Tinder07

Task1.5 : Crystal

「你傻撚咗呀？」我問。

「佢幾好吖。」J鋒講。

「佢係幾好你就對人好啲啦！」

「你知我有五個女朋友架啦。」

「咁都唔係叫我溝佢掛？你傻撚咗呀？」

「你諗下，作為訓練，唔係幾好咩？萬一你嗰個阿欣有男朋友，你都係要溝人條女架啦。」

「阿欣還阿欣，crystal還crystal呀。」我講。

「叫你試下溝啫，你估你實溝到架？」J鋒講。

「唔係溝唔溝到嘅問題，而係咁做係傷害緊佢呀！」我講到燥燥地。

「你去溝我條女，最受傷害嗰個應該係我喎！我都無所謂喇，你咁婆媽做乜撚？」

「佢過嚟喇，遲啲再講。」

「嗱佢就打開sup嘅，陣間你玩ad carry佢啦。」J鋒講。

我實在諗極都諗唔明，點會有人叫自己兄弟去溝自己條女？當然我都幾肯定我唔會溝到，但J鋒到底咩心態？

識咗佢咁耐，唯獨係呢點我摸唔清。

「sorry呀，等咗好耐呀？」crystal行埋嚟講。

J鋒無理到佢。

「唔係呀，開機啦。」我應佢。

之後幾個鐘，都係我打ad，crystal打sup，啲人成日話見微知著，單憑crystal打機嘅態度我已經大概知道佢係一個點樣嘅人。

如同J鋒所言，真係唔錯。

有打過lol嘅人都知，下路組合多數都係ad同sup嘅配搭，但喺呢隻game入面，sup呢個個位置相信係五路入面最唔受歡迎，如果係打rank，有唔想打sup嘅人抽中sup，好多時都會揀隻ap英，甚至乎會出現搶ad兵嘅情況，喺ng就自然更多時候會遇到呢種情形。

但crystal就係一個好認真嘅support，打咗幾場唔係揀leona就係揀牛牛，即係一啲傳統嘅support英，玩落亦都比較悶，因為操作唔多。

如果要硬係要形容佢嘅打機風格，我會話係無私奉獻。

無論係出嘅裝定係用嘅技，往往都係以保ad為前題。或者係覺得自己判斷力比較差，所以唔會強開戰，而係會根住我同J鋒坐喺隔離嘅口頭指揮嚟行動，仲配合得唔錯。

屌，明明就係J鋒隨街搭訕嘅一個女仔，點解會咁高質…

打完機之後crystal話約咗人食飯，但我睇怕都係因為佢覺得自己已經阻住咗我同J鋒打機，唔好意思繼續阻落去先借啲而走先。

一方面想箍住男朋友，另一方面又怕阻住男朋友嘅crystal，其實都幾可愛。

「你覺得佢點？」J鋒問我。

「性格幾好吖。睇得出佢好著緊你。」我講。

「咁你要唔要試下溝佢？」

「屌，你到底諗緊乜撚？」

「諗住幫你訓練囉。」J鋒講。

「都唔係話拎自己條女出嚟幫下話？」

「屌，我叫你溝啫，無話叫你溝到呀嘛。」J鋒講。

「屌，雖然我窮矮柒毒啫，但如果萬一，我係話萬一，crystal真係咁重口味鍾意咗我，咁你點？」

「咁咪少個女朋友囉。屌，你估我係啲咩好人咩，係好人就唔會有五條女啦，我從來都唔會勉強一個女仔留喺我身邊，你估啲女真係蠢嘅咩，隱隱約約佢地都會感覺到我唔止得佢地一個女朋友啦，但每個人都唔會講出嚟，點解？因為佢地需要我，因為我俾到佢地需要嘅嘢佢。明無？如果其中一條女因為俾第二個人溝而離開我嘅話，對我嚟講根本不痛不癢，反而會祝佢幸福添。最緊要係咩？係幫到你呀！你一定要完美咁裝備自己，先可以追返嗰個阿欣架嘛，係咪？」J鋒講。

