第十八章
KATHY今日一滴酒都無飲過，一反常態。
到底係佢喺我面前多咗戒心，定係因為佢唔再需要酒精嚟麻醉自己？
唉。
當我越同KATHY接觸得耐，我就越難喺愛意中抽離……
真係好難，真係好難，真係好難。
「不如，散個步先？」我提出。
只要係喺佢身邊，我就感覺到幸福……
一種會令人心酸嘅幸福。
我已經知道我離唔開佢，所以，喺佢決定同佢男朋友結婚之前，我選擇咗做兩件事。
- 每日祈禱佢地分手。
- 爭取多啲逗留喺KATHY身邊嘅機會，用作日後回憶。
「好呀……」佢答。
最後我地行咗去某個公園，喺某張櫈到坐低咗，中間隔住30CM嘅距離。
「其實，你真係唔應該放棄畫畫。」KATHY講。
「其實，你都唔應該放棄小提琴。」
「點解你係都要講埋我！」KATHY有少少嬲。
「咁點解你要叫我唔好放棄，而自己又放棄得咁輕鬆？」我衝口而出講咗呢句，然後先後悔。
「輕鬆？你真係覺得輕鬆？」
我知道，對於KATHY嚟講，呢個絕對唔係一個輕鬆嘅決定，但我只係唔明，點解要鼓勵我，又放棄自己……
唔通佢又唔知，我重視講多過重視自己？
唔通佢又唔知，我嘅夢想，就係佢嘅夢想？
「SORRY，我太激動……」KATHY講，睇嚟我仲未係一個可以俾佢喺面前任意發脾氣嘅人選。
「SORRY……我講錯嘢……」
「唔係……總之，唔好再講我，你不如畫返畫啦！」
「我有畫。」
「唔係得閒先畫呀！而係全心全意，全神貫注咁畫！抱住一定要喺藝術界打響名堂嘅意志去畫！」
「難啦……」
「世上無難事呀！！！」
世上無難事？咁係唔係代表我可以追你？係唔係代表你會鍾意我？
世上，根本有好多做唔到嘅「難事」……
「點解你要咁鼓勵我？」我問。
「因為……」
「因為啲咩？」
「因為你真係畫得好好！」
「你拉小提琴都拉得好好。」我又再不經意咁刺激咗佢。
「唔係……你唔明架喇……」
「你唔講，我緊係唔明！」
「當每個人全情投入咁去做一樣嘢嘅時候，去到盡頭，就會遇到叫才能嘅屏障……我知道自己嘅極限喺邊，先選擇放棄，但你唔同呀，你嘅畫話俾我聽，你可以畫到好遠，好遠……」
「但係，我聽你拉小提琴聽到喊，你感動到我……」我毫不修飾咁表達自己嘅聽後感。
「車！誇張！」KATHY半信半疑。
「我講真！」我擰去左手面，用堅定嘅眼神望一望佢。
我地喺一瞬間四目交投，然後同步快速移開眼神。
個心跳得好撚快……
「嗯……信住你一半先啦……」
「我真係講真！」我再重覆。
「咁呀……信埋你另一半囉……」
唔知係唔係我幻覺，KATHY好似坐埋咗少少。
「咁你會唔會考慮，再開始過追尋呢個世界夢？」我問。
「咁你呢？」佢問返我。
「對我嚟講，有一個人欣賞我嘅嘢就夠。」
其實我係想講：「有你欣賞我嘅嘢就夠。」
因為你，就係我嘅世界。
「邊個？」佢窮追不捨。
我答：「……」
嗰晚之後，我攞咗幾日假去台灣。
踏上一個人嘅旅途。
飛機起飛，都帶唔走我留咗喺香港嘅心。
我鍾意一個人去旅行，尤其係，當有啲嘢諗唔通嘅時候。
喺呢個故事最開始嘅時候已經交代過，我自問係一個非常平凡嘅人。
