Tinder03

個所謂選舉並唔係單單投出最靚仔嗰位，仲要投出最差、最唔想同佢發展嗰位。

啱先都提及過，只要amy鍾意啲咩，其他女同學都會跟住一齊鍾意，相反，amy唔鍾意啲咩，其他女同學都會同樣唔鍾意。

「唉吔，真係好難揀呀…最好一定係阿鋒啦，但揀邊個做最差呢…」小息嗰陣，坐我隔離嘅kelly好苦惱。

自問靚仔就絕對唔係，可能仲稱得上樣衰都未定，但講到最差，班上面起碼有兩三個同學墊我底，所以我都幾有信心唔會被揀中做最差。

殊不知呢個時候，amy行過嚟，咁樣講：

「遠在天邊，近在眼前！」

我瞄一瞄amy，心諗：唔係講我掛？

「你指…佢？」kelly幫我問出咗心入面嘅疑問。

「如果俾我揀，都係佢架啦！」amy完全當我透明，兜口兜面咁俾說話我聽。

我屌你咩，無怨無仇，點解要咁樣對我？你咁樣講一講，我實高票當選都似…

我怒啤咗amy0.25秒，然之後死死氣望返落檯面。

雖然由細到大同J鋒出雙入對嘅經歷已經話咗俾我知世界嘅殘酷，被寵愛呢啲嘢從來沒我份我亦都欣然接受咗，但身為一個男性，點都唔會想俾人揀做「最差、最唔想發展」囉…

我都有尊嚴架…

明明仲有肥偉、暗瘡強、臭傑呢三劍俠，點解係要玩鳩我？

我內心不斷咆哮。

「咁樣呀…哈哈…我都係遲啲先揀。」kelly回應，好明顯佢已經作出咗選擇，只係顧及我感受而唔揀住。

其後結果出咗，我力壓三劍俠，同J鋒雙雙贏出呢場選舉。

amy仲大肆宣揚，整咗兩個紙造嘅獎盃出嚟，仲話要喺小息搞個頒獎典禮。

我天生毒撚性格，逆來順受，根本唔識得拒絕，至於J鋒，我就更加諗唔到佢會拒絕嘅理由。

小息嚟到，amy拎住兩個紙獎盃走出教師檯，拍兩下手掌，就吸引咗全班嘅注意力。

「首先喺度多謝班上女同學對投票嘅熱烈參與，經過我一輪統計之後，已經有咗結果喇！而家有請兩位分別贏出選舉嘅同學出嚟，分別係阿鋒同phillip！」amy喺教師檯後面演說，J鋒喺自己個位望一望我，然後就行咗出去。