「…」我真係聽到呆撚咗，但無可否認，佢嘅歪理係講得幾好聽。

「嗱，嚟緊我都會對佢差啲，再同你通風報訊，你就試下乘虛而入啦。」J鋒講。

「唉…我都唔知點撚解會識著你…」

「清，我都係為你好咋。」J鋒講。

面對住J鋒怒濤一樣嘅遊說，我無辦法拒絕。

食完餐飯佢拎咗我部電話同我add咗crystal facebook，我已經隱約地預想到嚟緊嘅畫面。

返到屋企之後，crystal已經accept咗我facebook，本來就係佢男朋友好兄弟嘅我，佢會accept都係意料中事。

不過意料之外嘅事係…crystal竟然喺facebook搵我。

「hi，你係晏就阿鋒朋友？」crystal問。

「55」

「要唔要一齊打lol？」佢問。

「而家？晏就先打完咋喎。」我有啲出奇，因為睇佢個level好明顯就唔係成日打嘅人。

「無，我見你打ad打得幾好，想你帶我爬分之嘛。」佢講。

「做咩唔叫阿鋒帶你？」我問。

「我…驚拖累佢…」

「你係佢女朋友嚟架喎，佢俾你拖累下都正常呀下話？」

「咁…你即係唔陪我打？」

「又無話唔得嘅…」我講。

「咁你online啦，我add咗你fd喇。」

「哦…好…」

我真係一頭霧水，唔知點解crystal要搵一個只係見過下面嘅人嚟陪佢打機。

留意返，係見過下面，唔係見過下面。

陣間我同佢玩玩下，J鋒online見到又點解釋好？

不過諗諗下，又使乜解釋咁多，反正佢都叫我試下溝crystal，一齊打lol都算係幾好嘅第一步。

但crystal佢又唔怕俾J鋒見到我同佢打緊咩？

「放心啦，我喺呢度無add阿鋒做fd。」我一開game就彈出呢句訊息。

講得出呢句證明crystal都係少做偷偷摸摸嘅事嘅人，lol有一個觀察模式，可以偷睇自己啲fd打緊嗰場。平時如果我on咗玩緊，J鋒之後先on嘅話，佢多數都會睇我打到完場，咁crystal係我隊友亦都會一目了然。

不過我廢撚事解釋，直接打句ok就算。

cry_taltal邀請你加入組隊房間。

我撳一撳個tic，就入咗去。

有打開lol嘅人都知…一入組隊房間，隻game係會default幫你連咪…

「hellohello聽唔聽到？」喇叭傳嚟crystal嘅聲音，佢把聲出咪又幾好聽。

如果我直接quit撚咗個對話，會唔會顯得我太毒？但我又唔係好習慣打住機對面有條女…我feel到而家我連耳仔都紅埋…

「hi…」最後都係死死氣回應。

「你唔介意開住咪打呀嘛？我覺得咁樣溝通得好啲都易贏啲。」crystal講。

屌如果你係怕我介意嘅做咩唔喺chatroom問咗先？我心諗。

「是但啦…」

「你想我玩咩sup呀？」

「你鍾意啦…」

「咁你覺得我玩邊隻sup好啲呀？」

屌呢兩個問題有分別咩？我心諗。

「牛牛啦…牛牛幾好…」我答。

可能crystal係怕入game前無話題尷尬，佢一輪咀咁問我一啲關於打lol嘅問題，問完呢樣問嗰樣，不過嚟嚟去去都係圍繞住點玩會幫到我多啲，出咩裝會容易啲保到我之類…

搞到我都忍唔住問返佢：

「成日就人，唔辛苦咩？」

crystal無理到我，隔住個咪，就算唔理人都顯得自然得多。

而且我係一個毒撚，又點會敢追問。

所以呢個問題我馬上就收返入個心入面。

嗰晚同佢打咗幾場，都係贏多輸少，輸嘅場合都係因為有啲好撚豬嘅豬隊友，而我地傾嘅話題都係圍繞住隻game，傾下邊啲英難用，邊啲英op，咩英配搭得好，隻game有咩位做得唔平衡等等。

