Tinder22
又過咗兩個星期，我仲係未搵到令J鋒牽腸掛肚嘅miss lin…
即使J鋒俾晒佢手頭上有嘅資料我，我都係搵唔到。
J鋒過咗兩個星期仲係維持無女朋友嘅狀態，好似係大學以嚟第一次維持咁耐…
我作為老死都係到呢一刻先知，原來佢溝咁多女，唔係因為佢多情，而係因為佢專情。
真係發夢都估唔到。
當你知道佢啲女溝完一條又一條，都只係想證明俾過去嘅嗰個人睇佢嘅心唔會因為其他人而跳動…
我除咗同情之外，就已經再無其他怪責嘅情緒…
怪就怪命運嘅安排太詭異…如果J鋒早幾年出世，如果miss lin無去代課，如果crystal同J鋒讀同一間中學…或者就唔會做成呢一連串交錯嘅悲劇。
有時我會諗，點解愛情往往唔可以如願？
到底而家拍緊拖嘅情侶係點樣行到拍拖呢一步？到底而家結咗婚嘅夫婦係點樣行到結婚呢一步？到底而家結咗婚幾十年嘅夫婦又係點樣行到同偕白首呢一步？
點解我全心全意嘅鍾意，都係搵唔到出路？
嗰日之後，阿欣無再搵我，我都無搵返佢，whatsapp嘅通話紀錄最底嗰行仲係「算啦…無嘢…」。
我已經唔知幾多千次萬次打開whatsapp就係凝視呢一句說話…希望望穿到佢個心諗咩…
結果當然係無撚用。
而家差唔多完sem，之後就要隔幾個月見唔到阿欣，我想像唔到一個見唔到佢嘅sem break要點過…
不過好在，我有肥婆。
唔知係唔係我錯覺，肥婆過咗兩個星期之後，好似圓潤咗少少，但咁樣仲可愛，雖然稱唔上肥，但就多咗種肥嘟嘟嘅感覺。
我同肥婆嘅友誼發展一日千里，而家已經去到得閒見下面嘅狀態，同肥婆約會比起同阿欣約會有好大分別，約親肥婆多數都係晏晝見，一直到食完晚飯先散場，而同阿欣約會，多數就只係一個夜晚、一餐飯、一場戲…
換言之，喺同肥婆出街嘅日子入面，我接觸多咗平時女仔會做嘅活動，雖然都不外乎係行下街，夾下公仔，飲下咖啡，但都總算開始學識一日嘅約會要點樣安排。
至於tinder方面，J鋒話我已經pass咗心態呢一關，所以幫我揀咗第二條女like（因為佢幫我join咗premium plan，所以一like就match），今次呢條女係海歸abc，叫ashley。
Task 2 : Ashley
ashley喺tinder張profile pic係兩個女仔，一左一右，背景係London bridge，description嗰度寫from London，J鋒見到之後就幫我like咗佢。
「今次又係訓練啲咩？」我問。
「態度。」J鋒講。
「心態之後係態度？咩態度？」
「令一條女鍾意自己嘅態度。」J鋒講。
「講清楚啲啦情聖。」自從知道咗J鋒嘅故事之後，我經常有意無意地叫佢情聖。
「溝肥婆係訓練你啲咩？係對一條女唔好在意、唔好上心嘅心態，你掌握咗呢種心態之後，下一步就係掌握將呢種心態表現出嚟嘅態度，就好似打機咁，心態係觀念，態度就係技術，明無？」
「哦…原來係咁…但呢條女無好似肥婆咁主動say hi喎。」我仲未同J鋒講肥婆唔肥。
「唉，等我幫你啦。」J鋒講。
我都想睇下佢神之第一句開場白會係點。
J鋒拎過我部電話開始輸入：
「are you the left one or the right one？」J鋒咁樣問，無咩特別咋喎。
「you guess？」ashley覆。
「I guess you are the right one.」J鋒輸入。
「bingo~ how do you know？」
「coz you will always be the right one.」
屌…佢講到嚟呢句我先意會到the right one有兩重意思，高手！
不過咁樣唔會太進取咩？
「funny~ what’s your name？」但睇嚟條女好受落。
「my name is fei, fei siu.」仲扮撚埋james bond…