我就戇居居咁坐咗喺個位到，諗住賴死唔出去。

「大家俾啲掌聲鼓勵phillip！」amy條八婆翩動同學起哄。

班上面其他女同學開始拍手，仲引嚟一啲喺走廊嘅隔離班同學圍觀。

我坐喺位，感受到嚟自四方八面嘅視線，最終都係抵抗唔到群眾壓力，行咗出去…

快啲完啦快啲完啦…

我一路行一路心諗…

「兩位主角都嚟齊喇，最緊張嘅環節嚟喇喎！就係揭曉邊位係最好，邊位係最差，哈哈！不過相信大家心入面已經有答案！」amy繼續演說，而我已經難堪到一個極點。

「首先宣布最好嘅係…」

嘭！

amy仲未講出人名，J鋒就好大力咁拍咗落張教師檯到，成個班房連走廊都靜晒。

「玩夠未？好好玩咩？」J鋒好冷靜咁啤住amy講。

amy就呆晒咁望住J鋒。

「整埋啲垃圾出嚟，浪費地球資源。」J鋒拎起個獎盃，一嘢撕爛佢，然後順手拎去廢紙回收箱。

「慳啲啦，八婆。」J鋒語帶雙關咁鬧鳩amy，我望住佢背影，感覺何其壯大！

amy仲嚟唔切反應，J鋒就望過嚟示意我返位。

如果我係女，大個一定嫁俾佢。

可惜我係仔，所以我地就變咗老死。

雖然amy喺女同學嘅心入面地位超然，但落佢面嘅係J鋒，對班女嚟講係另一個次元嘅存在，所以件事過咗之後，成班就好似回復平常咁。

嗰日放學我如常同J鋒一齊走，佢仲同我講對唔住，話咩可以早啲阻止呢件事。

我傻撚咗咁喺度笑，嗰日之後，我就無辦法再妒忌J鋒擁有嘅所有嘢。

因為佢係我最好嘅朋友。

後來中學派位我同佢派咗去唔同學校，不過依然係鄰居，依然一齊大，有時佢嚟下我屋企，有時我去下佢屋企，放假無嘢做會落維園踢下波，又或者去網吧打下機。

仲因為佢識咗一班差唔多年紀嘅波友，落網吧打機嘅陣容越嚟越鼎盛，而J鋒呢個稱呼都係喺呢個圈子出現。

令我呢個毒撚變到無咁毒嘅，就係佢。

同阿欣…

呢個時候，J鋒部電話又響起，來電顯示係臭雞一號。

「喂？」J鋒直接開擴音同臭雞一號對話。

「喂阿鋒？聽日得唔得閒呀？」臭雞一號喺電話到問。

「而家過咗十二點，你講嘅聽日係星期五定星期六？」J鋒問，好明顯佢嘅態度同對臭雞二號嗰陣唔同，不過都係帶點強硬。

「星期五。」

「唔得。」

「咁星期六呢？」臭雞一號似乎好猴擒。

「都唔得。」J鋒答。

我心諗：咁你又問人係指星期五定星期六？

「但我好想見你呀…」

「我遲啲搵你啦。」

「好啦…」

「夜喇，瞓先啦。」

「拜拜…」臭雞一號依依不捨收線。

犀利。

雖然同J鋒由細玩到大，但今次都係第一次睇佢同啲女朋友s點樣相處，實在令我大開眼界。

而我亦都終於知道點解平時J鋒有咁多時間同我地踢波打機食飯，因為只有佢想嘅時候，先會搵佢啲女。

唉，白白四個臭雞，呀唔係唔係，白白四個青春少艾，就俾呢條mk食咗。仲要食到應一應。

「喂你聽日得唔得閒？」收咗線之後J鋒問我。

「聽日無堂，做咩？」我問。

「帶你去一個地方。」

「你啱先喺電話明明話自己唔得閒架喎。」我講。

「而家約咗你，咁聽日咪唔得閒。」

「哦…咁聽日去邊？」

「我嚟你屋搵你啦。」佢講。

「好。」

「記住匯報埋同肥婆嘅進展俾我聽。」

「話唔定無進展呢，哈哈！」我到而家都係十五十六，諗緊繼唔繼續。

「當識個朋友，無壞呀。」J鋒鼓勵我。

「都係嘅…係呢，講起出街，你唔怕同啲女朋友出街嗰陣俾佢地見到其他臭雞打俾你嘅咩？」

「你真係唔識架喎！一個成功嘅男人，點可以俾女人見到自己電話嘅內容？」J鋒講到頭頭是道。

「咁如果佢地問起呢？」

J鋒望一望我，然後chok出一個情深款款嘅樣…

「對唔住，係我俾唔到信心你…」佢咁樣講，然後越哄越埋。

「屌，好撚gay呀，死開啲啦！」

「挑，又係你問嘅。」

我無理佢，繼續飲啤酒。

個心一靜落嚟就諗起阿欣，佢成日都笑…個海明明黑媽媽，但就好似倒映住佢笑緊個樣咁…