睇嚟係我誤會咗佢係為咗迎合J鋒先搵我練打機，喺呢幾個鐘入面，我感受到佢對遊戲嘅熱衷。因為一個唔鍾意打機嘅人根本無可能喺呢個話題上面講到咁多嘢。

我最初問嗰個問題，就好似從來都無出現過一樣。

直到打完第六場，我同佢都覺得攰、準備休息嘅時候，臨offline之前佢問我：

「你幾多號電話？」

我當堂嚇咗一跳，成晚嘅劇情發展都唔係按我預想嘅套路進行，我覺得有啲不安。

當我睇唔穿對方嘅想法同目的嘅時候，我就會好不安。

自從小學嘅amy事件之後，我開始學識睇人眉頭眼額，我相信憑住徹底嘅觀測，就可以大概知道對方嘅想法，從而喺有事發生之前做好應變處理。

所以一直以嚟我同人相交，都會先保持一個恰到好處嘅距離，喺肯定對方唔討厭我之後，先會慢慢、慢慢同人行近。

而呢個crystal就同阿欣一樣，一嚟就殺我一個措手不及，永遠都唔係按我預想嘅軌跡去行動。

我唔識應對呢類人。

「6xxx xxxx」我無時間思考落去，所以就講咗自己電話出嚟。

佢想whatsapp我？facebook傾唔係一樣咩？

正當我仲諗緊嘅時候，電話已經傳嚟震動。

「喂？」我接聽。

「喂，係喎，我仲未知點叫你好，我跟阿鋒咁叫定係叫你game名…墮落剎神…？」

屌！！！啲咁撚羞恥嘅名佢到底係哪兒來的勇氣讀出嚟！！

「叫…叫我阿飛得喇…個ac名…我…我有解釋架…」

「幾型吖！」

屌你咩…型條鐵？我心諗。

「個名呢…J鋒改架…」

「J鋒？你叫開佢J鋒架？但佢英文名唔係jason喎，點解嘅？佢改你game名又係咩事？」一講起J鋒，crystal就好好奇咁問。

「前排同佢單挑咗場，我輸咗…咪俾佢改咗個咁嘅ac名囉…」

「唔係吖，幾型吖，哈哈！」

「你唔可以因為個名係J鋒改嘅就覺得型架喎！」我講。

「哈哈！點解你叫佢J鋒嘅？」

「呃…你可能要問返佢喎…」

唔通我又話你知，呢個花名同叫佢usb鋒差唔多道理咩…

「佢就係咩都唔同我講…所以…」

「所以你就想同我打聽一啲關於佢嘅嘢？」我問。

「嗯…係呀…我係咪好衰呀…」

「哦…唔係，人之常情啫，條死剷又真係收埋好多秘密。」

「例如呢例如呢？」crystal熱心發問。

「咁我作為佢兄弟，又唔係咁好意思爆佢秘密嘅…」

唔通我又話你知，佢有五個女朋友咩…

「你知啦…佢無啦啦就喺條街到問我拎電話…」

「你又知我知？」我問。

「嗰陣你都喺條街度架嘛，我見到你。」

咁都認到？佢都幾好眼力，不枉我五舊水剪咗個頭，識別度係唔同啲。

「咁…所以呢？」我問落去。

「所以我其實唔係太清楚關於呢個人嘅嘢，不過係因為一時感覺…就應承咗做佢女朋友…」

「咁佢嘅演說係幾有說服力嘅…少啲意志就會入咗佢圈套…」

「你都覺呢！我嗰陣俾佢講講下就說服咗，哈哈…本身諗住試下拍拖都無壞吖，真係唔啱唔夾咪分手囉…點知…」

「點知你比你想像中更加鍾意佢？」我問。

「唉…係唔係因為我掌握唔到佢個人，所以先越嚟越在意呢…」crystal好沉重咁嘆咗一口氣，睇嚟佢真係好鍾意J鋒。

「我見佢對你都唔係話好好咋喎，你都係咁鍾意佢…？」我問。

「啲人咪成日話，男人唔壞，女人唔愛嘅…我起初都唔信，但…唔知點解，佢越對我差，我只會越覺得係自己唔夠好，唔夠了解佢…」

嘩…邊個溝著你真係三生有幸…

「咁你覺得佢鍾唔鍾意你？你知啦，男仔就算唔鍾意，都可以同一個人一齊。」我講。

「你話係唔鍾意，又唔係…有時都好sweet架…佢會俾啲小驚喜我…又會氹我笑…不過有時我想對多佢一陣，佢就會開始惡…」

噢，即係傳說中嘅糖果與鞭子，俗語中嘅一啖砂糖一啖屎。

「其實你自己都有答案啦。」我講。

「咩答案？」

「你想離開佢，但又離唔開。」我講。

「…或者都係嘅…」

「其實你自己都清楚，佢唔會係一啲因為你做嘅任何嘢而改變嘅人，你嚟搵我，都係確認呢點啫…」

「但…」

「但你又唔死心，覺得等落去佢一定會變好，覺得終會有一日令佢剩係望住自己，係咪？」

「嗯…」

「咁我問多你一次，成日就人，唔辛苦咩？」

「我唔知咁樣係唔係辛苦…我啱先唔答你係因為我唔識答呢個問題…一直以嚟我都覺得只要我付出，人地開心，我就開心…但對住阿鋒…我已經乜都就晒佢…但…」

「但當你發覺，你得唔到你想要嘅回報，你就唔甘心，係咪？」

「我只係想佢好好咁望住我…陪我多啲…而家啱啱開始，已經一個禮拜先見得一日，我真係唔知點樣行落去…」

我計一計，五個女朋友一人一日，我一日，休息一日，條死仔啲時間又分配得幾好…

「咁你想同佢分手？」我問。

「我都唔知…」

「咁你想等佢？」

「我都唔知…」

「定你想搵我嚟激佢，睇下佢有咩反應？」

電話嘅另一邊，crystal靜咗。