終章
早上來臨，心渝緩緩張開眼晴。
「淅淅？」
「喺度！」
「即係我尋日唔係發夢？」
「唔係呀…」
「咁我而家係唔係發夢？」
「都唔係呀…」
「你真係返咗嚟…你真係返咗嚟…」心渝說著說著，眼晴又開始滲出淚水來。
「傻瓜，唔好喊喇，再喊變花面貓。」
「我都無化妝…」她說。
「係喇係喇，瞓多陣啦，而家仲早。」
「唔喇，起身！我要同你去玩！」
「想去邊度玩？」我問。
「睇場戲先？早場應該無咩人，你可以坐我隔離一齊睇。」她說。
「好呀，咁我等你梳洗。」我說。
心渝一下子彈坐起來，早上的她頭髮有點凌亂，她紅著臉胡亂抓了兩抓，並伸出手掌來遮著我的視線，示意我不要看。
她連忙走出房間，到廁所梳洗。
我等著她，被難以形容的充實感填滿。
因為我們就像一對新婚夫婦…起床的時候仍不願被對方看見亂糟糟的樣子。
如果我有實體的話，大概已經在為她煮早餐，然後再一起上班。
這些日子，無論過多久、多久，都不會生厭。
心渝由廁所回到房間，眼定定的看著我。
「做咩？」我問。
「我換衫…」她說。
這才意會到的我連忙走出房間外，再靜候她出來。
「行得，出發！」
心渝說已經在網上購票，是一場幾乎沒人看的電影。
「你仲記唔記得，你嗰年喺我生日，同我分享你嘅夢想？」她說。
「梗係記得！」
「真係好可惜…你知唔知，我其實係一個無咩夢想嘅人，讀書係因為唔想輸俾你，搞咁多次班會活動除咗係想成班一齊玩，更加係製造多啲同你嘅回憶…」心渝說著。
我受寵若驚…
「我從來都無諗過…我一直覺得，你先係故事入面嘅主角，所以我千方百計，想你嘅視線入面有我…」
「哈，估唔到我地喺呢方面又幾夾。」她說。
「係囉，哈哈。」
我們觀看的是一套悲劇愛情故事，心渝哭得梨花帶雨，我也不知道，是不是因為在情節之中，她看見了我們…
全劇終，心渝還是哭著離開戲院。
連那個戲院的場務也按捺不住為她遞上一包紙巾。
要是你小子能看見我的話，看你還敢不敢向她遞紙巾。
「其實啲劇情都幾狗血…」心渝走出戲院後吐槽自己。
「哈，所以先咁少人睇。」我說。
「但，個男主角好癡情…」她說。
「好似我咁？」我問。
「你慳啲啦，哈哈！」她噗哧一笑。
相隔三年多不見的我們，彷彿沒有隔閡一樣，像回到遙遠的昨天，那個彷彿未來一直不會來的日子。
然而，未來一直來，過去一直去，我無法叫停時間。
「陣間想去邊？」我問心渝。
「想去南丫島，睇日落。」她說。
「你仲記唔記得…」我欲言又止…
「記得。你講緊你走之前嗰次拗交呀嘛…」
在我死前的一段時間，我和心渝吵架了。
那是大學聯招放榜後的事情，我和心渝都獲得同一所大學取錄，修讀自己想讀的科目。
我想和她慶祝，便相約她去南丫島。
對於我來說，那是第一次為心渝製造驚喜的地方，別具意義。
她答應了。
怎料約會當天，卻有小半班同學一同出現在碼頭。
包括那晉傑。
我明明是約她單獨去的。
當時我的醋意一發不可收拾，最令自己生悶氣的是我根本沒有這種呷醋的資格，所以我便對心渝說了些很難聽的說話，同時訛稱自己不舒服離開。
直到我死掉的時候，都沒有找她和解。
「對唔住…」我說。
「你知唔知我嬲咩？」心渝問。
「…一係你講我知？」
「嬲你唔理解我…我以為，就算我咩都唔講，就算我唔解釋，你都會理解我…」她說。
那我一定令你很失望了吧。
「對唔住…」我重覆。
「不過其實我都有責任…我唔應該當你係理所當然…」她說。
「我嗰陣…真係講咗好難聽嘅說話…」
「唔緊要啦，過咗去，你都係因為太鍾意我啫，哈哈！」心渝說。
