Tinder11
每個人都曾經憧憬，一啲遙不可及嘅目標。
我都唔例外。
由細細個懂事開始，我已經隱約有一種感覺，就係我係一個幸運嘅人。
做錯事唔會俾人鬧，做得唔好無人怪，做得好就更加係將我寵到上天花板。
父母係咁，同學嘅父母係咁，姨媽姑姐係咁，老師係咁，女同學更加係咁。
由幼稚園開始，就好似集萬千寵愛在一身嘅我，其實無話特別高興。
我都不過係想好似一個正常人咁長大，受一個正常人會受嘅待遇。
讀幼稚園嗰陣，放學之後都會同同學玩一段時間，有一次，我打爛咗某位同學心愛嘅玻璃水樽，佢喊到痴咗線，但嗰位同學嘅媽媽竟然唔係先關心自己個仔，而係走過嚟問我有無整親。
大個之後我已經唔記得嗰位同學叫咩名，係咩樣，但成件事就好深刻。
因為好地地一個小朋友，又點會用玻璃水樽？
我有一個鄰居，佢同我返同一間幼稚園，老實講，我最深處嘅記憶入面嘅佢，係一個唔點出聲又唔起眼嘅同學仔，我地放學之後都唔會一齊玩，佢只會靜靜雞坐喺一邊，等伯母嚟接佢。
所以玻璃水樽事件佢都看在眼內。
呢件事老師知道，同學媽媽知道，我老母知道，受害嘅同學知道，佢知道，或者仲有其他喺一二面玩緊嘅同學仔都知道。
但成件事入面，嗰位唔起眼嘅同學，係唯一一個責備我嘅人。
「要同人講對唔住！」佢第二日走過嚟咁樣同我講。
從來都無人叫過我講對唔住，畢竟我只是個孩子，仲係一個可愛嘅孩子，就連當事人第二日都已經無晒事繼續同我玩，唯獨係佢走過嚟叫我好好道歉。
就係因為佢呢一句說話，我認定佢係我一個值得交、而且一定要交嘅朋友。
至於具體原因我嗰陣都未知，只係一種發自內心嘅感覺令我有咁嘅諗法，後來大大下，開始更加識諗嘅時候，我終於知道自己細個會有呢種諗法嘅原因。
因為佢唔會為咗討好我而裝模作樣。
人類都係一種渴望被愛嘅生物，呢種係本能嚟。
而且人類都係偏心，對住一啲可愛嘅生物就會投晒降，你見呢個世界有咁多貓奴狗奴就知，呢種都係本能嚟。
我可愛，而我嘅同學仔渴望被愛。
因為大家都係幼稚園學生，所以大家先會更遵從本能去行動。
埋我堆，自然可以得到老師更多關注。
呢種唔係有機心嘅做法，絕對唔係，只係好多同學仔無意識間就做咗呢個決定，就好似我啱先咁講，係本能嚟。
亦因為咁，我身邊成日都聚埋好多人，唯獨我嗰位鄰居係例外。
我開始成日留意佢，亦成日主動撩佢，我地終於做咗好朋友。
利申返先，我一開始提及我所憧憬嘅目標，並唔係佢，我同佢亦都唔係牙膏牙刷叉燒白飯嘅關係，只係純粹想介紹呢位老死俾大家認識。
而即使係呢位老死，都唔知道我後來嘅秘密。
我同佢喺幼稚園畢業之後入咗同一間小學，我地返同一間補習社，而我依舊好似故事入面嘅主角咁，受盡萬千寵愛，就連補習社嗰個勁撚惡嘅miss都從來唔會鬧我，但我位老死就會俾佢鬧到狗血淋頭…
如果人生係一隻rpg game，我default嘅模式一定係easy mode，我一直都咁樣覺得。
後來小學畢業，我同嗰位老死入咗唔同嘅中學，不過依舊保持聯絡。
無咗佢做同學，我仍然識到一班好朋友，仍然有女仔向我獻殷勤。我嘅生活仍然係咁多姿多彩。
過咗青春期之後，我嘅代名詞就由可愛變咗做靚仔，但無減我嘅受歡迎程度。
班際、校際、陸運會、水運會，每次呢啲活動完咗之後，班女同學一定會聲沙，嗌到聲沙。
正當我享受緊咁美好嘅校園生活嗰陣，有一個人帶嚟咗轉變。
係一個代課miss。
嗰年我讀中五。
因為中文科李太放產假嘅關係，學校請咗位代課miss，為期三個月。
嗰一日發生嘅事我仲記憶猶新－－
鈴鈴鈴鈴鈴鈴鈴…
我啱啱喺廁所屙完屎，小息鐘聲就打響，之後嗰堂係中文堂。
洗完手之後行出走廊，我見到一個仆咗喺地下，仲散到成地都係紙嘅女性。
「你無嘢呀嘛？」我連忙行上前幫佢執返地上面嘅作文紙，一拎上手望一望，就見到同班同學嘅名。
原來係李太臨放產假之前我地上堂做嘅作文paper，即係話佢就係嗰位代課miss。
「唔該晒你呀同學，哈哈，我真係論盡…」眼前嘅女性抬起頭，望落唔係大我地好多，佢對住我傻笑咗一下，雙眼彎到弦月咁。
我嗰陣第一時間諗起一首叫「到不了」嘅歌。
佢啲頭髮仲有啲凌亂，但完全無整理一下就開始執拾地上嘅作文紙。
Gentlemen 如我，就梗係即刻伸手幫佢梳返好啲頭髮啦。
「同學你唔使理我架，快啲返去上堂啦！打咗鐘架喇！」佢講。
「唔理你，我都係上唔到堂架喎！」我講。
「點解？」佢一隻手捧住執返好嘅作文，另一隻手一邊梳下個頭又一邊執下仲喺地下嘅作文咁，手忙腳亂咁樣超可愛。
「miss你叫咩名呀？」
「我姓林架。」
