Tinder09
終於、終於返到自己屋企，我一嘢就撻咗落張床到，真係唔知幾耐幾耐無試過咁攰…
今日成日都喺你瞞我瞞嘅情況之下度過，原來係咁辛苦…
有時真係佩服J鋒，有五個女朋友到底點頂…
不過可能佢樂在其中都未定…
我拎起電話，好想搵個人訴一訴苦…呢個時候，我腦入面馬上浮現出嚟嘅係肥婆，可能因為佢體積大，佔咗我唔少腦容量…
呢幾日都比較少同肥婆傾偈，一嚟因為crystal打亂咗我嘅生活節奏，二嚟佢都無點搵我，畢竟只係網上面識嘅朋友，話嚟就嚟話走就走亦都係特色嚟。
我唔知道自己喺肥婆心目中嘅份量如何，所以拎住部電話躊躇不前…
到底佢有無將我歸類為朋友呢，定只係當我係一個得閒無事做嘅時候拎嚟zip時間嘅人呢？
我望住肥婆幅相望咗好耐，不停諗不停諗，到底我地嘅關係去到邊。
「hi～做緊咩？」久違幾日之後我再次hi肥婆，say hi個hi。
隔咗幾分鐘，肥婆都未覆我，搞到我個心有啲攞攞攣…此時此刻，我竟然有啲怕肥婆已經將我拋諸腦後，定係佢俾我話想見佢嘅態度嚇親？我係唔係應該再解釋一下我唔使一定要見面，只係咁啱天地堂想撞下…
「@@！你好耐無搵我喇喎！」隔咗一段時間，肥婆終於覆我。
「大家咁話啦，哈哈…」
「我呢排忙緊個group project呀，咪少咗玩電話囉～」肥婆主動解釋。
唔知點解，我個心好似一下子放鬆咗咁。
對於我呢類自卑嘅毒撚嚟講，肥婆呢種會主動解釋自己潛水原因嘅性格，其實同我好夾，我唔使成日亂諗佢做緊咩，又唔使成日亂諗佢係咪無啦啦嬲咗自己…
簡單啲講，即係有安全感。
「我近排都有嘢煩緊…」我講。
「煩緊咩嘢？」肥婆問。
「我有個老死，佢…叫我溝佢條女。」我諗都無諗就講咗出嚟，喺肥婆面前，我總係能放低成副裝備。
「下？咁痴線？佢想同個女仔分手但又唔忍心咋下話？」肥婆問。
「可能係其中一個原因啦…但重點係…佢女朋友搵我叫我幫手激佢…」
「…咩劇情嚟架？咁你點？你兩邊都應承咗？」肥婆問。
「嗯…」
「喂喂喂！兩邊都唔應該應承啦！你咁做會令個女仔受傷害架！」肥婆講。
「但如果我老死直接就同個女仔講分手，唔係都會受傷害咩？」我問。
「長痛不如短痛啦！到時你又追唔到個女仔，個女仔又心存盼望以為你幫到佢，咁最後咪仲hurt！」肥婆講。
「都係嘅…但我而家已經唔知點樣開口同其中一邊坦白…」
「直接講囉！你可以幫你個老死隱瞞佢嘅要求，但另一方面你一定唔可以繼續幫個女仔！」肥婆講得有啲義正辭嚴，搞到我有啲慚愧…
的而且確…我唔應該令到crystal有假希望…佢根本留唔住J鋒個心…
「定係我應該將錯就錯，睇下個女仔可唔可以令我老死浪子回頭先？」
「你應該都好熟悉你老死啦，你覺得佢會唔會？」肥婆問返我轉頭。
「我覺得個女仔係我老死遇過嘅女仔入面最好嗰一個，可能亦都因為咁，我老死唔想耽誤佢掛，但講真我始終都唔覺得我老死有幾鍾意個女仔。可能純粹係覺得對方係個好女仔，所以想放人走。」我嘗試分析J鋒嘅心態。
「啱呀，真正鍾意一個人點會捨得放人走，仲要叫人去追佢，真係想像唔到。如果真係鍾意，應該係為咗對方改變自己，令自己唔好辜負對方嘅好先係。」肥婆講。
「同意，真正鍾意一個人又點會捨得放人走…」我又諗起阿欣…
「咦，你語帶雙關喎！」肥婆真係好眼利，定係佢同J鋒一樣都係識讀心？
「我仲係未放得低，haha…」
「正常架，如果咁容易放得低，證明你都唔係咁投入嗰段感情啫。」肥婆講。
「但點解佢咁易就放低…」
「你有無搵過人呀？」肥婆問我。
「無…」
「咁你又知人地放低咗？」
「如果佢未放低，做咩唔搵我…」我講。
「呢點已經超出我可以推測嘅範圍喇…你一日唔試下再去搵佢，你一日都唔會知道答案。」肥婆講。
「唔係咁易架…」