「係架，我鍾意你一定多過晉傑鍾意你！」我肯定。
「其實嗰次，係誤會…我唔小心漏咗口話會同你去南丫島，點知晉傑就以為我又搞班會活動，仲即刻話通知班兄弟…所以…」
「對唔住…我咩都唔知就怪你…」我說。
「我都有責任啦…唔緊要啦，而家兩個人去返，當補數，哈哈！」
我知道，心渝在說這句話的時候，有多難受。
因為這是第一次，同時亦是最後一次。
下船後，我們一路走著。
對話開始逐漸變少，卻不覺得彼此間的氣氛變得古怪。
我們一早已經習慣，在靜謐的早晨一言不發地一同散步上學。
想到的時候就說，想不到的時候就待著對方身邊，偶爾偷看一下她的側面，然後她裝作沒有發現地笑一笑…
曾經期許過，這就會是一輩子的我們。
然而一輩子早已經降臨我身上，現在多出來的時間，都是恩賜的。
我和心渝走到沙灘岸邊，沿著海岸散步。
我和她，卻只有一雙足印。
「你係由幾時開始鍾意我？」心渝突然之間問我。
「唔…應該係中一開學。」我說。
「因為我都遲到？」她問。
「因為你靚。」
「嗰陣中一咋喎！」
「係靚就係靚架啦！」
「咁仲有無其他原因？」心渝笑瞇瞇地問。
「呢個答案你接受咩？」我原本是開玩笑地說的，因為她漂亮只是其中一個原因。
「點解唔接受？」
「我以為你傾向聽感覺呀，舒服呀之類嘅原因。」我說。
「咁即係仲有無其他原因？」
「最大嘅原因，就係無原因。」我說。
「咁樣就真係唔接受喇！」
「鍾意一個人梗係可以數到好多原因出嚟啦，靚、溫柔、體貼、陽光，好多好多你嘅優點都係我鍾意你嘅原因，但諗深一層，有呢啲條件嘅女仔都好多，點解偏偏係你？所以我會話，因為係你所以我鍾意，咁同無原因係咪差唔多，哈哈。」我說。
「嗯，答案接受，pass！」她說。
「咁你呢？」我問。
心渝停下來，望上天空。
「我諗，我喺旁人眼中，應該算係好有活力？」她問。
「係架，就好似我咁講，好陽光。」
「但你對於我嚟講，先係太陽。」她說。
「因為我長年考第一？」
「初初開始留意你，除咗係因為我地一齊遲到之外，的確係因為你第一個學期就考第一，然之後每次轉班房，我都會偷偷望入你地班，你同我印象中嗰啲會考第一嘅同學唔同，平時就係一幅玩世不恭嘅樣，身邊永遠圍住幾個朋友，你地一齊打波，一齊放學，好似考第一對於你嚟講係手到拿來嘅一件輕鬆事。」她說。
「而我就一直係後面追趕你，一開始係唔甘心輸俾一個望落咁唔似第一嘅人，唔知由幾時開始，呢種唔甘心就變咗仰慕。無論我幾努力讀書都好，都總係考第二…而且仲咁平易近人…所以我就決定，喺其他範疇上我要做好啲，我要你留意到我，所以中四嗰年先會又揀做女班長又揀做班會主席。」她續說。
「所以，我覺得我同你嘅關係，就好似太陽同月亮，地球同流星一樣。」
我有點錯愕，因為我想不到當初我為了讓心渝留意我的原因，後來成為了令她喜歡上我的原因，更不知道，原來我對她而言，這麼重要。
「多謝你…」我說。
「我都多謝你…如果俾我揀，揀幾多次都好，我都會選擇遇上你，鍾意你…」心渝說。
眼淚已經不受控地掉下來，海浪沖上沙灘，迎接我不知有沒有化作實體的眼淚，然後沖走…
我們的關係，也快將隨浪而去吧…
那個打算成為導領的決定，我還不知道該不該和心渝說…
在命運那裡回來後，要降落在正確的時間點，簡直是不可能，我不應該讓心渝抱有無謂的希望…
再者…即使我能準確地回來，那又怎樣？都只是一個沒有實體的鬼魂，難道要心渝和我這樣相處一輩子嗎…
我知道時間的能耐，來多幾次潮汐漲退，再深刻的也會沖刷得一乾二淨…
我是不是，不要告訴她比較好？
