Tinder05
「點呀飛少，有無領悟到啲咩？」J鋒同幾個女仔道別之後返嚟問我。
「靚仔大晒。」我講。
「唔係重點，你回想返啱先嘅畫面先。」
「然後？」
「有無發覺嗰五舊水喺咩位發揮出價值？」佢問。
「無。」
「咁係因為我成功抄到佢牌啫！你試諗下，如果我啱先fail咗，咁我會點？」
「有咩點，你呢啲仆街仔轉個頭就去搵下個target啦！」我講。
「就算係我，都會或多或少有創傷嘅…」J鋒講。
「咁到底關用五舊水剪個頭乜撚嘢事呀？」我嬲嬲地問。
「關鍵就係在於，當你衰咗之後，你就可以同自己講：「屌，我個頭剪咗五舊水喎，條女唔撚識貨，係佢走寶！」咁樣就自自然然可以好快收拾心情，搵下一個target落手。」佢講。
我呆一呆，然後講：「你都幾撚戇鳩架喎。」
「我同你講咗幾多次啫？心態呀，係心態！我做嘅所有嘢都係令自己喺心態上立於不敗之地！俾女飛？一定係條女唔識貨。俾女請食檸檬？一定係條女鍾意食洋腸！嗰五百蚊係用嚟upgrade你嘅自信心架，you know！」J鋒講。
「你不如咪撚讀大學，直接去做倫敦金啦。」我講。
「話時話我諗住考返個保險牌，有無興趣一齊？」
「吔屎啦你。」
「到時幫手買份人壽好喎。」
「吔屎啦你。」
之後我同J鋒去到街尾一間茶記，諗住嘆個tea再返屋企。
正當J鋒食緊佢隻炸脾嗰陣，肥婆真係搵我！
「做緊咩呀？」肥婆問。
「無呀，同個fd喺茶餐廳食緊下午茶。」我講。
「你地讀緊書？今日dayoff？」肥婆問。
「係呀，你呢？」我問。
「我都係呀，你地邊間u架？」肥婆問。
「city囉，你呢？」我問。
「我bu架，鄰居喎原來係！」肥婆講。
「係呀…真係橋喎，哈哈！」我講。
「你地讀咩科架？」肥婆問。
「我同佢唔同系架。」我講。
「哦…」
然後我已經唔知再點撚樣延續話題。
呢種對話真係好撚無謂，知道對方咩u讀咩系又點呢？學術交流呀？定係睇下對方係唔係讀乞食科，再判斷發唔發展落去呢？再講，做緊咩呀呢個問題已經無聊到痴線，我做緊咩又點呢？咪又係放低晒手頭上嘅嘢覆你message，唉，點解無人好似阿欣咁，從來都唔傾多餘嘢…
「我直覺話我知你諗緊啲好撚毒嘅嘢。」J鋒講。
「咁你直覺錯咗喇！」
「真係唔係？」
「唔係。」
「咁等我估下你諗緊咩…um…你一定係諗緊同肥婆傾啲嘢好無謂，好多餘，唔知為乜呢？」J鋒講。
「屌你，咪做保險，去做動物傳心師啦。」
「哈哈，都話你毒架啦！好心你啦！第二日傾偈你想傾得幾深入呀？呢個世界上面有樣嘢叫必要的多餘，呢啲廢話傾嚟都多餘就你知我知單眼佬都知，但都要傾架嘛，就好似上lecture咁，有幾多個真係返去聽書？咪又係為咗attendance。」
「諗諗下，你都係應該去做人生導師。」我講。
「我有無講過我嘅夢想俾你知？」J鋒突然之間講。
「無，係咩？」
「係食軟飯，哈哈哈哈哈！」
「真係偉大嘅夢想。」
「多謝。」
返到屋企之後，我打返開同肥婆嘅對話，再次思考咩係「必要的多餘」。
「我返到屋企喇。」我喺對話框輸入。
「咁早？今日唔去飲酒嗱？」肥婆秒回我。
「唔啦，尋日先飲完。」
「唔係失戀要借酒消愁咩？」
「如果酒真係有用就好…」
「咦，你同你今日晏就講嘅嘢唔同嘅？」肥婆問。
仆街，中伏，我嗱嗱臨碌返上少少睇下J鋒講過啲乜，而家點兜好？
「可能剪完頭髮，轉換咗心情掛…哈哈。」我直接亂鳩咁嚟算，反正應該無咁易就悉穿係兩個人。
「剪完頭髮反而消極咗喎。」肥婆講。
屌，呢個肥婆真眼利。
「係咩…哈哈，可能剪得太短掛。」我一兜再兜。
「男仔梗係清爽啲好睇啲啦！」睇嚟我成功轉換話題。
「錯喇錯喇。男仔梗係靚仔好睇啦！咁先係正解。」
「哈哈！你而家好唔得咩？」肥婆問。
「係秘密。」我講。
「好唔公平囉，我啲相就show晒出嚟。」
「有咩公唔公平架，要大家like大家先match到架喎！」我講。
「係呢，你點會全部都放風景相嘅？」肥婆問。
「希望識啲唔好以貌取人嘅人。」我開始鳩噏。
「啱啱先失戀，咁快想識其他女仔？」肥婆問。
「識朋友啫，哈哈…」唔通我同你講係因為練溝女咩…
「我都希望識啲唔以貌取人嘅人，所以先放相出嚟。」肥婆講。
「你多唔多match？」我好奇一問。
「唔多呀，哈哈，有時match咗我say完hi都係無response。」肥婆講。
「咁我咪算同你好傾囉？」
「係架，哈哈。」
