第四十二章
「澄渢！我哋聽日去邊玩好？」我問他。
「你想呢？」
「um……去野餐？」
「哇！咁大想頭嘅你？即係又要我準備食物啦！」
「嘻嘻～但我去買喎！我洗埋嘢喎！嚟啦嚟啦！」我向他撒嬌。
「係係，怕咗你喇！想食啲咩呀？」
「三文治是必需的！但咩餡好呢……有！蛋沙律三文治！還店都整開蛋沙律……咁唔差在整埋水果沙律啦！還店都用開蛋……咁不如整埋蛋卷啦！我仲要食菠蘿腸仔、密瓜火腿……」
「咪住先！菠蘿腸仔呢啲你自己整到喇掛！唔係要我拮埋掛？」
「我會拮爛啲菠蘿同腸仔架！要唔要我試一次俾你睇？」
「唔好喇唔好喇，怕咗你！」
「我仲未講完架……仲要食……」
自從澄渢致電給我然後不停嚎哭的那個晚上後，已經過了四個月。
起初因為擔心他，我每天都會致電給他和他聊聊天，怎料他復原的速度很快，快得令人難而置信，快得令人根本不相信他已經復原。
我寧願他頹廢一段時間，總比現在裝作若無其他好。
我沒有拆穿他的辦法，唯有一直陪著他，既然他不抗拒，我就會一直陪著他。
我陪他跑步，我陪他吃早餐、午餐、晚餐，我陪他作畫，我陪他到處去逛……
即使我不能填滿他的生命，也希望能填滿他的生活……
「咁去邊度野餐呀？」他問我。
「野餐嚟講，梗係迪欣湖啦！你仲可以帶埋畫架去寫生！幾寫意呀！」
「唔錯唔錯！一於咁話！你快啲去買材料，聽日一早起身就預備，整好就出發！」
「YES！SIR！」
這段日子我都住在澄渢家中，他睡梳化，我睡床。
出奇吧？
他竟然安安份份地睡在梳化，能叫我不擔心嗎？
要是有一天他爬上床對我毛手毛腳，我想我才能真的放下心來……
明明在婚宴上說了那麼難聽的話，為什麼還是放不下那個詩雨？
我到底有什麼不如她？
我到底有什麼不如她？
我到底有什麼不如她？
抱著這般疑問，我和澄渢來到迪欣湖。
「哇！呢度空氣好清新呀！」我攤開雙手轉了一個圈，感受陽光灑在身上的溫暖。
「你快啲揀個靚位啦！我想set好畫架先。」
「嗰度啦！有樹蔭！」我遙指一個地方。
「好呀！」
澄渢在到達後四處張望，似乎想尋找一個寫生的好角度。
不消一回，他便決定了方向。出乎意料的是，他沒有對著湖，而是把視野和湖形成一個約莫九十度的角來擺放畫框。
他的眼晴總能看到不同的景緻。
「好！鋪墊，食嘢！」
「咁快？啱啱坐低咋喎！」
「唔係咩叫野餐呀？梗係一坐低就食架啦！你畫畫先啦，唔使理我！」
「覺得悶要同我講喎！」
「登登！我一早帶咗本書嚟啦！」我從手袋中抽出一本尼采的書。
「你到底係讀心理學定係哲學架？」
「重要咩？」我瞇起雙眼向他吐一吐舌頭以故弄玄虛。
「唉，唔鬼睬你。」他說罷後便拿出顏料畫板和筆，開始調色。
每一次，我都很期待他的畫作。
不知道這次又是畫什麼呢？
讓我先看看書，然後再看看他畫畫的進度吧！
一邊吃著菠蘿腸仔一邊看尼采，絕對是人生一大樂事。
當一整罐菠蘿腸仔被我吃得差不多的時候，我便站起來伸伸懶腰，順便看看澄渢的畫。
「咦！你畫人喎！」澄渢的畫雖然未完成，但皺型已經展現出來。
畫中的主角是一男一女，女的似乎懷有身孕，男的則扶著她在湖邊慢步。
「嗯……」他答。
「係呢度嘅人嚟？」我從他的視覺放眼望去，只見到很多很多的人。
「嗯……」
「喺邊度喺邊度？」
「十一點同十二點中間方向，一百五十米左右。」
「見到喇！做咩會揀佢哋嘅？」
「佢係詩雨。」
澄渢淡淡然說出這句話，淡然到我甚至懷疑他的靈魂不在體內，只是按照著身體二十多年來的慣性來活動著……
那個是詩雨……懷了身孕的詩雨……
我整個人呆在原地不懂得反應。
良久後，我才勉強擠出笑容說：「走喇走喇，越嚟越曬！」
「我未畫完喎！」他說得很輕鬆。
「仲畫乜嘢呀……走啦……」
求求你，快點走吧……快點離開有她的空間吧……
我彷彿看見你的心在滴血……你就不要裝作你能承受的樣子吧……
「我凳佢高興都嚟唔切啦！畫完我送返俾佢添呀！我話晒都大畫家喎，呢份禮佢實鍾意！」
不要再說了，求你不要再說了……走吧……好嗎……
「走呀！我要你走呀！」眼淚有點不受控地飆了出來……我實在不忍心澄渢留在這裡受折磨……
「詩晴！我真係ok，你俾我畫埋佢！」這次他說得很堅定。
你不ok，你一點都不ok，你知道你自己不ok嗎……求求你快點發現……
「你可唔可以聽我講一次……一次咁多……你唔鍾意我唔緊要……你唔好咁樣折磨自己……我個心好痛……求下你……快啲走……」
「……」
他沒有回應我，而是拿著畫筆繼續揮下……
我就在他身旁看著他不斷自殘，他在畫上揮下的每一筆根本等同在自己心上割下每一刀……
我只能不停地哭……無論我怎麼哭，他都依然專注地畫詩雨洋溢幸福的笑臉……
求你了……不要……
「好！大功告成！」我不記得哭了多久，他才終於完成那幅畫作。
我無力地拉著澄渢的衣角，他緩緩蹲下來摸摸我的頭說：「返去嚕！」
「嗯……嗯……」
起初我以為，事情會就這樣告一段落。
然而在其後的人生中，我沒有一刻不後悔當天提議和澄渢來野餐。