讓她忘記我，讓她擁有正常人的幸福…
「你係唔係有嘢瞞住我？」心渝突然之間這樣問。
「無…！無！」我連忙撒謊。
「得返兩日時間都要瞞住我？」她問。
看來我都是瞞不過她…
「等！我會等你！」聽完我解釋完死後世界的機制，她興奮得連忙大叫出來。
「但…就算返到嚟，都係好似而家咁…你摸唔到我…我摸唔到你…你仲要成世都…」我黯然，實在不想心渝為我浪費時間。
「再講，出返嚟仲可以遇到你嘅機率實在太低…」我續說。
「咁…不如試下搵方法提升呢個機率？」她說。
「點樣？」
「走喇！返去！搵資料！」
心渝說完便半奔跑式回到碼頭，在等船的期間亦不忘拿出手提電話上網搜尋。
接下來的兩天時間，她由相對論到量子力學，由量子糾纏到靈魂粒子，不眠不休地找尋各種提升我從命運出來後成功降落的方法。
當然我這個長年考第一的大腦也有幫忙。
不過亦整理不出一個像樣一點的方法。
轉眼間，便來到和那個導領約定的時間。
「嗨～我係導領。」晚上時份，他準時從窗邊出現。
終於到了，離別的時候。
「對唔住…如果唔係我咁執著…就可以陪多你兩日…」心渝說。
「傻啦，一齊咁樣搵資料都好開心呀！好似返去中四嗰陣咁。」我說。
「你要走喇…」
「我要走喇…你唔好等我…去搵屬於自己嘅幸福…」
「但我嘅幸福就係你…」她說。
「對唔住…我曾經諗過同你一生一世…我曾經以為一世仲係好遙遠嘅事所以遲遲都唔敢同你表白…如果唔係我地就唔使錯過咁多時間…對唔住…」
「我會記住你…我會記住同你睇過嘅日出…我會記住同你睇過嘅日落…我會記住同你行過嘅每一條街…我會記住同你睇過嘅每一套戲…我會記住同你一齊做過去每一件蠢事…我會記住我地嗌嘅每一場交…我會記住每一件你做過想我感動嘅事…唔知由幾時開始…黎淅言已經係黃心渝嘅一部分…我地一直以嚟都唔係情侶…但我知我地嘅心有幾接近…就算你去到好遠好遠…只要你都記得我…我地都係喺一齊…」心渝聲淚俱下…
我以靈體的狀態裝出擁抱著心渝的樣子，她就在我懷中哭著…
「好暖…」她說。
「你呃人…」
「我個心好暖…」
「咁我走喇…你要好好生活…無論我去到邊，嗰五百年我都會記住你…掛住你…」
「嗯…唔準有外遇呀你！」心渝破涕為笑地說。
「夠鐘喇，走喇。」導領提醒。
「再見喇…」心渝說。
「希望仲會再見…」我說。
後來我跟導領來到彼岸，他對我說命運就處於這個世界的中央。
各式各樣的靈魂都會在這裡流連，等候著審判以及輪迴。
「你真係肯定要做導領？」他問。
「係。」我堅定地回答。
「問世間…情是何物…」
「你都係有故事嘅人，應該明白我嘅心情…」我說。
「見大家都係同路人…」
「你有方法可以令我準確降落？」我焦急地問。
「如果係有方法，我就唔會錯過…不過…要提高機率唔係無可能…」他說。
「要點做？」我問。
「你要一直諗住佢，強烈嘅意志會吹起順風…」他說。
「咁你對佢嘅思念唔夠強烈？」我問。
「唔係…呢啲嘢，就好似磁石咁…」他黯然地說。
「即係要心渝都同樣好強烈咁想見返我…先可以提高機率？」
「係。」
「多謝你。」我說。
「點解要咁堅持…？當嚟到彼岸之後，同現世嘅時間流逝已經唔一樣，而家出面可能已經過咗幾年，陣間你入埋命運到再彈返出嚟，嗰種時間差更加係難以想像…」
「因為我真係好鍾意佢…」
「即使佢而家可能已經結咗婚？」
「唔通…你其實無錯過？」我問…
「睇你點樣定義為錯過…」他說。
「…不過無論點都好，我都唔會後悔。」我說。
「祝你好運。」
他帶領我來到命運面前，我走進去，許下自己的願望。