Tinder24
同crystal打咗成晚機，言談之間都feel唔到佢有唔開心…
不過正正因為feel唔到，我先擔心…
點解擔心？擔心啲咩？其實我自己都唔係咁清楚…
我剩係覺得，唔希望佢因為J鋒而傷心，唔希望再見到佢喊。
「點呀，你嗰次趕唔趕得切去同人約會呀？」crystal打完機之後繼續同我吹水。
「哈哈…遲咗…不過佢好好人，無怪到我。」我講。
「咁就好，幾驚搞到你放人飛機。」
「其實我唔好意思就真…明明你咁唔開心，但都無陪到你…」
「哈哈，傻啦，明明係你約咗人都趕過嚟，仲同我講唔好意思？」crystal講。
「你好似無咩嘢喇喎…真係ok嘛？」我問。
「嗯…發生咗啲事…我睇開咗好多…」
「咩事？」我衝口而出之後先覺得我唔應該追問…
「唔…不如電話講？」
「哦…好…好呀…」
「咁你打俾我啦，我offline先～」crystal講。
我拎出部手提電話打俾crystal，發覺原來已經夜晚十一點半，同crystal打咗成三個鐘機，而呢三個鐘入面，J鋒一次都無搵我…
唔知係咪仲用我個方法搵緊miss lin嘅線索…
嘟…嘟…
「喂。」
「喂crystal吖唔該…」
「哈哈，你真係次次都要咁講架喎？乜仲會有其他人聽我部電話咩…？」crystal講。
「慣咗…signature嚟嘅…」
「笑死，你真係好唔似係阿鋒朋友。」crystal講。
「係咩…咁點先似…？」
「唔…我都唔知呀…但你同佢好似兩個極端咁。」
「即係點…？」我再追問。
「如果話，阿鋒係雲，無形狀，好模糊，咁樣…你就係雨，好清晰，好明確…哈哈…其實我都唔係好識形容…」
「但雨都係由雲以嚟…都叫係水份吖…」
「唔…所以咪話我唔係好識形容…哈哈…不過即使都係水，但都係兩種唔同嘅形態，所以我先會咁諗。」crystal講。
「係呢…你啱先講嘅…係咩事？」我問。
「唔…講起真係一疋布咁長…最近我家姐搬咗返屋企住…」crystal講。
「下？乜原來你有家姐架？」
「乜呢樣係重點咩？」
「唔係唔係…你繼續…」
「佢好多年前就已經搬咗出去，同男朋友同居，早幾年結咗婚，我見佢都生活得幾好…」crystal繼續講。
「咁點解搬返嚟你嗰度嘅？」
「佢話佢已經唔愛佢老公…所以搬返嚟諗住俾啲空間自己，諗下之後嘅路點行…」
「咁所以你覺得…呢個世界無嘢係必然…？」我問。
「佢地由拍拖到結婚，都成十年時間…我以為佢同姐夫可以行到一生一世…但原來…唉…係咁脆弱…」crystal嘆息…
「咁我諗返自己…同阿鋒相處不過係幾個月時間…同十年相比根本不值一提…我諗咗好多，諗佢係咪真係嗰一個呢…？定我只係被霎那間嘅感覺蒙蔽呢？消化咗之後，就發覺諗起佢嘅時候無咗咁痛…唔係唔痛，但已經唔係嗰種撕心裂肺到抖唔到氣嘅感覺…」crystal講。
「咁都係好事嚟嘅…唔再執著，先可以搵到更好嘅下一個…」聽完crystal講我有啲感同身受，或者我對阿欣都係一樣都未定…
「嗯…同你傾完之後，仲舒服多啲添！」crystal講。
「大家咁話，哈哈…」
「下次約你出嚟食飯吖～」
「下？哦…好…」
「嘩你好似好唔想咁嘅？」crystal問。
「唔係唔係…只係覺得有啲匪夷所思啫…明明我地以前嘅關係係建基於J鋒之上，估唔到而家少咗佢，我同你都仲可以係朋友…」我講。
「哈哈，咁都叫係一種緣份吖～」
「嗯嗯，咁再約啦…」我講。
「後日你得唔得？」
「咁突然？」
「擇日不如撞日呀嘛。」
「都得嘅…」
「咁約定你後日啦，詳情whatsapp再傾～拜拜～」crystal講。
「拜拜…」
收線之後我呆咗咁望住部電話，一諗起後日同crystal有約，個心就不受控地小鹿亂撞…
我到底搞乜撚…？
就喺呢個時候…J鋒whatsapp我…嚇到我屎都飆埋…
「我搵到喇！！！我搵到miss lin喇！！！」
唔撚係掛？
喺一間東區嘅學校網頁到，我搵到miss lin個名。
當然我唔排除係同名同姓，不過即使機會再低，我都唔想再放過。
講真，如果真係俾我見到佢，我都唔知點樣開口打招呼，亦都唔知同佢講咩好。
我點解要搵佢？
我期待搵到佢之後點？
過咗好幾年，話唔埋佢仔都生咗，我仲搵佢做咩？
我都唔知。