「我好撚鍾意阿欣呀！！！！！」我無啦啦大嗌，仲一罐啤酒丟咗落海到，希望打散阿欣個樣。

「你真係鍾意佢咩？定只係唔甘心得唔到佢咋？」J鋒問我。

「我真係鍾意佢…」我諗都無諗就答。

「定係你覺得你付出咗好多，而家所有嘢都好似倒晒落海咁？」

「唔係…」

「定係因為佢係你生命入面第一個同你close嘅女仔，你覺得無可能再遇到所以唔想放手？」J鋒起勢咁講。

而我就不停咁喺度諗佢所講嘅嘢，無可否認，佢講出咗部分事實，阿欣的確係第一個同我close嘅女仔…

「因為你未見過森林，所以先執著喺棵草上面啫。」J鋒講。

我無言以對。

唔通我真係要溝個肥婆，將自己置身喺森林入面？

第二日瞓醒，已經下晝一點零鐘，J鋒幫我開咗notification，不過我臨瞓前熄咗，我有啲心思思，就打開tinder嚟望。

買咗premium plan之後就見到咩女like咗自己，過咗一晚之後，多咗十幾個女仔like我，有幾個仲幾靚。

不過我通通無理佢地，而係直接去睇肥婆有無講其他嘢。

一打開chat嗰頁，同肥婆個對話框都仲係顯示佢尋晚講嘅最後一句嘢，我有啲失落。

「早晨。」神推鬼㧬之下我就講咗句早晨。

「早呀xd，你瞓到而家先醒？」

「係呀哈哈…尋晚個fd飲醉咗扶咗佢返屋企…」我照住J鋒尋晚講嘅咁覆。

「你好鍾意飲酒架？」肥婆問。

點答佢好呢…？唔通同佢講話我表白衰咗先飲酒？咁咪變到好似搵佢嚟幫自己move on咁？

唉屌唔撚理…等陣間J鋒過嚟先問佢…

我熄咗tinder然後打開whatsapp，打開同阿欣嘅對話框，不知覺咁碌上去睇返啲對話…

一路睇，一路望住阿欣張頭像，係上年聖誕節同我食飯嗰陣我幫佢影…

明明就笑得咁開心，點解！！！點解連聖誕節情人節都同我出街但係話只當我朋友！！！

嗞…嗞…

電話震，係J鋒打嚟。

「開門啦柒頭。」

我一打開門，就見到J鋒已經gel好頭換好衫，手上仲拎住支美極。

「我屋企用剩，俾你。」J鋒講。

「你又有食開肥婆咩？」我問。

「點呀，同佢發展成點呀？」

「無呀，啱啱瞓醒講咗兩句。」我答。

「拎嚟睇下！」

我打開tinder拎俾佢睇，佢問都無問就起勢咁打字。

「唔鍾意架，不過失戀…咪借酒消愁囉…」J鋒咁樣幫我答。

咁樣好咩？

「咁答唔會令人覺得自己好厹咩？呢頭失戀，嗰頭就喺tinder識其他女仔。」我問，不過我知道J鋒咁做一定有原因，我同佢喺同女仔相處嘅經驗上相差太遠。

就好似魔王同史萊姆嘅分野咁。

「睇下佢點答我再答你。」J鋒講。

「咁高深？」

「溝女係一門學問，唔同女都有唔同攻略法，慢慢你就明。」

「就好似gal game咁？」我問。

「乜撚嘢gal game呀？」

「算啦無嘢，哈哈，我去換衫先。」我講。

我行返入房，望住個衣櫃，諗左諗右。

到最後都係是但揀件淨色tee笠上身，加件風褸就算。

出返去廳，J鋒依然拎住我部電話瘋狂輸入緊，唔通佢食得好嘢多間中想食下肥婆？

我心諗。

「你對人有興趣呀？」我問。

「傻撚咗呀你？」

「好好傾喎你同佢。」

「傾開有條路啫。你鍾意人咩？俾返你傾囉！」

「唔使，你慢慢。」

此情此境，我地兩個就好似為咗個肥婆而爭風呷醋咁，忍唔住笑咗出嚟。

「行啦屌你。」J鋒講。

「去邊？」我問。

「剪、頭、髮髮髮髮！！！」

「無啦啦剪咩頭髮呀？」我摸摸自己髮尾，都唔係好長啫。

「知唔知我想翻噠啲女嗰陣會同佢地講咩？」

「唔知。」

J鋒又chok出一副情深款款嘅樣出嚟，對住我講：

「不如我地…從頭嚟過？」

「巴打，我發覺你真係好幽默…」

「你唔好理，最緊要啲女受！咩從頭開始、由頭嚟過之類嘅說話，啲女就最鍾意聽架喇，由此可見，「頭」係幾咁重要呢？」

「你唔係以為咁就兜到下話？」

「同你解釋都嘥氣，跟我嚟啦，剪完你就知。」

剪完係唔係會變到你咁型先？我心諗。