Tinder25
企喺間中學門口，屌，我好撚緊張…
仲緊張過上一次決定同miss lin表白嘅時候。
我揸住手頭上紥花，諗返起的士佬鼓勵我嘅說話，我個人先定返少少。
我唔敢諗自己而家係為咗拆散一個家庭、一對夫婦而企喺度，再諗落去我驚我抵受唔住良好譴責…
儘管我溝過幾多條女都好，我從來都覺得男未婚女未嫁，大家起一齊係你情我願…不過當對象係已經結咗婚嘅時候…我都差啲喺道德兩隻字前面屈服。
不過，我好清楚，受盡所謂嘅道德折磨都及唔上失去miss lin嘅痛。
你話我固執又好硬頸又好賤男又好乜柒都好，我理鳩得你。
我剩係想得到miss lin。
我知道如果我唔再出現喺佢眼前，佢可能會一直幸福快樂咁同老公生活落去，但，咁我呢？
我係自撚私，咁點？
我係要想盡方法令佢動搖，咁點？
如果到頭來，佢發覺對我嘅感覺真係曇花一現，咁我認命，但我至少想要一個公平競爭嘅機會。
我已經錯過咗同佢嘅過去，唔想再錯過同佢嘅未來。
鈴鈴鈴鈴鈴鈴鈴…
間學校終於都打放學鐘，我無預期過佢會即刻出嚟，但由呢一刻開始我就要金晴火眼望實個門口，一定一定唔可以錯過miss lin行出嚟！
我企正喺學校門口，揸住紥花，唔使我多講，大家都知道一定好引人注目…
「佢好靚仔呀…唔知等緊邊個呢？」學生妹A講。
「唔知呀，但一定唔會係你囉。」學生妹B講。
「唉，如果我係佢女朋友就好…唔知係邊個師姐呢…？」學生妹A講。
「慳啲啦你…」學生妹B講。
放學之後一堆堆學生喺我身邊走過，諸如此類嘅說話傳入我耳中。
不得不說，呢間中學啲學生妹都幾高質，年青肉體有佢絕對嘅吸引力，可惜，我個心只係屬於miss lin。
每個人都會老，我而家剩係想同miss lin一齊變老…
「你…你可唔可以俾你電話我…？」有位學生妹C走嚟問我。
我一眼望佢，眼大大，皮膚白滑，紥住馬尾，含羞答答咁…如果係以前嘅我一定已經準備同佢開始一段關係，不過…我知道即使眼前呢個女仔再靚十倍、一百倍，都永遠唔會令我有嗰種感覺。
「sorry呀同學，我係嚟等人…」我禮貌答覆。
「嗯…嗯…我都知架喇…哈哈…」學生妹C塊面漲到勁紅，其實我某程度上因為唔太忍心拒絕女性，所以之前先有咁多女朋友。
「係呢…唔知你地學校係唔係有位叫林家欣嘅老師？」我問。
「哦！你講林老師！係呀係呀，佢好好人架，教我地班中文。」學生妹C講。
好人、教中文，bingo！
「唔該你，你快啲返屋企溫書啦，要俾心機考大學呀！」我講。
「嗯嗯，拜拜…」學生妹C笑住同我揮手講再見。
跟住落嚟，只要靜心等待miss lin喺呢個門口出現就得。
時間一分一秒咁過，太陽拉扯住我個影慢慢去西移，然後向著地平線沉沒…
唔等都等咗幾年，無理由而家幾個鐘就等唔到嘅…
唔知miss lin鍾唔鍾意睇日落呢…？
今日天氣好好，太陽嘅光線因為低氣壓而照得恰到好處，成個天一邊紫一邊紅，希望miss lin快啲做完嘢出嚟望到就好…
我一路欣賞住日落，一路眼角留意住學校大門…
「張同學…？」突然之間傳嚟一把令我魂牽夢縈咗幾年嘅聲音…
我望過去，眼前嘅畫面同無數咁多個夢境重疊一齊…
我終於見返佢。
我望住佢，我望住佢，我剩係望住佢，我剩係知道要望住佢…
三十歲嘅佢完全唔顯老，反而多咗份成熟嘅韻味，不過望落仍然比實際年齡後生。
佢頭髮留得比以前長咗，其中一束放咗去胸前位置，更添魅力。
我死死咁望住佢一路行過嚟，甚至連眨眼都唔敢，我驚喺眨眼嘅一瞬間佢就再一次消失、再一次離開我生命…
「張同學…？」走到我跟前嘅miss lin望住我重覆一次，表情完全唔驚訝，就好似估到我總有一日會出現喺佢面前咁。
我同佢四目交投，然後視線因為尷尬而移離。
霎時間我完全唔知道講啲咩好，成個人僵硬咗咁為佢遞上嗰束花。
「諗住送俾邊個女學生呀？你女朋友喺呢度讀書？」miss lin講。
我搏晒命咁搖頭。
「係送俾你…」我終於開到口講嘢。
