Tinder21

同肥婆離開溜冰場之後，我成個人都心不在焉…

眼利嘅肥婆梗係睇穿我有唔妥。

「搵個地方坐低飲杯嘢？」肥婆提議。

「嗯…好…」

魂不附體嘅我一路跟住肥婆行，去到一間cafe入面坐低。

「點呀你，無嘢呀嘛？」肥婆問。

「無嘢…」

「但你個樣唔似無嘢喎…嗰個女仔就係你之前講嗰個？」肥婆問。

我同阿欣嘅事一早就喺tinder同肥婆分享晒，所以我估佢都會估到正話嗰個就係阿欣。

「係…」我講。

「咁你煩咩？」肥婆問。

「我都唔知…見到佢我個心就好煩…尤其係我唔知佢而家係唔係同我個fd發展緊…」

「唔係啦，呢點你可以放心喎。」肥婆講。

「點解你咁肯定？」我問。

「直覺囉，如果佢地係發展緊，撞到你嘅時候就唔會係咁嘅反應啦。」肥婆講。

「咁會係咩反應？」我問。

「唔…應該會好自然咁同你打招呼，而唔係閃閃縮縮。」肥婆講。

「點解？」我問。

「都話直覺咯，邊有咁多解釋架。」肥婆講。

「但就算唔係發展緊咁又點…佢都已經拒絕咗我…」

「你想飲咩？我去幫你買埋。」肥婆講。

「一樣…」

就喺肥婆行出去買嘢飲嘅一刻，我電話震咗嘢，即係有唔係group chat嘅whatsapp搵我。

起初我以為係J鋒或者crystal，點知原來係阿欣…

「嗰個係…？」阿欣咁樣問我，相信佢應該係問緊我肥婆係邊個。

我真係唔明，肥婆係邊個重要咩？佢係邊個咁又點？唔係邊個咁又點？咁耐都唔搵我，點解係要見到我同肥婆一齊先搵我？咁如果撞唔到我同其他女仔一齊行咁係唔係就唔會搵我？

唔知點解，我好嬲，成肚火湧咗出嚟…

我唔識點樣答佢，既然已經拒絕咗我，咁我同邊個去邊度關你咩事？你咁關心我做咩，咁想知道關於我嘅事做咩？

既然唔係鍾意我，問咁多做咩…

「？」我決定詐傻扮懞咁覆。

「算啦…無嘢…」阿欣回。

屌…你究竟想我點…

肥婆拎住飲品返嚟之後，我猶豫咗一陣，都係決定唔同佢講啱先whatsapp嘅事。

「其實，你覺得我點…？」我問肥婆。

「你？做咩無啦啦咁問？」

「我指…作為異性，你覺得我點…？」

「唔…呢個問題好難答喎，我識你又唔算耐，不過我會話你係一個好為人著想嘅人。」肥婆講。

「點解會咁樣覺得？」

「唔知架，直覺囉～我總係覺得，你想你識嘅每一個朋友都好，就好似你個fd失戀咁，你會去陪佢，但又唔會放我飛機，又好似啱啱溜冰咁，你明明撞到佢之後唔好受，但又因為顧慮到我無咩點玩到，明明想走都無講出口，所以我會咁樣覺得。」肥婆講。

肥婆嘅說話就好似支萬能膠咁，幫我一塊一塊痴返個心。

聽完呢番說話，我無再咁難受。

「咁…我即係一個好人？」我問，打算硬食一張好人卡。

「哈哈！都可以咁講嘅，不過好人太概括喇，如果將呢個世界嘅人剩係劃分做好人同壞人，我相信大部份都係好人，所以單單形容一個人做好人，太唔負責任喇，係咪？」肥婆講。

我諗一諗，覺得肥婆講得好有道理，正如我會將佢形容做善良的肥婆咁，好人都分好多種，我終於知道點解啲女拒絕人嘅時候會派好人卡，因為按肥婆嘅說法，呢種係一種不負責任嘅表現，代表對方根本無理解過你。