「I am Ashley, nice to meet you, wanna come out for a drink？」條女直接問，屌…tinder真係咩女都有…一嚟就話見面會唔會快咗啲…
「喂你去呀，我唔去架，唔撚識同呢啲女溝通。」我講。
「我嘅經驗話我知，呢條女已經屌得。」J鋒講。
「唔撚係掛…」我好似發現新世界咁成個人呆撚咗。
「不過你應該會令佢失望而回，anyway，都會係一個好經驗。」J鋒講。
「你唔係已經幫我應承咗掛…？」
「sure～聽日下晝三點旺角朗豪坊。」J鋒講。
「我約咗人…」我即刻鳩噏。
「收皮啦你，你撚有人約咩，去啦，去咗無蝕，你都想溝返阿欣架嘛，係咪？」J鋒講。
「屌…你去啦…」我講。
「喺搵返miss lin之前，我唔會再溝女。」J鋒突然一面認真，屌…仲叫我點講落去…
「唉屌…但你要傍住我…一有咩唔對路就扮撞到帶我走，ok？」我要求
「好啦好啦，你真係麻撚煩…」
明明就係你幫我like條女再幫我約人，竟然話返我麻撚煩…正仆街嚟…
就係咁，我去到約會現場。
J鋒喺我赴約之前俾咗幾個tips我，話可以令我不致於太柒喎…
一：講多啲英文
二：讚多啲條女
三：避免眼神接觸
一同二我都明，但三就百思不得其解，問佢問都只係答我去到現場就知…
我心諗，你有冇咁撚神機妙算先…
下晝三點三，我準時咁遲十五分鐘去到朗豪坊，呢點都係J鋒教，因為佢話隻臭雞一撚定唔會準時。
當我去到嘅時候，tinder都係無嚟自ashley問我到邊嘅訊息，同會早十分鐘到嘅肥婆形成強烈反差。
我whatsapp問一問J鋒：「佢會唔會放飛機架？」
「睇定啲先，唔好喺tinder搵佢住，等多佢一陣先。」J鋒覆我。
我照J鋒說話做，話晒佢食女多過我食飯。
過多五分鐘，一個疑似ashley嘅物體喺門口行入嚟，四圍張望。
我喺同佢相認之前決定先評頭品足一下，ashley著住一身黑色連身緊身吊帶褸屌裙，帶住一對條條揈嘅耳環，相信咁樣形容已經夠鮮明，就係典型高級雞嘅裝束。
至於小弟，就梗係黑色tee赴約。
由於我無喺tinder放相，所以ashley到咗之後，好快就喺tinder同我講佢到咗，問我著咩衫之類。
「我見到你喇。」我輸入。
之後就鼓起勇氣上前同佢打招呼：
「hi，你係ashley？」
ashley一面錯愕望住我，任佢係一個戲子，都難掩失望之情，我相信如果係J鋒行埋去同佢打招呼，佢地已經把握時間直接買外賣上後街間時鐘酒店到食。
不過可惜我係我。
「呃…係呀係呀…sorry呀我late咗少少。」ashley嘅語氣聽落一啲都唔內疚。
「哦，唔緊要，我都係wait咗一陣之嘛。」我講。
「你想去邊度high tea？」ashley問。
「你有冇心水？無嘅話不如去xxx？」我提議，個地點當然都係J鋒幫我揀，呢啲地方我點會識。
「好呀，呢間我都有去開，you good taste！」ashley講。
「thanks。」
起初我有諗過ashley會唔會見到我個柒樣之後就搵個藉口調頭走，點知又無，咁我都唯有繼續同佢約會，講老實，我真係唔係咁想。
ashley好明顯同我係兩個世界嘅人，佢呢類女仔一睇就知係會喺老蘭蒲到兩三點食洋腸嘅類型，當初相信佢只不過係好奇點解我會放九張風景相所以先like我。
要不是J鋒神一樣嘅搭訕技巧，佢一定唔會想見我。
我同ashley行喺人來人往嘅旺角街頭，因為實在太多人，所以我都同佢靠到有啲埋，佢噴咗好濃烈嘅香水味，搞到我個鼻有啲唔舒服…
唉…我諗有唔少路人一定諗緊我係唔係叫ptgf…一路行就一路感受到異樣嘅目光，真係好唔自然。
行過兩三條街之後，終於去到嗰間樓上cafe，不得不佩服J鋒識嘢之廣，一行入間cafe睇個裝修就知度係呢啲扮high class又唔係high class嘅海歸港女最愛。
佢嗌咗杯咖啡，我都嗌咗杯咖啡。
