第一章
我叫阿傑，喺一間公司仔到做文員。
阿傑係我嘅化名，因為嚟緊我打算同大家剖白，唔方便比人知道現實中嘅真實身份。
我將呢個故事貼係故台，大家可以當係故咁睇，不過，其實只係關於我內心掙扎嘅兩三事。
相信有唔少巴打，都睇過殘忍的偷戀呢個故事。好撕心裂肺哩……我都覺，睇個陣已經覺，雖然個陣我嘅人生無咁嘅經歷，但都好深深體會到個種痛……
不過，當件事發生係自己身上嘅時候，我先知道咩叫切膚之痛。
你可以唔信係真人真事，撳負皮上一頁出返去，又或者可以當係故仔咁睇，睇下一個都市人嘅掙扎……真亦假時假亦真，做人，都係喺虛幻同現實之間徘徊，有時想分都分唔清……
有樣野可以肯定咁講，個種透骨透心嘅體會，100%係真。
故事一至五更新，因為每一個工作天都會上演剖心劇情。
平凡嘅我，唯一可以做主角嘅時候，就係喺自己嘅故事。
故事，要由大學畢業講起。
我諗，大學畢業嘅時候，大部份嘅大學生，都係徬徨無助。
唔知自己想做咩，唔知自己做咩好，唔知自己有咩出路，唔知自己點先買到樓，唔知自己可以做到啲咩。
當然，我都一樣。我係個啲GPA唔過3但又低唔過2嘅人，之係佔大多數嘅平凡人。我係由幾時開始知道自己平凡？由小學考呈分試開始。
死讀爛讀，都只係夠入BAND2中學。然之後再死讀爛讀，會考14分升中六，再死讀爛讀，讀到嘔，讀到想自殺，都係入唔到八大，走去讀啲下三流大學HEA張DEGREE返黎。
我好平凡，每日照鏡個陣已經知道，無所謂嘅中上樣，俾到盡可能都係得中下，你問我有咩中下嘅例子？周杰倫同東尼大木混合體咁上下……雖然佢地一樣樣，唔知溝黎做乜……
唔知大家有無睇過齊木楠雄的災難，我諗我平凡嘅程度已經係去到齊木楠雄勁撚羨慕嘅階段。家境平凡，身高平凡，樣貌平凡，成績平凡，運動平凡，心態平凡。
呢個就係我。
大學畢業之後我用左一年零時間黎思考人生，係我確定自己一定唔會得出結論之後，我開始瘋狂SEND CV。最後都有間公司仔肯IN我。
我諗佢一定好撚等人用，先局住請我。
個間係廣告公司黎，不過我同度橋無緣，只係負責做個文員仔。
如是者，我係個間公司HEA做左半年，平時最準時返工，亦都最準時收工。
唔知你知唔知，廣告公司啲放工時間，係人難以想像，基本上可以用有返工無放工黎形容，或者只有我呢一間公司係咁，可能係因為個老細高要求，亦都可能因為係佢自己嘅小生意，所以佢特別有要求。
雖然係公司仔，連埋我都係得10個員工，不過，聽講營業額唔錯，老細有料之餘，請人方面亦都相當有眼光。
不如我就係度簡單介紹下個班幫公司賺錢嘅人。
首先有2個係SALES，負責搵客同對外事務，叫JERRY同VIVI。佢兩個應該30歲左右，可能日久生情掛，聽講年尾結婚。
另外5個係負責度橋同做出黎，叫JASON，JUSTIN，FIONA，ESTHER，NIKI，仲有一個RECEPTION，一個我，同一個老細。
公司業務聽講都幾廣泛，有平面廣告到電視廣告到網上拍片都有份做，不過就唔係度講公司名啦，行頭都比較細。
老細係個年青實幹型創業家，以我嘅標準黎講，佢都算係無父幹嘅……雖然佢家底唔錯，不過聽講屋企人就無打本俾佢做生意，而係佢自己儲一舊錢，再同銀行融資。
當然啦，有啲人認為，家底好，就算前無去路，後都有支援，創業會容易好多，不過我就唔計呢啲做父幹啦……