肥婆又令我諗通咗一樣嘢，感激之情，難以用言語表達。

「係呢，我地今晚會唔會一齊食飯？」我問。

「可以呀，本身我今日成日都預咗留俾你架喇～」肥婆講。

我決定，請佢食肉嚟報答佢。

結果我真係帶咗肥婆去食燒肉放題，見到佢係咁食肉，唔知點解我就好有滿足感。

「望咩望？未見過肥婆食肉？」肥婆一路將塊肉送入口中一路講。

「唔係，我估唔到你會食得咁放啫…」我講。

「放題嚟架嘛，梗係要食得放啦！」

「都係嘅…」

「做咩？驚我體重反彈？」

「哈哈…唔係…呢餐我請，你食多啲。」我講，雖然俾的士佬屈我買咗紥花兼飛咗兩程的士，不過都仲請得起呢餐嘅。

「下？你傻架？做咩無啦啦請我食？」肥婆問。

「多謝你答咗我咁多問題，同埋一路以嚟開解我。」我講。

「傻啦，我地朋友嚟架嘛。」

「係就係啫，但我又遲到又剩…當係補償啦…」我講。

「唔得喎，如果遲到請食飯就係補償嘅話，咁你下次咪又遲？最好嘅補償方式就係下次唔好遲到。」肥婆講，睇嚟佢堅持唔想我請佢食飯。

「咁好啦…」

「你都食多啲啦～」

「好好…」

其實我個心仲喺阿欣send俾我個訊息到，根本無咩胃口食太多，況且肥婆雖然減咗肥，但佢始終曾經係一個肥婆，戰鬥力有返咁上下，一定回到本。

「可唔可以話我知，係咩契機令你減肥…？」我問。

「唔…俾人笑得太多掛？其實我都唔知，剩係有一刻覺得，我唔想衰俾呢班人睇，就開始減肥。」肥婆講。

「減咗幾耐？」我問，因為佢原本張相同而家個樣我諗相差十公斤以上。

「唔記得喇，但起碼都有半年。」肥婆講。

「好有毅力…」

「有冇毅力係視乎你有幾渴望嗰樣嘢嘅啫。不過當我減到而家咁樣嘅時候，中學已經畢咗業，有次班會gathering，見到班男仔個樣真係笑死我！」肥婆講。

「咁之後點？你有冇好有成功感？」我問。

「又唔算好有成功感嘅…但始終叫係完成咗一件事，點都有啲，但我反而發覺減咗肥之後，識少咗真心朋友，或者大學就係咁啦…我都唔知，哈哈…」肥婆講。

「都係嘅，好多人都話中學同學係一世嘅朋友，大學就識嚟識去都hi bye friend。」我講。

「不過我都例外嘅…」肥婆眼甘甘咁望住我。

「做…做咩？」

「你咪例外囉，哈哈！」

「我？我唔算係喺大學識啦…再講，你想像得我太好…」我唔係幾好意思同肥婆講當初我地喺tinder match到係因為J鋒要訓練我心態所以先揀你嚟like…

實質上我都係一個以貌取人嘅人…

「或者啦～」

「係呢，你住邊架？」我問肥婆，打算視乎遠近決定送唔送去返去。

「我住油麻地，你呢？」

「北角，咁陣間我可以同你一齊搭車。」我講。

「嗯嗯。」

同肥婆一日嘅約會就係咁告終，你話完唔完美？又唔係好完美，畢竟都只係第一次見，好似仲有啲隔閡咁…你話開唔開心？就梗係開心嘅…減咗肥嘅肥婆已經進入咗中上行列，靚就一定唔夠crystal靚，但行喺我隔離已經係屈就咗佢…