「咁就視乎你有幾放唔低喇。真係鍾意一個人，係可以鼓起勇氣，排除萬難。」肥婆講。
「咁你有冇試過？」我問。
「你想知？」
「想。」我好肯定咁答。
「哈哈，但我唔想講住，你唔會逼我講架何？」肥婆講。
「哦…梗係唔會啦，想講先講。」我講。
咁都係嘅…我同肥婆嘅關係可以話比普通朋友更普通，只係我單方面以為喺網絡上面較容易同陌生人講出心底話，亦都只係我單方面以為講咗出嚟會舒服啲…
所以肥婆根本就無同我分享佢往事嘅義務同理由。
「總有機會嘅，如果你真係想知，就等下啦～」
「等到幾時？」我問。
「乜你咁心急架？嗰次過嚟bu又係，同都唔同我講聲，咁樣會嚇親人架。」
「係咩…」
「要培養一段關係，一定要耐性架！你成日咁心急，其他人可能會覺得你唔在乎佢地。」肥婆講。
「乜唔係因為在乎所以先心急咩？」
「咦你咁講我會開心架喎！」
屌，我一時唔為意，中咗肥婆嘅圈套添…
「可能喺你嘅角度心急等於在乎啦，但我嘅睇法係，如果連心急都按捺得住，先係真正在乎。」
「係咁嘅咩…」
「唔同人有唔同睇法啦，你無可能永遠用自己嗰套套落人地到架嘛。」肥婆講。
「都係嘅…咁等你想講先講啦，到時我會好用心咁聽。」
「嘻，多謝你喎～不過你老死嗰面點呀？」肥婆問。
「我仲未決定好…」
「始終你先係當事人，我就唔咁多口喇，不過都係嗰句，拖落去對個女仔唔公平，你睇下點樣處理啦。」
「嗯，多謝你意見，同你講完舒服咗好多。」我講。
「客氣客氣，下次傾啦風景人，我要繼續做project喇～」
「乜原來未做完架？sor呀仲捉住你傾咗咁耐。」
「唔緊要啦，我當休息之嘛～」肥婆真係好體貼。
「加油啦哈哈！」我鼓勵肥婆。
無可否認，同佢傾完之後真係舒服咗好多，肥婆係一個好為人著想嘅肥婆，好似識睇穿我心入面嘅疑惑咁，喺我問出口之前就已經主動解釋，仲會分享好多自己嘅諗法，令我唔使估估下。
可能人夾人緣就係咁解。
傾完一輪之後，我開始思考返我、crystal同J鋒嘅關係。
無容置疑，crystal真係一個不折不扣嘅好女仔，唔單只性格大方，仲有無私奉獻嘅精神，而且仲要生得靚…相反J鋒…即使我係佢老死都咁講，佢正一mk仔，用情不專，當啲女朋友係狗咁撚，仲要生得靚仔…不過就真心為我著想…
所以我決定…同咗crystal講先。
我拎起電話打開whatsapp，搵返同V嘅對話框出嚟。
「得唔得閒？我有啲嘢想同你講。」我輸入。
「而家？ok呀。」
「咁我打俾你ok？」
「可以呀。」
嘟…嘟…嘟…
「喂？」
「喂crystal呀唔該。」
「哈哈，你都幾搞笑架喎，你咪啱啱先whatsapp咗我話打嚟囉～」crystal笑住講，睇嚟心情唔錯。
「都係一句啫…」
「你有咩想同我講？」
「呃…咁嘅…你覺得…我地咁樣做落去，真係有用…？」我問。
「唔知架…今日唔知聽日事呀嘛…定係你唔想幫我喇？」crystal問。
「唔係唔係…幫你好閒啫…不過我怕…」
「怕咩？」
「怕到最後你發覺，原來J鋒唔係你諗咁樣…」
「咁…你覺得我諗嘅佢係點樣？」
「就好似之前咁講…你可能覺得…只要堅持落去，總有一日佢會突然之間發現自己忽略咗你？」
「唔…其實都唔係啦，我覺得佢無咗我都唔會在意。經過今日之後我更加咁樣覺得。」crystal講。
「但咁樣你都想繼續？」我問。
「有時有好多嘢，明知無結果都會繼續做，好似買六合彩咁之嘛，有幾多人買嗰陣真係覺得自己會中？但唔買又唔心熄…」crystal講。
「所以就算你明知佢唔會變，你都想我繼續配合你？」
「都唔係剩係因為佢嘅…」
「咁仲因為啲咩？」
「唔話你知，收線喇，拜拜～」
通話結束。
咁即係點？
「你會繼續幫我架何？」crystal whatsapp問我。
無可奈何之下，我都傳咗個ok emoji俾佢。