Tinder23
2k1q？
眾所周知，2k係一個籃球遊戲系列，我知道2k11，2k12，2k13，2k14，而家仲出到2k20，但我從來都無聽過2k有出過1q呢個版本。
…
係喇係喇，唔扮喇…
即使我只係一個小毒撚，亦都知道2k1q嘅意思，由著住呢一身裝束嘅ashley講出嚟，我不禁諗一諗自己戶口仲有幾多錢剩…
心水清嘅你應該仲記得，無幾耐之前我用咗差唔多五舊水嚟剪個頭，再之後又用咗五舊水嚟買花加搭的士搵crystal，又同肥婆食咗餐燒肉放題…所以作為一個間中返下補習兼職嘅大學生，實在無咩錢剩。
不過，我拒絕ashley嘅理由絕對唔係因為我無錢，絕對唔係。我重覆，絕對唔係。
而係，喺佢講嗰句說話嘅時候，我個心浮咗個絕對唔想對唔住嘅人出嚟。
「篤咩波要成2k1que呀？哈哈…」我詐傻扮懵。
「哈哈哈哈！」ashley笑到收唔到聲，係今日第二次開懷大笑，我實在想像唔到只要我拎兩千蚊出嚟就可以任意摸勻佢全身上下每吋。
我下意識吞咗啖口水，成個人開始有啲唔冷靜…視線開始唔規矩地喺佢身上移嚟移去…望住佢玲瓏浮凸嘅身材…雪白剔透嘅幼嫩肌膚…屌…屌…屌…唔屌得呀！！！！
早知今朝就食個飛機餐先出門口啦…嗚呀…J鋒…help…
「傻仔，處呀？」ashley問我。
屌…咁你都睇得出我係傻仔？
「關…關…關唔關你事…」屌我開始口疾…
「睇得出啦。我見同你幾夾先收咁平咋，平時我收…」佢舉起五隻手指。
即係5k？屌…而家一半價錢都唔使，就食到平時叫價5k嘅高級雞…
媽呀…我就嚟把持唔住喇…
「點呀，我唔係個個都約架，deal or no deal？」ashley不停進擊我嘅小飛飛，實在令我心癢難耐…
主呀…求你賜我一條出路…擺脫眼前嘅困局…
哈利路亞…
「喂飛少！」身後傳嚟一把熟悉嘅聲音，聲音嘅主人一嘢搭住我膊頭，係耶穌…唔係唔係…係J鋒！
J鋒竟然喺呢個危急關頭出現，實在令我喜出望外。
「喂～咁啱嘅？」我扮晒嘢咁應佢。
「係呀，呢個新女呀？唔介紹我識嘅？」J鋒講。
我望一望ashley，見到佢眼都甘埋咁望住J鋒，好明顯佢嘅視線入面已經無我。
「呢個ashley，呢個J鋒…」我幫兩邊做介紹。
「hi，我係ashley。」ashley再自我介紹多次，仲刻意地烏一烏低身，露出迷人深溝…
屌…靚仔多好…
我好肯定，如果係ashley同J鋒開價，應該係免費，連爆房錢都aa制。
「hi。」J鋒好撚cool咁回應，唔將ashley放在眼內。
「喂你地拍完拖未，有嘢想搵你幫手。」J鋒同我講，好明顯係想救走我。
「我地啱啱識架咋…」ashley連忙解釋…屌…早兩三分鐘佢仲開咗價打算俾我屌，而家已經扮晒上菜，女仔真恐怖…
「係呀…咁我地下次再約啦，我去幫佢手。」我講。
「哦…咁…咁…咁好啦…拜拜…」ashley好明顯想拎J鋒contact，但奈何我喺度，佢唔知點開口好。
而J鋒依舊對啲女都係嗰種不可一世嘅態度，況且ashley又名正言順真係一隻雞，所以依然係無理到佢。
「咁我地行喇。」J鋒同我講完之後就捉住我帶咗我走。
J鋒就一路捉住我行過旺角街頭，幾撚浪漫。
我無回到頭望ashley嘅表情，但我知道一定係發姣咁款，仲應該喺度諗緊點解tinder match嗰個係我唔係J鋒，不過，who cares？
呢一刻，我嘅世界只有J鋒。
hehe…
J鋒捉住我行咗兩條街，我心諗佢係咪中途轉基之際，佢就放開咗手喺度喪笑…
「你啱先係咪諗住同佢爆房？」J鋒一路笑一路講。
「屌…咁你都知佢係雞？順風耳？」
「以前因為一啲原因…學識咗睇少少口型…」J鋒講。
「你條仆街匿埋一二邊，見到我咁撚不知所措都唔出嚟救我？」
「最後咪救咗你出嚟囉…」J鋒講。
「唔好再遲啲！？」
「再遲啲咁點先？你係咪就按捺唔住同人爆房？2k抵玩啦咁高質。」J鋒講。
「咪玩啦…雖然係好心郁…但我唔會囉…」
「點解？你又無女，怕咩？」
「我都唔知…總之我唔想咁樣…雖然ashely真係好正…又白又滑…」