「miss lam？定miss lin？」我問。
「miss lin。」佢終於都執完企起身，著住高踭鞋嘅佢矮我半個頭。
「咁英文名呢？」我問。
「同學，你…你…死…我遲到喇！」佢仲未諗到點應我，就急急腳向我班房走去。
當然我都緊隨其後，一諗起佢入完班房之後見到我行入去個樣就好好笑。
「咦同學，原來你係呢班架？」果不其然，佢見到我行入去嘅時候對眼睜到超大。
我無理到佢，我乖咁行返自己個位。
因為我知道如果我理佢嘅話全班一定會起哄，而呢個miss lin一定控制唔到情況。
唔…我諗我有少少鍾意咗佢。
Miss lin係一位好討好嘅miss，同學都好鍾意佢，佢唔只生得靚，上堂仲好俾心機去教。
就以嗰次佢跌到成地都係嘅作文為例，每一篇作文佢睇完都會寫返自己嘅感想，再加上建議改善嘅地方，有時佢寫出嚟嘅嘢甚至有篇作文一半嘅字數，睇得出佢每一篇都好用心去睇。
因為係中五學生，基本上都已經為dse做緊準備，而中文科入面性價比最高嘅一份卷可以話係口試卷。
考口試基本上可以話係唔關語文底子事，只要肯練習，成績可以話係有上升嘅保證。
Miss lin係一個好熱心嘅老師，當然會幫我地安排口試練習。
為咗喺三個月嘅時間內提升我地嘅口試成績，我地全班同學被切到一組組，有時就朝頭早返去同佢練，有時就放學留喺度同佢練，唔使問，最辛苦嗰個一定係佢。
但每次同佢練習，我見到佢都係樂在其中，完全無話因為某位同學表現得差就黑口黑面，總係好耐心咁講解返邊個位可以陳述自己嘅論點多啲，引用咩論據可以去令自己嘅發言更加有說服力等等…
而且仲係一路都笑笑口。
「miss，你幾多歲？」有一次練完口試之後我問佢。
「張同學，女人嘅年齡係秘密嚟架。」佢笑住同我講。
「25？應該頂盡25歲。」我講。
「你chok唔到我架，晏喇，放學啦。」佢講。
「miss你呢？仲未放工？」我問。
「我要執埋啲手尾先，拜拜～」講完之後佢就離開咗課室。
我諗有生以嚟都係第一次有女性對我咁冷淡。
佢係一位好平易近人嘅老師，上堂嘅時候基本上都同學生打成一片，但始終都係會因為老師呢個身份而刻意製造一啲同學生之間嘅距離出嚟，而呢種距離感令我更加想了解佢多啲。
除咗咁之外，佢仲對學生一視同仁，無論係成績好定係成績差嘅學生，靚仔定毒撚，佢都唔會差別對待。
係咪就係因為佢太大愛，所以我佔有慾作祟呢？我都唔知。
我剩係知道，無論如何，我都想拉近同佢嘅距離。
正所謂機會係留俾有機會嘅人，好地地一個機會又點會憑空誕生呢？要擁有這些機會，就要自己去創造出嚟。
我決定今日等佢放工。
我喺學校門口物色咗一個最佳位置，既可以收埋自己，又可以將由學校出嚟嘅人一覽無遺。
屌，連我自己都覺得自己變態。
不過我都係生平第二次有呢種想接近一個人嘅感覺。
第一次就係我嗰位老死。
只係等咗十五分鐘左右，miss lin就行出學校，睇嚟佢所講嘅執埋啲手尾先有八成係想hea走我，不過唔緊要，以佢嘅性格，如果我而家行過去同佢打招呼，佢一定唔會耍走我。
我決定就喺轉角嘅紅綠燈位走埋去！！！
「咦，咁啱嘅miss lin？」我從後開口。
「咦張同學？你咁晏先走嘅？」
「哦係呀，見有啲急屎嘛，哈哈！」我講。
「學校廁所好咩？哈哈！你住好遠架？」佢問。
「我住北角之嘛，你呢！」
「嗚…我住大西北架…」
「哇！嚟到灣仔教書？」
「咁有工就返架啦哈哈，同埋都有巴士直接一程過到嚟。」
「咁你同我地朝早練oral嗰陣咪要好早起身囉？」我問。
「都係架哈哈，我係咪唔話得先！」
「直頭係老師中嘅典範啦！」
「唔敢當唔敢當。」
「我送你去搭車吖，驚你蕩失路！」
「喂！我假假地都係老師喎！」
「屯門係唔係有牛架？」
「你又知係屯門？」
「唔係屯門就係元朗天水圍架啦，你個樣似屯門人呀嘛！」我講。
「你而家係唔係歧視先？」miss lin遞起隻手，揸做拳頭嚟嚇我。
「我出包！你輸咗喇！」
「哈哈，細路仔真係細路仔～」講完之後佢就一嘢揼落我手臂到。
「呀呀呀！」我扮痛慘叫。
「乜真係咁痛咩？」
「哈哈！大人真係易呃～」
「喂！我假假地都係老師喎！」今次到miss lin扮嬲。
「係喇係喇，你到站喇～聽日見啦～」我講。
「好啦，聽日見啦～拜拜～」
同miss lin道別之後，我個心小鹿亂撞。
雖然喺一路行嘅過程入面我一路極力表現出原來嘅自己，但實情就緊張到死。
呢段短短嘅路程雖然有傾有講，不過…總係有種莫名奇妙嘅距離感。
直覺話俾我知，佢抗拒緊我…
唔通老師嘅枷鎖，真係一種束縛？