「嗯，多謝。」miss lin好平淡咁接過紥花。
「你…最近幾好呀嘛…？」我問。
「嗯，幾好，你呢？」
「嗯，我都幾好，出年大學畢業…」
「呀，即係你出年都廿二歲…你搵我有事？」miss lin講。
「係…我…我…我…」我想講我好掛住你，但唔知點解講唔出口。
「一路行一路講，我都想聽你講下呢幾年嘅事。」miss lin向前行出一步，背向住我繼續向前行。
佢行出一步、兩步、三步，我唔敢怠慢即刻跟上。
「係呢，你而家讀緊邊間u？」miss lin問我。
「city…」
「都幾好吖，你咁鬼懶都考到大學，哈哈！」佢望住我笑一笑。
Miss lin結婚嗰年係我中五暑假，而家過咗四年，佢依然笑得咁好睇…
「你眼晴會笑…彎成一條橋…」我呢個有頭髮嘅側口再次唱起嗰次為佢點唱嘅歌。
「張同學…」miss lin打斷咗我…
「嗯…？」我好驚，個心跳得好快…明知眼前嘅佢已經結咗婚，係人地老婆，但我始終無辦法收埋自己一直以嚟對佢嘅感覺…
「你有冇睇到我封信？」miss lin問。
「嗯…」
「咁你應該知道，我曾經都鍾意你…」
曾經…？咁…而家呢…？
「嗯…」
然之後miss lin就無再出到聲，佢帶我走到附近一個公園，坐咗喺韆秋上面，我亦都喺佢隔離坐低。
「你覺唔覺得呢，我地就好似呢個韆秋咁…」miss lin講。
「…」
「我蕩上去嘅時候，你喺下面，你蕩上去嘅時候，我喺下面…就好似點都搵唔到一致嘅步伐咁…」
「咁…大家一齊停低…咪得囉…」我講。
「然之後呢…？」佢企起身，慢慢行去公園嘅另一邊。
「…」我實在唔知道miss lin個心諗緊咩，唔知道佢每個字背後蘊藏嘅心意…
「我三十歲喇。」佢突然之間擰轉身講。
「我知…」
「我結咗婚架喇。」
「我都知。」
「你知你仲嚟搵我…？我已經無再用任何社交媒體，連電話都轉埋，點解你仲係要搵到我…？」佢講。
「因為我放唔低…」
「到底有咩咁值得你放唔低呀？我代課不過三個月時間，我地認識得有幾深呀？你有幾清楚我嘅嘢，你有幾知道我嘅事呀？唔好咁任性啦張同學！」
「我唔再係你學生喇，唔好再同學同學咁叫我好嘛？我想企喺同你對等嘅立場嚟同你相處，我想你用對等嘅眼光嚟看待我，而唔好一直一直一直都當我係學生呀…我唔清楚你啲嘢咁又點呀？我清楚自己鍾意你咪得囉！」
「我到底有咩值得你咁堅持呀…」
「咁我有咩咁唔值得你去試呀…？」
「我結咗婚架喇…你唔好逼我啦…」
「我逼你…？你話我逼你，你又何嘗唔係逼緊我放棄…？既然大家都喺度逼緊大家，咁不如大家都唔好再逼大家，俾我試一次公平競爭吖…」我講。
「唔公平呀…由一開始就唔公平呀…呢個世界無嘢係公平架…」
「但至少你嘅決定可以公平呀…」
「你記唔記得我講過…你好似雲？」
「嗯…」
「嗰陣我咁講，係因為我覺得自己似隻風箏…無論點樣飛，都去唔到你到…無論點樣飛，都飛唔過嗰條線…我大你九年，有未婚夫…我係老師，你係學生…無論我幾想幾想都好，現實始終有條線扯住我，以前係，而家都係…一旦甩開條線，我仲要冒住唔知會亂飛去邊度嘅風險…所以…」
「你唔係風箏呀…如果我係雲…你就係天空…無咗你…我根本無處容身…我根本唔知自己個心可以返去邊度…你明唔明呀…」
我一步一步行近miss lin，我知道佢對我仲係有感覺，我知道…
「離婚啦…」我講。
「…」
「離婚啦…」我重覆。
「唔公平呀…咁樣對佢唔公平呀…由我鍾意你嗰刻開始，我已經無辦法再愛佢…我一直以為留喺佢身邊係一種補償…但原來我根本無放低過你…你好自私…你真係好自私…點解要返嚟搵我…」miss lin一路講一路好大力咁揼打我心口…
我用力捉住佢雙臂，然後將佢擁入懷內。
停頓咗四年嘅心臟再次跳動，我感受到懷內miss lin嘅溫度，感受到佢啜泣帶嚟嘅抽搐…我攬得佢好實好實，彷彿用多一單位力度就會整痛佢，但我就一直咁樣攬住佢。
夕陽西下，咫尺間，我擁有全世界。