臨別之際，我同肥婆交換咗電話，而我地傾偈嘅方式亦都由tinder變咗做whatsapp，雖然同原本鍛鍊心態嘅目標相差甚遠，但我諗咁樣都叫係一個好開始。

返到屋企之後，我收到一個whatsapp，嚟自J鋒。

「過嚟陪我。」J鋒whatsapp同我講。

今日真係好攰…先係趕去crystal到，然後再同肥婆玩咗場捉迷藏，之後溜冰仲要撞返阿欣，當我諗住返到屋企有得抖抖嘅時候，J鋒又搵我…

唉…無計啦…鬼叫係老死咩…攰都要去…

「喺你門口喇。」我換條運動褲踢返對拖就過咗J鋒到。

佢打開門，個樣好憔悴…

「你搞咩呀你？」我問。

「我同crystal講咗分手…」佢講。

「我知。」我答。

「佢搵過你？」J鋒問。

「係。」

「叻仔喎！女仔失戀搵你，你成功咗第一步啦！」佢講。

「你個樣話俾我知你口不對心喎。」我講。

「唔係啦…我遲早都會同佢講分手…只不過而家早咗啲啫…」

「點解？我睇得出你唔係唔鍾意佢，甚至比其他女朋友更鍾意佢。」我講。

「我同其他女都講晒分手…」J鋒講。

呢點我真係估唔到，本身都諗緊點解佢同crystal講完分手之後成日都唔搵我，原來係用咗一日時間去同其他女講分手…

「點解？」

「你記唔記得尋晚crystal上嚟食飯，佢講嘅嗰番說話…？」

「形容雲嗰番說話…？」我諗一諗之後答。

「係…喺嗰一刻，我將佢同另一個人重疊咗…所以先鍚咗落去…但鍚咗落去先發覺…原來佢唔係佢…佢根本無可能係佢…」J鋒講。

「即係話…你有個人放唔低…？」

「我開始驚…我開始驚繼續落去就會搵到取代佢嘅感覺…我驚曾經喺我心入面最重要嘅一個人會變到唔重要…我唔想佢消失…」J鋒講。

「下？你都幾撚戇鳩架喎，而家有女可以令你忘記以前嘅傷喎，你仲咁執著喺以前做乜春？」我講。

「你好意思話我咩？你夠膽講你唔鍾意crystal咩？咪又係執著嗰個阿欣！」J鋒駁斥我。

「屌，我唔同呀，我毒撚嚟架嘛，同啲女close啲就動情架啦，但你呢？你扮乜撚嘢大情聖呀？你係要扮大情聖就唔會溝咁多女啦！」

「我唔知…我一方面好想忘記佢…另一方面又好驚忘記佢…我以為我呢世都剩係會對佢心動…我想證明俾佢睇…但原來當我發覺原來真係有人有呢個可能性去取代佢嘅時候…我就好驚…我一直以嚟都好想否定佢當初否定我嘅原因…但到頭來…我係間接咁幫佢證明緊…證明緊呢個世界真係無永遠嘅心動…」J鋒講。

「咁你而家鍾意邊個？」我問。

「仲係佢…但我已經開始慢慢唔肯定…我真係好驚隨住時間流逝，佢會喺我記憶入面越嚟越淡…」

「其實你咁執著做咩？佢會因為你執著而返轉頭咩？」我問。

「唔會…」

「既然你肯定唔會，點解仲要執著？」

「我都唔知…或者我仲等緊佢…」

「你咁撚長情嘅咩？嗰個邊個嚟？」

「係中學嘅一個代課miss…」佢講。

「嘩屌…你真識食…咁佢而家點？」

「結咗婚…」

「結咗婚你都等佢返轉頭？傻撚咗呀？」

「唉我都唔知…我剩係覺得…我失去緊一樣好重要嘅嘢…如果我繼續同crystal一齊，呢樣嘢會失去得越嚟越快…我唔想咁樣…」J鋒講。

「既然係咁，搵返佢出嚟三口六面講清楚囉。」我提議。

「已經搵唔返佢。」

「事在人為嘅啫，而家社交網絡咁發達，要搵個人無話搵唔到嘅。」我講。

「真係搵到咁又點…」

「等你條死剷可以死一條心囉，睇下人而家有幾幸福，咁你就會知道你嘅執著有幾無謂。」我講。

「…點樣開始？」

「佢咩名？住邊？知唔知讀邊間U，讀咩科，幾多年畢業？」

J鋒俾咗啲基本資料我之後，我就話返屋企慢慢搵，希望我真係搵到，令佢早日超渡，唔好再被過去綑綁住自己。