓下等佢。
原來kathy有兩頭住家。
因為佢老豆老母都經常出埠，所以大學畢業之前kathy都係同佢嫲嫲喺銅鑼灣住。
係之後先搬返去近公司嘅另一個屋企，即係我之前去嗰個。
我一直好羨慕住港島區嘅人，總係覺得個格調唔同。
雖然銅鑼灣依家好多大陸遊客，但kathy住嗰度又旺中帶靜，算係銅鑼灣嘅淨土。
如果你話住希慎、時代、sogo嘅附近，真係不了。
「嗨～」
假日嘅kathy，著得好hea。
一件t加條牛仔褲，仲帶住副眼鏡。
「乜你有近視架？」
「係呀，少少啦，唔深，我連con都係一時帶一時唔帶。」
「咁你今日又帶眼鏡嘅？」
「你估吓～」
「斷估唔係想唔俾我見到你個靚樣掛？」
對於我嚟講，呢句說話係有少少踩界，但我依然講咗出嚟。
「哇，乜你識講呢啲架？」連kathy都有少少詫異，但無在意。似乎我已經被佢深度friend zone咗。
「唔通揭穿你其實係想遮住黑眼圈咩！」
「唉……琴晚發完個夢之後都無點訓過喇……」
「咁你仲行街？」
「我驚訓咗今晚又訓唔著呀！」
「咁麻煩架你！」
「係咁架啦！」kathy咧嘴而笑，彷似係對我撒緊嬌。
帶住眼鏡嘅佢，令我諗起……教師系列……
「咳咳……」我心虛地乾咳兩聲……
「你病呀？」
「唔係……行嚕……想行邊？」
「我想去睇波鞋呀！」
我地又去返14cm嘅距離。
到底，我地嘅關係，係唔係已經到咗友情嘅終點，然後一直停留？
而我，只可以喺偶爾嘅肩碰肩之間，逃離現實嘅框架，想像另一個世界。