第六章
「唔該！威士忌加冰！」我坐在酒吧對侍應說。
「哇咁快飲第二杯！世昌都未嚟喎！」晉傑對我說。
「點知佢一陣嚟唔嚟架，佢成日都係咁架啦！」我答。
「佢今日話帶新女朋友同我哋見個面喎！」兆健說。
「佢啲女朋友個個都質數參差架啦，睇唔睇都罷。」我說。
「以佢咁嘅條件，食返咁嘅貨色，都好正常。」晉傑補充。
世昌是有名的豬扒殺手，他常常都說，要知道自己是什麼貨色，有多少斤兩，不然的話就容易碰釘。並認為一定要找回和自己條件相符的女生，才能手到拿來，運籌帷幄。
而他，是個比較醜的小胖子。每次她帶出席的女伴，在旁人眼中都是像在看野獸與野獸在上演。
「上次佢帶個件吉列豬扒嚟，真係差少少嚇死我！個妝真係好似幫自己起勢落炸粉咁，核突到呢！」晉傑續說。
「不能同意更多！樣衰都算喇，仲要肥！肥都算喇，仲要以為自己係上菜，真係頂唔順。」我表示同意。
「話唔定佢今次帶個靚女嚟呢！」兆健還天真地認為。
「我ALL IN呀！一定唔會係靚女！」我說。
「我都ALL IN！」晉傑說。
「ALL IN乜嘢先？」兆健問。
「HI EVERYBODY！」是世昌的聲音。
他帶著他的女朋友慢慢走近。
「哇！」我驚訝。
「哇！」晉傑同樣驚訝。
「哇！」連兆健都按捺不住自己的情緒。
「我俾中中。」我說。
「呢個有中上啦！我俾中上呀！」晉傑說。
「我俾中中上！」兆健說。
「喂咁多位手足，你地頭先話ALL IN乜嘢呀？」世昌問我們。
「ALL IN你唔會帶個靚女嚟，賭注係你條JER。」我說。
「係呀你輸左喇，切啦。」晉傑隨手拿出他的萬用刀。
「講呢啲！同大家介紹，我女朋友阿欣。」世昌說。
「大家好，我叫阿欣，世昌女朋友。」那位叫阿欣的女孩揮揮手說。
她和世昌以往的女朋友不同，沒有一身肥肉，相反，她十分清秀。身高大約170cm，比世昌還高出少許；沒有化濃妝，只是塗了一層嬰兒霜，散發出一陣陣的書卷氣質味。
「做咩做佢女朋友咁晒？不如做我女朋友啦。」晉傑戲言。
「你死開啦！」世昌回敬他一下。
「阿欣你唔洗理佢，佢成日都係咁。」我說。
「唔好講呢啲住先，聽講你俾人飛咗喎黃澄渢同學！請發表被飛感言！」世昌說。
都畢業多少年了？還用同學來稱呼我。
話說回來，今次這個聚會，就是慶祝我被絕世美女撇掉的酒會。
「好啦，我玩夠喇，分手啦。」
我灌下一口威士忌，回想那天的事情。
「咁突然？」
「係呀。唔得咩？後生仔女係咁架啦。」她說，沒有看向我，而是看著煙火發放。
我看著她的側面，讀不清她的表情。
詩晴的側面比正面還要美上半分，她把頭髮翹在耳仔背後，卻有一小撮瀏海垂下來。
這一連串小動作在我腦海中慢動作回播，真的很怡人。
要說我從來沒對她心動過，絕對是騙人的，不過……
「我……我想講……對唔住……」我說。
「對唔住？對唔住啲咩？而家係我同你講分手喎！」詩晴說。
「我話晒，都拎左你第一次……」
「哈哈哈哈！」詩晴發了傻地一直笑。
「你唔係以為我真係第一次下話？女仔除左第一次之外，就唔可以出血架嗱？」
聽完她這句話後，我整個人愣住了。
的確，我沒想過這個可能性。
我卻無從分別她這句是真話還是慌言。
「你做咩……」我問。
「殊！睇埋煙花先。」她用一隻手指按在我的嘴唇上。
最後一發煙火緩緩落下，花火的尾巴在半空中搖曳，然後消失得無影無縱，象徵著我和詩晴的關係。
「早兩日我以前男朋友搵返我，我發覺我仲未完全放低佢。」詩晴看著只剩下白煙飄著的夜空說。
又來了一句我無從得知孰真孰假的說話。
「所以你決定同返佢一齊？」我問。
詩晴只是搖搖頭。
「咁……我假設，如果當時你只係咁啱AUNTIE探訪，你做咩要瞞住我？」我續問。
「因為，我想知道當一個人覺得佢拎咗一個女仔初夜既時候，會唔會就算唔愛佢都同佢一齊囉。」詩晴回答。
我整個人愣住了……
原來她一早就看穿我。
「對唔住……」