我剩係可以用咖啡嚟形容杯飲品，事關個字我連讀都唔識讀，莫講話串返出嚟。
「一樣吖。」望住個meun一籌莫展嘅我，當機立斷地喺ashley落完單之後就話要一樣。
How clever I am？
Sorry sorry，太投入角色。
「係呢，你喺外國study架？」我繼續跟住J鋒嘅tips同ashley溝通，為咗唔同佢eye contact，我一直望住窗外旺角街景。
「係呀，中三之後就過咗london，係前排先返嚟。」ashley講。
「慣唔慣香港生活？」我問。
「so far都ok，係空氣差啲。」ashley講。
「都係…哈哈…」
然之後就開始dead air，成個氣氛尷尬到一個點，我又諗唔到同佢講咩，佢又好似自得其樂咁喺度啜咖啡…
如果我係J鋒…呢個moment我會講啲咩呢…？
突然之間我醒起佢第二個tips，讚多啲佢！
「你都幾independent架喎，中三咁細個就過去讀書。」我講。
「嗰陣我喺機場喊到痴線話唔去。」
「我諗你daddy媽咪都好唔捨得你。」
「who knows？」ashley講。
睇嚟家家有本難念的經，我都係唔再講咁多…
之後嘅時間，我就喺間cafe入面鳩坐，杯咖啡一早已經飲晒，嘢又唔知講咩好…
但出奇嘅係，ashley竟然一啲想走嘅意慾都無，就只係靜靜地坐喺度慢慢啜慢慢啜，得閒又咬下飲筒，得閒又望下窗咁，乜佢唔會覺得唔自然嘅咩？
我襯呢個空檔whatsapp J鋒，打算叫佢出嚟救場。
「喂，而家dead air呀，好撚老尷呀，過嚟救我走啦。」
「你自己執生啦，我唔得閒。」
屌你，兄弟喎？
「我地一陣去邊？」ashley問。
屌，唔撚係掛，仲諗住繼續？
「去…去夾公仔？」我情急之下提議。
旺角唔知由幾時開始，開咗好多夾公仔舖頭，我帶住ashley左穿右插，去到一間新開張無耐嘅大舖。
新開張會易夾啲，好似係。
間舖頭喺砵蘭街附近，沿途有極多麻甩佬向ashley投以淫賤嘅目光，但ashley似乎毫不在意。
入到公仔舖，我直接唱咗一百蚊散銀，希望夾到靚嘢送俾ashley當見面禮。
「我唔識玩架喎…」ashley講。
「我教你啦…」
我假假地都係一個毒撚，對夾公仔點都有啲心得。
「嗱…夾公仔呢，首先要行一轉成間舖頭，睇下啲機嘅公仔擺位，嗱好似呢啲咁，塞到死一死就好難夾…」我一路帶住佢行一路講。
「咁呢部呢？」ashley指住一部寵物小精靈嘅機問我，入面有耿鬼，有小火龍，有比卡超，都係一啲受歡迎嘅小精靈。
「有啲難度，但無話唔得…」我仔細觀察一下之後講。
「呢個，我要呢個！」ashley指住耿鬼講，露出今日第一次笑容，而且係一個唔符合佢成熟妝容嘅天真笑容。
搞到我春心蕩漾咗半下…
果然毒撚就係容易動情…
「交俾我。」我投入一個五蚊銀，自信滿滿咁講。
隻抓喺我操作之下緩緩移動，慢慢去到耿鬼頭上，我開始轉動搖扞，使出甩抓技巧，落抓！
「oh jesus！nearly！」ashley好興奮咁瘋狂拍我膊頭。
「可惜，你要唔要試下？」
「yes！yes！」
「嗱你將隻抓郁過去先…然之後急速來回操控枝搖杆…」
「how？」ashley一頭霧水，將隻抓亂咁揈…
「唔係，你隻手要再快啲…但要控制隻抓唔好移離隻公仔頭頂…」
「fuck！why so difficult？」ashley講。
時間夠，自動落抓…
「why？I didn’t press it！」
「夠鐘呀…哈哈…」
「shit…都係俾返你玩…」ashley講。
「ok，count on me！」我講。
之後我大展神威，一百蚊未用晒就夾咗耿鬼，小火龍同比卡超出嚟。
離開公仔舖嘅時候日落西山，ashley喺個袋到拎咗包煙同打火機出嚟，走咗去附近一個垃圾筒開始食，面上掛住滿足嘅笑容。
「你要唔要？」佢問我。
「我無食開煙。」我講。
「2k1q，你要唔要？」佢吹啖煙出嚟，問我。