睇個樣，我諗老細都未夠40歲，俾盡35，能夠有咁嘅成就，我作為男人，都未免比佢啲魅力射親。
唔知老細款係唔係有得睇，佢一行出黎，個種氣勢，個種自信，真係無得輸。如果你話老細係我對手，我真係輸一千次都唔夠……唔係唔係，我諗我係連做佢對手嘅資格都無。
要數佢嘅優點，我真係唔知由邊度開始數起好。家底好呢樣野已經贏左香港八成人，佢仲要人生得高，個樣令你羨慕……有些少似彭于晏同全盛古天樂嘅混合版本，加少少金城武嘅憂鬱同吳彥祖嘅咸水味，唉，有時真係唔到你唔信呢個世界係唔公平。
唔止樣，就算實力都係超班……
我諗我唯一一樣可以同老細媲美嘅，就係眼光。
我大學畢業HEA左一年零之後，又係個間公司做左半年，之後因為太好生意嘅關係，要擴充人手，請多個人返黎度橋。
要請人，之係代表多左野做喇。因為我就係負責睇CV個條撚屌。因為公司係無HR，而我又係最得閒果個，所以CV就係我睇。
年半多少少嘅時間，學制已經由AL轉左去DSE。SEND信黎嘅，好多都係第二屆DSE考生，唔記得左講，小弟係末代AL。
老細叫我睇CV揀3個出黎INTERVIEW，其實我都係是鳩但，因為SEND信黎嘅人都唔少。我是但揀左三個人出黎，親手送左自己落地獄。
三個黎見工嘅都係女仔。最後請左嘅，同我一見鍾情嘅，係同一人，叫KATHY。
如果話，呢個世界有人，一顰一笑，一舉手一投足都牽動到人思緒嘅話，我諗果個就係KATHY。
第一眼見到佢個陣，我唔相信自己嘅第一眼。我直頭想搵個眼科醫生，驗下自己對眼係唔係有問題，又或者係搵個精神科醫生，問下我係唔係因為單身左廿鳩幾年而美化晒所有女性嘅物體。
但當我一望去ESTHER到，我就知道自己一切正常。
ESTHER係個好叻嘅女性，就連磅數都俾男人優勝，聽講佢曾經一拳打暈個想非禮佢嘅南亞裔。如果我係法官大人，真係唔撚知點判……
講返正經野，KATHY，係我呢世見過最靚嘅女性，連VIVI，FIONA，NIKI都被佢比下去。
VIVI係一個散發住無限女人味嘅女性，如果要形容嘅話，就係嫵媚。
FIONA係嬌小玲瓏類，要形容嘅話，就係可愛。
NIKI係清甜氣質形，要形容嘅話，就係仙氣。
以上三個各有高低，你要我排我真係排唔到……
至於KATHY……SORRY我讀得書少，詞窮……總之就係好撚鳩柒閪靚。
佢黎見工個陣，我真係好撚鳩柒閪驚老細會唔揀佢，不過諗深一層，又想老細唔好揀佢……
因為就算佢黎返工，這些機會都不是屬於我的。
老細最後都係請左佢。
佢第一日返工，著得好樸素，告別左著SUIT黎見工個陣嘅俗套，多左一份性格，同清新。
我諗，人生得靚，就係一種好處。
如果你話，有啲女太靚嘅話會被身邊啲八婆排斥，我只可以話，只係果個女仔唔夠靚。
夠靚嘅話，係會令同性都憐愛。
KATHY第一日返工，就已經受到同事嘅各種寵愛，就連平時一度野就變第二種人格嘅老細，係今日度橋個陣都無咆哮。
我敢講，公司無人襯得起KATHY，除左老細。
我諗，金童玉女呢個詞語，就係為左佢地而存在。
當然，我唔排除老細已經有女朋友，不會為之所動，不過就算係，機會都唔會係屬於我。
因為JASON同JUSTIN，都係優秀到仆街嘅撚屌。
我呢條廢柴，係呢間公司到做，同佢地就好似隔住兩個宇宙咁。
佢地度野間房嘅溫度，同我坐出面嘅溫度，係兩回事。
因為間房，比一班人嘅熱血，搞到急劇升溫。