但我心入面隱約覺得，我一定要見多佢一面，見多佢一次，好好面對面咁傾一次。
或者佢生活得好幸福，或者佢甚至已經唔記得咗我…我都唔在乎，我剩係知，無論如何，我都想再見佢一次。
「下？你喺邊度搵到？」我老死whatsapp我，因為我啱啱同佢講咗我搵到miss lin嘅消息。
「一間東區學校嘅校網。」
「屌呀？你到底搵咗幾多間學校？」佢問。
「無數到喇，我覺得你個方法work，所以搵完屯門啲學校就逐區逐區搵，總之最後就搵到啦！」
「屌…香港咁撚多間中學…你真係痴撚線…」佢講。
「我…今次真係好想見返佢…」我講。
「點解？佢婚都結咗…其實你期待啲咩？」
「我都唔知，但…係一種非見不可嘅信念。我甚至唔care佢會唔會因為咁而討厭我，我剩係想見到佢。」我講。
「屌，大情聖，你早排仲揸緊五條女喺手喎！」佢講。
「可能俾你感染咗啦屌，你咁撚專一。」
「收皮啦，最撚專一嗰個係你。」
「祝福我。」
「唉我都唔知講咩好，如果你成功，即係代表會有另一方受到傷害。不過你係我兄弟，我點都撐你。」
「多撚謝。」
聽日係星期五，我決定喺嗰間學校嘅放學時段去等佢。
呢晚我成晚都瞓唔著，喺miss lin結婚之後，我拍過幾多次拖連自己都數唔清，點樣溝女，點樣氹女，點樣留住條女，諸如此類嘅方法我多到可以出幾本書去講，但當個對象係miss lin嘅時候，我完全唔知點樣做。
我係咪期待緊佢對我仲有感覺？我係咪希望拆散佢而家有嘅家庭？
如果我真係要答自己，我會話係。
因為我真係好撚鍾意佢，我無辦法喺其他人身上搵返嗰種感覺，即使要踩住唔知幾多人嘅屍體，我都想同佢一齊。
天荒地老。
我要同全世界講，我今生今世，剩係愛林家欣一個。
愛，始終都係佔有。
呢晚時間過得好慢，我隱約見到日出嘅光之後終於模模糊糊瞓著咗，瞓醒嗰陣下午兩點，我即刻跳落床梳洗、gel頭、噴少少香水，希望以最萬全嘅自己去見miss lin。
落樓，跳上的士，直飛一間柴灣嘅學校。
「xxx學校呀唔該…」
「收到。」
的士剷上東區走廊，維港景色映入眼簾，對上一次搭的士，已經係出席miss lin婚禮嗰次…
仲記得嗰日嘅天氣好熱，個天得一片孤雲，教堂冷氣開到好大，miss lin笑得好開心…
「箍煲呀？」的士佬無啦啦開口問我。
我都唔知點樣答佢。
「唔係呀…」
「見你生得咁靚仔，又真係無咩箍煲機會嘅…但見你屙屎唔出咁嘅樣，同我之前有個客一模一撚樣，我先多口問句啫…」的士佬講。
「唔係呀…有心…」
「有咩煩惱呀後生仔？」睇嚟呢個係個多口水嘅的士佬。
「無呀…」
「唉，男人唔係煩錢就係煩女架啦！你咁後生，應該無咩錢銀煩惱，咁一定係煩女，但你又咁靚仔…我實在諗唔到你會因為女而煩，唔好怪我多口呀，我好奇問下咋。」的士佬講。
「唔會…唔會…」
「咁都俾我講中？真係煩女呀？講嚟聽下啦，無睇我而家咁呀，後生嗰陣都有你九成咁靚仔，迷成萬千少女架！」
「真唔真呀？」我望一望後鏡入面嘅的士佬，半信半疑。
「屌，你落咗車我就唔識你啦，昆你做乜鳩？」的士佬講。
「咁…你後生嗰陣有無試過鍾意大過自己嘅女仔？」我問。
「識食喎靚仔！姐姐好嘢嚟架！嗰陣我有個女朋友，大我四年呀！」
「咁…點先可以令對方唔好當自己係細路仔？」我問。
「屌，你生得咁靚仔，嘥咗喎！咁簡單都唔識？」的士佬串鳩我。
「講你就講啦。」
「屌，梗係買花啦！你咁撚靚仔，再送紥花俾人，有咩女唔嗒糖？」的士佬講。
「屌，堅唔堅呀？」
「你見啲花舖開到周街都係，唔係無原因架，你估啲人日撚日拜山咩？咪就係因為啲女鍾意之嘛，有需求先有供應呀，you know？」的士佬講得頭頭是道，不無道理。
我望一望電話個鐘，驚錯過miss lin間學校放學時間，雖然佢唔係嗰啲一打鐘就走嘅老師，但穩陣起見…
「嗱，我有間相熟花舖，而家幫你打電話去留一紥，兜一兜入內街頂多咪用幾分鐘！呢幾分鐘分分鐘係你一世嘅幸福呀世侄！」的士佬講。
「屌，就咁話！」
的士佬無昆鳩我，兜入內街之後，佢呠咗兩聲個咹，花舖士頭婆就拎咗紥玫瑰出嚟，成個流程一氣呵成，去到間學校嗰陣，仲未打鐘放學。
「努力喇年青人！」的士佬臨走之前仲鼓勵我。
的士佬，多謝你。