同一啲天生就係社會上面嘅翹楚唔同，我對好多事，都缺乏瞬間決策嘅能力。
諗唔開，諗唔通，就去旅行，係我一貫嘅解決手法。
喺陌生嘅旅途上面，遇上唔同嘅陌生人；
探索陌生嘅路，思考旅程上嘅每一步點樣行……
似乎，可以令心靈踏實少少。
有樣嘢我覺得諷刺嘅係，我竟然喺一個陌生嘅地方，獲得安心嘅感覺。
睇到呢度嘅大家，一定好想知嗰晚最後我到底講咗啲咩。
我唔直接答你，我用例子答你。
假如你係一個歌手，你會想喺小巨蛋開個爆滿嘅演唱會，定還是想喺一間屋入面放聲咁剩係唱俾一個人聽？
無錯，聰明嘅讀者們應該睇得出呢條係一條誤導性問題。
點解間屋嘅嗰個人唔可以去埋小巨蛋到聽呢？
以上，係KATHY俾我嘅答案。
至於我講咗啲乜嘢……
我想喺度留個靚白先。
至於點解我過咗嚟台灣……
其實係因為，嗰晚發生嘅一件事。
30,29,28,27,26,25,24,23,22,21,20,19,18,17,16,15,14,13,12,11,10,9,8,9,10,11,12,13,14,15,14,13,12,11,10,9,8,7,6,5,4,3,2,1,0……
如果估唔到，可以睇返上一篇。
之後再揭曉。
嗰晚，我同KAHTY嘅距離由30CM去到0，不過，無大家期盼中嘅親密行為。
佢無錫落嚟，甚至乎連靠落我膊頭都無。
我地只係兩個人，肩貼肩咁坐喺公園張長櫈上面。
澄清一點，我由坐低嗰刻起，就無移動過自己個屎忽半吋。
呃……或者有，少少啦……
不過主要都係KATHY靠近我。
喺佢嘅衣領掂到我嘅手臂嘅時候，我承認，我係按捺不住，向佢靠緊咗啲啲。
佢無避開到。
我向右方施加一啲啲力道，感覺到佢柔軟嘅手臂，佢亦都用返少少力嚟反壓我手臂。
這麼青春這麼甜嘅場景，竟然唔係發生喺學生生涯，仲要係發生喺一個有男朋友嘅女仔上面……
我實在唔敢相信眼前嘅一切一切，因為呢件事實在令我個心跳得太快，亦令靈魂暫時離開咗肉體。
有人話，當一個人發夢嘅時候，靈魂就會短暫離開肉體……
咁樣，喺嗰一刻，我可能係發緊夢都未定。
不過，KATHY嘅體溫、手臂嘅觸感、佢頭髮因為被風吹起而為我帶嚟嘅搔癢感等等，都話緊俾我知，呢個係一個既真實又夢幻嘅現實。
「長長的路上我想我們是朋友……如果有期待我想最好是不說……你總是微笑的你總是不開口……世界被你掌握……」我唱起五月天嘅純真。
因為歌詞，真係填得入心入肺。
我憑歌寄意，希望得到KATHY一啲回覆。
結果，一夜無語。
我地坐咗幾耐？
真係唔知。
我望住佢放喺大脾上面嘅手，有大概六萬八千三百一十九次左右想捉實佢，然後否決咗自己六萬八千三百二十次。
我連諗都唔敢諗多次，就否決咗自己。
KATHY成晚都無再講嘢，係佢內心在掙扎，定還是怕拒絕我之後會被我報復？
今次我比較有自信地推斷係前者。
但一晚過後，佢始終無做出決定。
我唔想逼佢，所以，離開咗有佢嘅土地，去咗轉台灣。
襯呢次旅程，沉澱，消化，思考……
如果返到去，KATHY又當返我係普通朋友，或者又再唔理我，我應該點做呢？
我要喺旅途上得出一個答案。