「不過我諗佢都係一半講笑一半認真，佢雖然似係雞，但又唔似係雞。」J鋒講。
「你睇人不嬲好準架喎…點樣又係雞又唔係雞？」我問。
「唔知…直覺。今晚返去你tinder同佢傾兩句？」
「都係不了…陣間又問我2k1q要唔要，我真係把持唔住…」我講。
「不過你同佢出咗半日街，有無領悟到啲乜嘢？」J鋒問。
佢咁樣一問我先記起，今次出嚟赴會係要訓練對女嘅態度，我諗一諗自己嘅表現，發覺好似自然咗，無咗咁緊張。
「好似自然咗啲咁囉…」我講。
「咁已經好大進步啦，即使對住件咁索嘅女都係比以前對住普通女仔自然…幾好幾好。」J鋒講。
「其實不如唔好繼續啦…」我講。
「唔好繼續啲咩？訓練？玩tinder？定係追返阿欣？」J鋒問。
「…其實阿欣對於我嚟講，係唔係真係咁重要？」我已經唔知第幾次咁樣問自己。
「如果佢係越嚟越唔重要，你先容易追返人呀！」
「但如果佢越嚟越唔重要，我追返佢做咩…」
「報仇囉！佢當你傻仔咁玩喎！」J鋒講。
「唉…我都唔知…我覺得…佢喺我心目中仲係好重要，但又好似無咗以前咁重要…我知道自己仲係好鍾意佢…但又好似無咗非佢不可嘅感覺…」我講。
「講真，唔好諗咁多啦，想有答案，就一定要追返人。」
「唉…到時先算，我而家連搵佢嘅勇氣都無…」
「吖，咁就啱喇…講起勇氣…你知唔知我啱先撞到邊個？」J鋒問我。
「我撚知咩…講你就講啦。」
「我撞返一個小學同學。」J鋒好撚古惑咁講。
我個腦剩係浮現出一個人。
「八婆amy？」我問。
「無錯，就係條死八婆amy。」J鋒講。
remind一下睇緊呢個故嘅大家，amy即係小學借選舉嚟欺凌我嘅嗰條八婆，我呢世都記得佢個臭閪樣。
「幾時嘅事？」我問。
「啱先之嘛，佢一眼就認得我，仲主動過嚟同我打招呼，好似完全唔記得小學嗰陣我落佢面咁。」J鋒講。
「點會唔記得呀，嗰次佢俾你串到棟都無喎，慌死佢而家唔係發姣咩…可能想溝你呀！」我講。
「點呀你，要唔要試下越級挑戰？我啱先同佢交換咗contact，諗住派得上用場。」J鋒講。
「好！」我一口答應，如果係其他女，我多數都諸多推塘然後先半推半就咁順J鋒意，但唯獨呢個amy，同我有不共戴天之仇，我敢講我往後長大成為一個毒撚，有好大原因係因為佢，所以既然而家有機會，我一定要報返仇，落鳩佢面！
「講得好！一於報返小學個仇，落鳩條八婆臉！」J鋒講。
「但…要點做？」
Task 2.5 Amy
「我諗住搞返個小學同學gathering…」J鋒講。
「下？你同邊啲人有聯絡？」我問。
「無架，amy同你囉。」
「屌，三丁友？」
「係呀，夠做啦。」
一講起三丁友，我不其然諗起一啲唔好嘅回憶…無錯…就係諗起我、J鋒同crystal三個錯綜複雜嘅關係…
講起crystal，自從上次去完佢屋企之後，都無咩點聯絡…唔知佢而家點呢…？仲係唔係咁掛住J鋒呢…？
「做乜撚發晒呆？」J鋒問。
「諗起你…」
本身我係想講諗起你同crystal，但好彩收得切，廢事勾起佢一啲唔愉快嘅回憶。
「gay…」J鋒講。
我乘機搭撚住佢膊頭，然後搓一搓，講：
「你啱先捉住我隻手行咗好耐喎…唔通你…？」我用淫賤嘅口吻挑逗佢。
或者喺好多人眼中，我同J鋒真係應該搞基，因為無論邊一條女，都動搖唔到我地嘅友情。
不過都正路嘅，大大話話識咗十幾年，除咗老豆老母，我最親嘅就係佢…
前排暑假同佢游完水…個更衣室好撚多人，我仲同佢入埋同一格沖涼，係差舊番皂啫…
如果個天要我喺阿欣同J鋒之間揀一個，我諗我會諗一陣，然後揀J鋒。
「你收撚皮啦，啱先我掛住忍笑唔記得鬆手咋！」J鋒講。
「你係牙膏…我係牙刷…hehe…」我繼續鳩噏。
「你係牙籤咋！」J鋒講。
「咁你一定係牙罅～」
「唉屌你好撚煩…去打機啦！」
有時候我會莫名奇妙地有啲感觸，我生得唔靚仔，唔高，讀書唔叻，運動唔叻，社交唔叻，溝女唔叻，但係就有一個咁好嘅朋友，個天都算唔話得。