「唔使對唔住喇，我當初都係抱住一個放縱自己嘅心態去蘭桂坊，抱住一個放蹤心態嚟撩你講嘢，你完全唔使覺得有錯喎！我同你都係半斤百兩咋！」
「佢傷得你好深？」我問。
「有咩話深唔深呀……中學開始就同佢一齊，時間耐咗，敵唔過所謂嘅新鮮感，佢識咗第二個。玩耐咗玩厭咗，咪返嚟搵返我囉。」詩晴說得很豁達。
還是裝作豁達？
「對比起你嘅傷，我呢啲，小事啦。」她續說。
我再次愣住，無法給出反應。
「有時我會好羨慕住喺你心入面嗰個女仔。竟然有個白痴連我都唔要，係要單戀一個無可能嘅人。」她沒理會我繼續說下去。
「哈……哈…」我只能給出這種假笑般的反應。
「我已經慢慢放得低過去喇，唔知你幾時可以呢？」她緩緩說出。
請不要對我抱有一絲期盼。
「對唔住……我唔應該同你開始……」我再次道歉。
「都話唔使對唔住咯！都係多得你我先可以慢慢放低以前個賤人！」詩晴有點憤怒地說。
「但我估唔到我咁無魅力囉！同你一齊成半個月，你對我都係咩感覺都無。唉，心淡呀。」她續說。
「其實你好有魅力！只係……」
我亦都不是對你毫無感覺。這句話我吞回肚中沒說出口。
「去追返人啦傻佬！」詩晴說。
「佢就結婚喇……」
「去搶婚囉！世上無難事，只要隔硬嚟！」詩晴大條道理地說。
「愛情嘅世界，係無分對同錯架傻佬！」她續說。
我又再一次愣住，她的智慧，比我想像的更深。
「嗯，多謝你。」我由衷地感激她。
「俾少少自信自己！」她拍一拍我肩膊說。
「我走啦，多謝你陪左我兩個星期。下次再見就係朋友啦！」詩晴續說，然後別了面慢慢走遠。
「嗯，拜拜啦！係呢……其實你係唔係讀心理，以前又係唔係讀女校架？」我大聲問。
「重要咩？」她回過頭來，再次瞇起雙眼向我吐一下舌頭，沒等我回話轉身就走。
不重要了。
只是在她轉身的一刻，我看見似有若無的淚水在她眼角流出來……
兩個人走進這個樂園，卻分別獨自離開。
但願你今後的人生路不是一個人。
詩晴，謝謝你……
「你就咁由佢走？」兆健問我。
「嗯……佢講分手架喎……」我回答。
「你咪扮唔知啦！佢擺明係一早睇穿你啦！」兆健續說。
我沉默不語。
的確我不能排除她所說的都是謊言，只為讓我更加好過。
她用心良苦，我只能目送她離去。
相信對我對她來說，這樣才是最好的做法。
「咁你諗住點？去搶婚？」晉傑問我。
「我都唔知……連世昌都追到個靚女，話唔定我都可以搶返詩雨……」
我望向故事說到一半時就和阿欣去了另一檯把酒談心的世昌。
如果阿欣喜歡上他的機率是百分之零點五，那麼我認為我把詩雨搶回來的機率也有百分之零點五一。
「去唱阿牛定婚禮的祝福？」晉傑開玩笑問。
「如果真係要唱嘅話，我會唱時光機。」我認真回答。
「Ｃ君嗰首？」兆健問。
「係呀，Ｃ君嗰首。」我說。
「Ｃ君有首歌叫時光機咩？」晉傑有點疑惑。
其實我說的那首時光機，是小肥唱的。
「無嘅咩？唱寵物嗰個人喎！」兆健是真心搞錯了Ｃ君和小肥。
「嗰個小肥嚟架白痴！」晉傑說。
「車，兩條友一樣樣嘅，點分呀！」兆健高呼。
我不禁失聲大笑。
「不過話時話，澄渢你同詩雨做咩會搞成而家咁？」晉傑問我。
「係喎，上次我哋成班舊同學知道詩雨要結婚之後，你就約我哋出嚟飲，仲話自己一直都好鍾意佢，你嗰次唔講我哋都唔知呀！你幾時開始鍾意人架？」兆健亦提出了他的疑問。
我一直都沒向自己的好兄弟們提起我喜歡詩雨一事，當然亦沒有和他們說我和她的肉體關係。
直至那一天詩雨宣告她的婚訊，我把他們三個叫了出來陪我飲酒，酒灌多了後，才向他們說出內心的鬱結。
至於從什麼時候開始喜歡她……我不知道。
有一段好長的時間，我都分不清楚，自己對她的感覺，是屬於親人的愛，還是愛人的愛。
而其後，當我認清了對她是愛人的愛後，又開始極力否定。
兜了一圈，又一圈。
來到現在。
可是，當一個人極力否定自己對一個人的感覺時，其實自己已經深深地，不能自拔地，愛上了她……