我而家開始有啲明J鋒所講嘅心態係乜嘢，同肥婆一路傾偈嘅過程好自然，我唔使留意住佢幾時覆，唔使擔心佢覆唔覆，唔使在意佢係唔係hea覆，我想搵個人講嘢就搵肥婆，有時無啦啦唔想覆就唔覆，諗唔到點覆就唔覆…
但如果係對住自己鍾意嘅對象，都可以做到咁自然咩？
今次因為隔住個mon嘅係肥婆，而佢原本只係一個網絡上嘅陌生人，就算無啦啦失去咗聯繫都唔會覺得可惜，所以我先可以咁自然啫？我又可以點樣將呢份自然應用喺阿欣身上呢？
我望住眼前嘅對話框，尚未參透到呢個道理。
「咁你因咩事失戀？我可以做你樹窿架喎。」肥婆見我無應佢，就繼續問。
「無呀，原本同一個女仔關係幾好，點知表白嗰陣衰咗。」我講。
有時候，對住網絡上面嘅陌生人，反而更容易講出自己嘅秘密。
「有幾好先？定係你一直會錯意咋？」肥婆問。
「好到旁人會以為我地係一對嗰種程度掛，我都唔知…」我講。
「有時女仔係咁架，就算係鍾意，但都唔想謬謬然開始一段關係。」肥婆講。
「乜係咁嘅咩？但一拒絕就朋友都無得做架喇喎。」
「朋友都無得做係你單方面嘅想法啫。」肥婆講。
「唔通真係以為拒絕咗我之後，我地仲可以好似以前咁咩？咁會唔會太自以為是？」我問。
「咁如果對方係未準備好嘅，話可以同你做返朋友已經係最大嘅讓步啦。」肥婆講。
「咁我點先知道佢係唔想拍拖，定係唔想同我拍拖？」
「哈哈，我點答你呀？呢啲嘢你同佢相處咗咁耐都唔知，我點會知？」
「咁又係…」
「最重要嘅係你覺得佢係咩人，唔好下下都boyfriend or nothing咁逼人至得架嘛。」肥婆講。
「但至少都俾我知道佢對我有無意思呀嘛…」
「唔係個個女仔都會講出口架嘛。陣間講完你又逼人要一齊，咁點好？」肥婆講。
「唉，我都唔知…」
「話時話…」
「？」
「我鍾意剪完頭髮嘅呢個你多啲xp」
見到肥婆呢句嘢，我差啲嚇到跌咗部電話落屎坑…
不過定啲嚟，就算知道係兩個人咁又點，tinder嚟啫tinder嚟啫。
我下意識撳咗肥婆個icon出嚟望，心諗：其實都唔係咁差啫。
我打開同阿欣嘅whatsapp視窗，佢嗰句一直只係當我朋友不停喺個腦入面迴響，我始終都係無辦法面對佢…
呢個時候，J鋒傳嚟訊息。
「做咩望住whatsapp發呆呀？」J鋒問。
「屌你識讀心定係有透視眼呀？」
「見你一直都在線上，傻嘅都知你係望住同嗰個阿欣嘅對話視窗發呆啦。」J鋒講。
「你唔俾我同其他人傾偈嘅？」
「你有撚其他朋友咩，你識嘅我都識架啦，而家個group又無人講嘢。」J鋒講。
「咁你又做咩無啦啦撳入我whatsapp裝我呢？」
「我係想問下你同肥婆傾成點啫，點知見到你online咪9up兩句先。」J鋒講。
「無呀，都係講啲廢話。」
「cap出嚟睇下啦。」
「等等…」
我撳返入tinder，望返同肥婆傾偈嘅內容，都無咩特別啫，所以就cap晒俾J鋒睇，反正都係由佢嚟決定我合唔合格。
「點呀，有無咩體會？」J鋒問我。
「咪好似同普通朋友傾偈咁囉。」我講。
「我見你地都傾得幾自然吖，keep住。」
「咁係因為佢係個肥婆，我先可以咁自然啫。」
「nonono，唔係因為對方係肥婆你先可以自然，而係因為對方係肥婆，你對人無感覺，所以你先可以自然，重點係有無感覺。如果你鍾意咗個肥婆，咪又係一樣唔識點樣處理。所以，繼續溝個肥婆啦，就算幾無感覺都好，落力去溝一個人嗰陣點都會產生一啲感情，咁樣你就可以慢慢熟習點樣自然咁同一個有感情嘅人溝通溝通。」
「你講到好複雜咁，不過如果講感情嘅話，就算唔係溝佢，只係普通朋友，都已經有感情啦。」我講。
「咁你溝下人，感情咪更加深厚囉！到時你就會喺在意同唔在意之間嘅邊緣徘徊、掙扎，最後熟習。」
「都唔知係咪…」
「我幾時老點過你？」
「周不時。」
「屌你啦，唔同你講，我約咗人，898。」
唉，睇佢個樣又係約咗女啦。佢有女，我都有肥婆。
我再打返開tinder，見到其實都幾多女like咗我，話晒我都係塞咗九張風景相嘅神秘人，不過同時間我都唔想handle咁多個chat，再講…我唔係太識同陌生人打開對話匣子…
所以我又再撳返入肥婆個chat room，望住佢嗰句「我鍾意剪完頭髮嘅呢個你多啲xp」諗咗好耐。
唔通佢真係知道咗係兩個人？
「咁剪頭髮之前嘅我係點架？」我輸入對話框。
「講嘢無咁真。」肥婆講。
「即係話我講大話？」我問。
「唔係，而家呢個你講嘢真啲，似係講緊心嗰句，一開始嘅你就唔係。」肥婆講。
「哦…多謝你。」
「做咩無啦啦多謝我？」肥婆問。
因為你係第一個揀我而唔揀J鋒嘅人。
當然，我講唔出口。