雖然另一邊廂嘅J鋒既靚仔，又高大，讀書ok，運動唔差，社交在行，溝女一流，仲有我呢個好朋友，但我都會懷著感恩嘅心去屌個天老母，而唔係憤世疾俗。
同J鋒打完機之後佢上咗我屋企食飯，老母夾咗隻雞脾俾佢，仲滿懷安慰咁講：
「乖仔，食多啲啦！」
令我更加覺得我同佢係兩兄弟。
J鋒返番自己屋企之後，我決定搵一搵crystal。
「點呀你近排…？」我whatsapp問佢。
有一種朋友只係隔咗一陣無聯絡，就唔知點樣再開聲搵人，但crystal就絕對唔係呢一種，無論隔咗幾耐先搵一次，crystal依然係會以一種好溫暖嘅感覺嚟同我相處。
「幾好呀，近排我開始試玩ad，要唔要同我雙排？」crystal問。
講起lol，除咗今日晚飯之前同J鋒去網吧打咗陣之外，我都成兩個星期無玩過…一嚟要幫J鋒搵miss lin嘅消息…二嚟同肥婆聯絡得密咗，出街都出得密咗，所以都無咩時間玩。
「好呀，我sup你。」我覆。
入game之後crystal即刻邀請咗我，然之後我進入組隊房間，個mic又係自動連咗。
「喂墮落剎神，做咩咁耐都唔online呀？」crystal把聲聽落好精神，睇嚟應該無咩嘢。
仲記得第一次同佢打lol，個mic自動連咗之後我極度唔自在，但發生咗咁多事，經歷咗咁多嘢，而家聽到crystal把聲就覺得好踏實。
「求下你唔好再用J鋒幫我改嘅ac名嚟虐待我啦…我儲夠錢就會改名…」
屌…我講嘢一時唔經大腦…同crystal提起咗J鋒添…
「唔好改啦，幾得意吖～」crystal好自然咁回應，就好似唔記得咗J鋒咁。
有人話，咁樣先得人驚…
「你教我吖，ad要點玩先玩得好？」crystal問。
「首先要食兵一定要食得好準…確保發育正常先…然後就…」我開始同crystal講解我main ad嘅心得。
一路講一路load game，佢都一路聽一路問…
乜咁樣真係無嘢？
但如果佢扮到無嘢咁，我又問佢有無嘢，係唔係唔係咁好呢…？會唔會太多事呢…？
都係唔好諗咁多，希望陪佢打機可以舒緩到佢放唔低J鋒嘅痛苦…
不過就喺呢個時候，J鋒whatsapp我…
「喂屌啱先打得唔夠喉！」佢咁樣講…
我屌咩…仆街啦…點撚樣算呀…我兩個人四隻手咩…同緊crystal打緊呀我…
我望撚住部電話，唔知點樣覆佢…但我再唔覆，佢就會喺一分鐘之內on game，J鋒一on就會見到我都on咗，雖然佢無add到crystal friend，但佢一定會撳觀察對戰，就會知道我同crystal玩緊…
屌…點撚樣算？
無論我係話屙個靚屎先定沖個靚涼先，J鋒都一定會on住game等我，到時大話就不攻自破…
所以我決定鳩噏一啲關於miss lin嘅線索，決定等佢自己搵下…
「你不如去屯門區啲中學校網到睇下教師名單…雖然林家欣呢個名好普遍，但佢個林嘅拚法係lin，應該可以縮窄範圍…」我講。
呢個方法其實我有試過，屯門區嘅中學嘅學校網頁我全部都搵過，不過就係搵唔到一個姓lin嘅林家欣…要知道，雖然miss lin住屯門，但佢之前都去到港島返工…更何況，無人知道佢結咗婚之後仲有無返工，仲係咪住屯門…
「okok！nice bro！」但J鋒就好振奮咁覆我…
我覺得自己好似做咗虧心事咁…就快可以開返間虧心士多…
哈哈哈哈哈…
「喂，你做咩掛機呀？hello？」電腦傳嚟crystal把聲，原來已經load完game…屌，我腦海啱啱先上演完一場天人交戰…好撚攰呀師父…
明明J鋒係我好兄弟，crystal係我好朋友…但每次夾喺佢兩個中間，就無好事發生…
「sorrysorry，去咗屙屎…」
「你個肚唔舒服？」crystal問。
「唔係呀唔係呀…」
「咁就好，你預咗今晚有排同我玩～」crystal講。
「好好，我一定訓練到你成為一個出色嘅ad！」
「你話架！」
唉…今晚真係講咗好多大話…如果可以嘅話…無論J鋒定crystal，我都想佢地得到幸福…無奈在於，crystal嘅幸福係J鋒…J鋒嘅幸福係miss lin…而miss lin嘅幸福係佢老公…
咁…我呢？